އިސްރާއީލުގެ ހަމަލާތައް އިތުރުކޮށް، ޣައްޒާގެ ރައްޔިތުން ގެދޮރުން ނެރެން ރާވަނީ

އިސްރާއީލުގެ އޮފިޝަލުން ޣައްޒާގެ ރައްޔިތުން އެ ސަރަހައްދުން ބޭރުކުރުމުގެ ރޭވުމެއް ކުރިއަށް ނެރެފައިވާ ދަނޑިވަޅެއްގައި، އިސްރާއީލުގެ ސިފައިން ޣައްޒާއަށް ދެމުންދާ ހަމަލާތައް އިތުރުކޮށް، ތިން މީހުން ޝަހީދު ކޮށްލައިފި އެވެ. އިސްރާއީލު ސިފައިންގެ އެންމެ ފަހުގެ ހަމަލާތަކުގައި ގިނަ އަދަދެއްގެ ބަޔަކު ޒަޚަމުވި އެވެ.

ބުރާސްފަތި ދުވަހު ޣައްޒާ ސިޓީގެ ހުޅަނގުގައި އޮންނަ ރިމާލް އަވަށަށް އިސްރާއީލުގެ ޑްރޯންއަކުން ދިން ހަމަލާއެއްގައި އެކަކު ޝަހީދުވެ، އިތުރު ބަޔަކު ޒަޚަމްވެފައިވާ ކަމަށް ޣައްޒާގެ ސިއްހީ މަސްދަރުތަކުން ބުންޏެވެ. ފަލަސްތީނުގެ ވަފާ ނޫސް އޭޖެންސީން ރިޕޯޓްކޮށްފައިވާ ގޮތުގައި، އިސްރާއީލުގެ ޑްރޯންއިން ވަނީ އެ އަވަށުގައި ތިބި އާންމުންގެ ބަޔަކަށް އަމާޒުކޮށް ދެ ފަހަރު މިސައިލް ހަމަލާތައް ދީފަ އެވެ.

މީގެ އިތުރުން، ޣައްޒާގެ އުތުރުގައި އޮންނަ ބައިތު ލާހިޔާ އަވަށުގައި ތިބި ފަލަސްތީނުގެ ބަޔަކަށް އަމާޒުކޮށް އިސްރާއީލު ސިފައިން ބަޑިޖެހުމުގެ ސަބަބުން ދެ މީހަކު ޝަހީދުވެ، އިތުރު ބަޔަކު ޒަޚަމްވެފައިވާ ކަމަށް ވަފާ ނޫސް އޭޖެންސީން ބުނެފައިވެ އެވެ. ޣައްޒާގައި ހުރި އަލް ޖަޒީރާގެ ރިޕޯޓަރު ބުނި ގޮތުގައި، މި ހަމަލާގައި މަރުވި ދެ މީހުންގެ ތެރޭގައި 13 އަހަރުގެ ކުޑަކުއްޖަކު ހިމެނެ އެވެ. އަދި، އަނެއް މީހާއަކީ ހަމަލާގައި ސީރިއަސް ޒަޚަމްތަކެއް ލިބިގެން ސިއްހީ މަރުކަޒަކަށް ގެންދިޔަ ފަހުން މަރުވި މީހެކެވެ.

މި ހަމަލާތަކާ ގުޅިގެން އިސްރާއީލު ސިފައިން ބުނެފައި ވަނީ، ޣައްޒާގެ އުތުރުގައި ގާއިމްކޮށްފައިވާ "ޔެލޯ ލައިން" ހުރަސްކުރި ދެ މީހުން ފާހަގަކުރެވިފައިވާ ކަމަށާއި، އެ މީހުންގެ ފަރާތުން ކުރިމަތިވެދާނެ ނުރައްކަލެއް ނައްތާލުމަށް ޓަކައި އެ މީހުން ޝަހީދުކޮށްލާފައިވާ ކަމަށެވެ. "ޔެލޯ ލައިން" އަކީ ހަމަލާ ބަދަލުކުރުން ހުއްޓާލުމުގެ އެއްބަސްވުމުގެ ދަށުން ޣައްޒާގެ އެތެރޭގައި ހަދާފައިވާ ބަފަރ ޒޯނެކެވެ.

އިސްރާއީލުން މި ހަމަލާތައް ދެމުން މި ދަނީ، އެމެރިކާ މެދުވެރިވެގެން އޮކްޓޯބަރު މަހު އަމަލުކުރަން ފެށި "ހަމަލާތައް މެދުކަނޑާލުމުގެ އެއްބަސްވުމާ" ޚިލާފަށެވެ. މި އެއްބަސްވުމަށްފަހު ޣައްޒާއަށް ދެމުންދިޔަ އެންމެ ބޮޑެތި ހަމަލާތައް އިސްރާއީލު ސިފައިން މެދުކަނޑައިލި ނަމަވެސް، ހަމަލާތައް މުޅިން ހުއްޓާލާފައެއް ނުވެ އެވެ.

