އިސްރާއީލު ސިފައިންނާއި ވަޒަންވެރިން ހަމަލާދީ ހުޅަނގު އައްސޭރިން ދެ ޒުވާނުން ޝަހީދުކޮށްލައިފި

އިސްރާއީލުގެ އިސްތިއުމާރީ ސިފައިންނާއި ހައްދުފަހަނައެޅި ވަޒަންވެރިން ހުޅަނގު އައްސޭރީގެ އަވަށަކަށް ވަދެގަނެ ހިންގި ޖަރީމާތަކެއްގައި ފަލަސްތީނުގެ ދެ ޒުވާނަކު ޝަހީދުކޮށްލައިފި އެވެ. މި ހާދިސާ ހިނގާފައި ވަނީ ބުދަ ދުވަހު އަލް-މުޣައްޔިރު އަވަށަށް އިސްރާއީލުން ދިން ހަމަލާތަކެއްގެ ތެރޭގަ އެވެ. މި އަވަށަކީ ފަހަކަށް އައިސް އިސްރާއީލުގެ ޣައިރުގާނޫނީ ވަޒަންވެރިންނާއި ސިފައިން ތަކުރާރުކޮށް ހަމަލާދެމުންދާ ސަރަހައްދެކެވެ.

ފަލަސްތީނުގެ ވަފާ ނޫސް އޭޖެންސީން އެ އަވަށުގެ ކައުންސިލްގެ ރައީސާ ހަވާލާދީ ރިޕޯޓްކޮށްފައިވާ ގޮތުގައި، މި ހަމަލާގައި ޝަހީދުވެފައިވަނީ އުމުރުން 19 އަހަރުގެ މުހައްމަދު ނައުސާންއާއި ޚަލީލް އަބޫ އަލިޔާ އެވެ. ކައުންސިލްގެ ރައީސް ވިދާޅުވި ގޮތުގައި، އަވަށުގެ ރައްޔިތުން ވަޒަންވެރިންނާ ކުރިމަތިލާން މަސައްކަތް ކުރުމުން، އިސްރާއީލު ސިފައިން ވަނީ އާންމުންގެ ގަޔަށް ބަޑިޖަހާފަ އެވެ. އޭގެ ތެރެއިން ދެ ޒުވާނުން ޝަހީދުވެފައި ވަނީ، ހަމަލާތަކުގައި ލިބުނު ޒަޚަމުތަކަށް ފަރުވާދެމުން ދަނިކޮށެވެ. މީޑިއާއަށް މައުލޫމާތު ދިން އެ އަވަށުގެ ބައެއް މީހުން ބުނި ގޮތުގައި، މި ހަމަލާ ދިނުމުގެ ކުރިން އިސްރާއީލުގެ ސްނައިޕަރުން ވަނީ އަވަށުގެ އިމާރާތްތަކުގެ ފުރާޅުތަކުގެ މަތީގައި ހަރަކާތްތެރިވެފަ އެވެ.

އދ. ގެ އޮފީސް ފޯ ދި ކޯޑިނޭޝަން އޮފް ހިއުމަނިޓޭރިއަން އެފެއާޒްއިން (އޯސީއެޗްއޭ) ހާމަކޮށްފައިވާ ތަފާސްހިސާބުތަކަށް ބަލާއިރު، 2026 ވަނަ އަހަރު ފެށުނީއްސުރެ މިހާތަނަށް ހުޅަނގު އައްސޭރީގައި އިސްރާއީލު ސިފައިންނާއި ހައްދުފަހަނައެޅި ވަޒަންވެރިން ދިން ހަމަލާތަކުގައި ފަލަސްތީނުގެ 79 މީހުން ވަނީ ޝަހީދުކޮށްލާފަ އެވެ. މީގެ ތެރޭގައި 19 ކުޑަކުދިން ހިމެނޭއިރު، މި މުއްދަތުގެ ތެރޭގައި ފަލަސްތީނުގެ 1,870 އަށްވުރެ ގިނަ މީހުން ވަނީ ޒަޚަމްކޮށްލާފަ އެވެ.

އޯސީއެޗްއޭއިން ބުނާ ގޮތުގައި އަލް-މުޣައްޔިރު އަވަށުގައި އިސްރާއީލުގެ ނިރުބަވެރި ވަޒަންވެރިން ދޭ ހަމަލާތައް ބޮޑަށް އަމާޒުކުރަނީ އެ އަވަށަށް ވަދެނުކުމެ ހެދުމަށް އޮންނަ ހަމައެކަނި މަގަށެވެ. މި ގޮތުން އެ މަގުން ދަތުރުކުރާ އުޅަނދުތަކަށް މެދުކެނޑުމެއް ނެތި ހަމަލާދެމުންދާއިރު، މިދިޔަ އޮގަސްޓް މަހުގެ 20 ވަނަ ދުވަހު ދިން މި ފަދަ ހަމަލާއެއްގައި ފަލަސްތީނުގެ 11 މީހަކު ވަނީ ޒަޚަމްވެފަ އެވެ.

މީޑިއާތަކުން ކަށަވަރުކޮށްފައިވާ ވީޑިއޯ ފުޓޭޖުތަކުން ފެންނަ ގޮތުގައި، މިދިޔަ އަންގާރަ ދުވަހު އިސްރާއީލު ސިފައިން ވަނީ މަދާމާ އަވަށުގެ މިސްކިތެއްގެ ތެރެއަށް ކަރުނަގޭސް ޖަހައި، އެ ތަނަށް އެއްވެ ތިބި މީހުންނަށް ހަމަލާދީފަ އެވެ. އޭގެ ކުޑަވަގުތުކޮޅެއް ކުރިން، އިސްރާއީލުގެ ހަރުކަށި ވަޒަންވެރިން ވަނީ ކައިރީގައި އޮންނަ ބަޒާރިއްޔާ އަވަށުގެ އެހެން މިސްކިތެއްގައި ހުޅުޖަހަން މަސައްކަތް ކޮށްފަ އެވެ. އިސްރާއީލު ސިފައިންގެ އެހީތެރިކަމާއެކު ވަޒަންވެރިން ހިންގަމުންދާ މި ފަދަ އަނިޔާވެރި އަމަލުތަކުގެ ސަބަބުން، އިސްރާއީލާ ގާތް ގުޅުން ބާއްވާ ގައުމުތަކުގެ ކަންބޮޑުވުން ވަނީ އިތުރުވެފަ އެވެ.

އޮގަސްޓް މަހު ހައްދުފަހަނައެޅި ވަޒަންވެރިން ވަނީ ނާބުލުސްގެ ދެކުނުން އޮންނަ ގުސްރާ އަވަށުގައި ފަލަސްތީނުގެ ރައްޔިތުން ދިރިއުޅޭ ގެތަކެއް ހިސާރުކޮށްފައެވެ. އެމެރިކާއިން އިސްރާއީލަށް ކަނޑައަޅާފައި ހުންނަވާ ސަފީރު މައިކް ހަކަބީ ވަނީ މި އަމަލު ކުށްވެރި ކުރައްވާފަ އެވެ. އޭނާއަކީ، އިސްރާއީލުގެ ނަސްލުހޭދާއި ލާއިންސާނީ ޖަރީމާތަކަށް އަދި ފަލަސްތީނުގެ ބިންތައް ފޭރިގަތުމަށް ތާއީދު ކުރައްވާ ބޭފުޅެކެވެ. މީގެ އިތުރުން، ވިލާތުގެ އިއްތިހާދުން ދަނީ އިސްރާއީލުގެ ވަޒަންވެރިން އުފައްދާ މުދާ އެ އިއްތިހާދުގެ ގައުމުތަކަށް އެތެރެކުރުން މަނާކުރުމާ މެދު ވިސްނަމުންނެވެ.

އޮގަސްޓް މަހުގެ ފަހުކޮޅު، މެދުއިރުމަތީގެ ސުލްހައިގެ ކަންކަމާ ބެހޭ އދ. ގެ ޑެޕިއުޓީ ސްޕެޝަލް ކޯޑިނޭޓަރު ޑރ. ރާމިޒް އަލަކްބަރޯވް ވިދާޅުވީ، ވަޒަންވެރިން ދޭ ހަމަލާތައް ކުރިއަށް ދަނީ އެއްވެސް ޒިންމާދާރުކުރުވުމެއް ނެތި ކަމަށެވެ. ފަލަސްތީނުގެ މައްސަލަތަކާ ބެހޭ އދ. ގެ ޚާއްސަ ރެޕަޓުއާ ފްރަންސެސްކާ އަލްބަނޭޒޭ ހިމެނޭހެން ގިނަ މާހިރުން ބުނަމުން ދަނީ، މި ހަމަލާތަކަކީ ވަކި ނަސްލެއް ނައްތާލުމަށް ރޭވުންތެރިކަމާއެކު އަދި އިސްރާއީލުގެ ދައުލަތުގެ އެހީތެރިކަމާ އެކު ހިންގަމުންދާ ޖަރީމާތަކެއް ކަމަށެވެ.