ޣައްޒާގެ ރައްޔިތުން އަމިއްލަ ވަޒަނުން ބޭރުކުރުމުގެ ހީލަތްތެރި ރޭވުން

އިސްރާއީލުގެ ހަމަލާތައް ކުރިއަށްދާއިރު، ޣައްޒާގައި ދިރިއުޅޭ ގާތްގަނޑަކަށް ދެ މިލިއަން ފަލަސްތީނު ރައްޔިތުން ހަތް އަހަރު ދުވަހުގެ ތެރޭގައި އެ ސަރަހައްދުން ބޭރުކުރުމުގެ ރޭވުމެއް، އިސްރާއީލުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު ބުރާސްފަތި ދުވަހު ވަނީ ހާމަކޮށްފައެވެ. އޭނާގެ އޮފީހުން ބުނި ގޮތުގައި، މި ރޭވުމުގެ މަގްސަދަކީ މި ކަމަށް ޚާއްސަ މިނިސްޓްރީއެއް އުފެއްދުމާއި، ޣައްޒާގެ ރައްޔިތުން ބަލައިގަންނާނެ ގައުމުތަކާއެކު އެއްބަސްވުންތައް ގާއިމްކުރުމެވެ.

ހަރުކަށި ފިކުރުގެ މި މިނިސްޓަރު ބުނި ގޮތުގައި، މި އިސްނެގުމުގެ ދަށުން ފުރަތަމަ އަހަރު 250,000 މީހުން، ތިން އަހަރު ތެރޭގައި 1.1 މިލިއަން މީހުން، އަދި ހަތް އަހަރު ދުވަހުގެ ތެރޭގައި ގާތްގަނޑަކަށް 1.9 މިލިއަން މީހުން ޣައްޒާއިން ބޭރުކުރުމަށް ވަނީ އަމާޒު ހިފާފަ އެވެ. ބެން-ގްވީރު ބުނި ގޮތުގައި މިއީ "ހަގީގަތަކަށް ހެދިދާނެ" ރޭވުމެކެވެ. އަދި، މިއީ އިސްރާއީލާއި ފަލަސްތީނުގެ މައްސަލައަށް އޮތް ހައްލެއްގެ ގޮތުން "ޣައްޒާގެ ރައްޔިތުން ހިޖުރަކުރުމަށް ހިތްވަރުދިނުމަށް" އެކުލަވާލާފައިވާ ސިޔާސަތެކެވެ.

އިސްރާއީލުގެ ޑިފެންސް މިނިސްޓަރު އިސްރައެލް ކަޓްޒް ވެސް ބުދަ ދުވަހު ވަނީ، ޣައްޒާއިން ފަލަސްތީނު ރައްޔިތުން ބޭރުކުރުމުގެ މަސައްކަތް އިސްރާއީލުން އަދިވެސް ކުރަމުންދާކަމަށް އިއުތިރާފުވެފަ އެވެ. ޖެނީވާ ކޮންވެންޝަންގެ ދަށުން، އިސްތިއުމާރުކޮށްފައިވާ ބިމެއްގައި ދިރިއުޅޭ އާންމުން މަޖުބޫރުން އެހެން ތަނަކަށް ބަދަލުކުރުމަކީ ހަނގުރާމައިގެ ކުށެއްގެ ގޮތުގައި ބެލެވޭ ކަމެކެވެ.

2023 ވަނަ އަހަރުގެ އޮކްޓޯބަރު މަހު އިސްރާއީލުން ޣައްޒާގައި ފެށި ނަސްލު ނައްތާލުމުގެ ގަތުލުއާންމާ ގުޅިގެން، ޣައްޒާގެ ގިނަ ރައްޔިތުން މިހާރު ވެސް ވަނީ އެ މީހުންގެ ގެދޮރު ދޫކޮށް ރަށުގެ އެކި ސަރަހައްދުތަކަށް ހިޖުރަކުރަން މަޖުބޫރުވެފަ އެވެ. ޣައްޒާގެ ހެލްތު މިނިސްޓްރީގެ ތަފާސްހިސާބުތަކުން ދައްކާ ގޮތުގައި، ނަސްލުހޭދު ފެށުނީއްސުރެ އިސްރާއީލުގެ ހަމަލާތަކުގައި ޣައްޒާއިން މަދުވެގެން 73,470 މީހުން ވަނީ ޝަހީދުކޮށްލާފަ އެވެ. މީގެ ތެރެއިން 1,330 އަށްވުރެ ގިނަ މީހުން ޝަހީދުކޮށްލާފައި ވަނީ ހަމަލާ ބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުންނެވެ.