ކޮންސަރޓެއްގެ ތެރޭގައި ފަލަސްތީނަށް ތާއީދުކޮށް ޝުއޫރު ފާޅުކުރުމާ ގުޅިގެން މެސިވް އެޓޭކް ބޭންޑު ސިންގަޕޫރުން މުއްދަތެއް ނެތް ގޮތަށް މަނާކޮށްފި

ސިންގަޕޫރުގައި ބޭއްވި ކޮންސަރޓެއްގެ ތެރޭގައި ފަލަސްތީނަށް ތާއީދުކޮށް ޝުއޫރު ފާޅުކުރުމާ ގުޅިގެން، އެ ގައުމުގެ ކަމާބެހޭ ފަރާތްތަކުން އަމަލުކުރި ގޮތާމެދު "ހައިރާންވެ، މާޔޫސްވެފައިވާ" ކަމަށް މަޝްހޫރު މިއުޒިކް ބޭންޑް "މެސިވް އެޓޭކް" އިން ބުނެފި އެވެ.

އާދީއްތަ ދުވަހު އެ ބޭންޑުން އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، ފުލުހުން އެ ބޭންޑުގެ މެންބަރުން ހިފަހައްޓައި، ވަކިވަކިން ސުވާލުކޮށްފައިވާ ކަމަށެވެ. އަދި ބައެއް މެންބަރުން ތިބި ހޮޓެލް ރޫމްތައް ބަލައި ފާސްކޮށް، ވަގުތީ ގޮތުން ޕާސްޕޯޓްތައް ވެސް އަތުލާފައިވާ ކަމަށް އެ ބޭންޑުން ހާމަކުރި އެވެ.

މިދިޔަ ޖުލައި މަހުގެ 29 ވަނަ ދުވަހު ސިންގަޕޫރުގައި ބޭއްވި ޝޯގެ ތެރޭގައި، އެ ބޭންޑުގެ ދެ މެންބަރަކު ވަނީ ފަލަސްތީނުގެ ދިދަ އުފުލާލައި، ބެލުންތެރިންނާއެކު "ފްރީ ޕަލަސްޓައިން" އޭ ގޮވާ އަޑުއުފުލާފަ އެވެ.

އާންމު ތަންތަނުގައި ވާހަކަދެއްކުމާއި އެއްވުންތަކާ މެދު ހަރުކަށި ގަވާއިދުތަކެއް ގެންގުޅޭ ސިންގަޕޫރުން ވަނީ، މެސިވް އެޓޭކް ބޭންޑް އެ ގައުމަށް އެނބުރި އައުން މުއްދަތެއް ނެތް ގޮތަށް މަނާކޮށްފަ އެވެ.

ހުކުރު ދުވަހު ބީބީސީއަށް މައުލޫމާތު ދެމުން ފުލުހުންގެ ތަރުޖަމާނަކު ވިދާޅުވީ، އެ ބޭންޑުގެ ދެ މެންބަރުންނަށް ދެން ސިންގަޕޫރަށް އެތެރެނުވެވޭނެ ކަމަށާއި، އެ ގައުމުގައި އެ ބޭންޑުގެ ހުނަރު ދެއްކުން ވެސް މަނާކޮށްފައިވާ ކަމަށެވެ.

ބޭރު ގައުމުތަކުގެ ދިދަ އާންމުކޮށް ދެއްކުން މަނާކުރާ ގާނޫނާއި، އާންމު ހަރަކާތްތަކުގައި ސިޔާސީ ޝުއޫރު ފާޅުކުރުން ކޮންޓްރޯލްކުރާ ގާނޫނާ ޚިލާފުވި ކަމަށް ބުނެ، ރޮބަޓް ޑެލް ނާޖާ އަދި ގްރާންޓް މާޝަލްއަށް ވަނީ "ހަރުކަށި އިންޒާރު" ދީފަ އެވެ.

މެސިވް އެޓޭކުން ބުނި ގޮތުގައި، ޝޯ ފެށުމުގެ ކުރިންނާއި ޝޯ ނިމުނު ވަގުތު، އޮޑިޓޯރިއަމްގައި ތިބި ގިނަ އަދަދެއްގެ ބަޔަކު އަމިއްލައަށް އިސްނަގައިގެން "ފްރީ ޕަލަސްޓައިން" އޭ ގޮވައި އަޑުއުފުލާފައިވެ އެވެ. އެ މީހުން އެގޮތަށް އަމަލުކުރީ، އެއީ ސަރުކާރުގެ ސެންސަރޝިޕް ގާނޫނުތަކާ ޚިލާފު ކަމެއްކަން އެނގި ތިބެ، އެކަމަށް ބެލުމެއް ނެތި ކަމަށް ވެސް ބޭންޑުން ފާހަގަކުރި އެވެ.

އެ ބޭންޑް ބޭން ކުރުމާ ބެހޭގޮތުން ސީދާ އެއްޗެއް ބުނެފައި ނުވި ނަމަވެސް، އެއީ ވަރަށް "އަޖައިބު ކުރުވަނި ތަޖުރިބާއެއް" ކަމަށް އެ ބޭންޑުން ސިފަކުރި އެވެ. އަދި ދުނިޔޭގެ 157 ގައުމަކުން ބަލައިގަންނަ މިނިވަން ދައުލަތެއްގެ ދިދަ އުފުލާލުމަކީ ގާނޫނާ ޚިލާފު ކަމަކަށް ވެދާނެ ކަމަށް ދުވަހަކުވެސް ހީނުކުރާ ކަމަށް އެ ބޭންޑުން ބުންޏެވެ.

މީގެ އިތުރުން، ފަލަސްތީނުގެ ރައްޔިތުންނާ މެދު ހަމްދަރުދީ ފާޅުކުރުމަކީ އަޚްލާގީ ގޮތުން ކުރަންޖެހޭ ކަމެއް ކަމަށް ގަބޫލުކުރާ ސިންގަޕޫރުގެ ސަޕޯޓަރުންނާއެކު، އެފަދަ ޝުއޫރެއް ފާޅުކުރެވުނީތީ ފަޚުރުވެރިވާ ކަމަށް ވެސް އެ ބޭންޑުން އިތުރަށް ބުންޏެވެ.

މެސިވް އެޓޭކް ބޭންޑުން އިންސްޓަގްރާމްގައި ކުރި މި ޕޯސްޓަށް 146،000 އަށްވުރެ ގިނަ މީހުން ލައިކް ދީފައިވާއިރު، ގިނަ އަދަދެއްގެ ސަޕޯޓަރުން ދަނީ އެ ބޭންޑަށް ތާއީދުކޮށް މެސެޖުތައް ފޮނުވަމުންނެވެ.

އިންސްޓަގްރާމް ބޭނުންކުރާ ސިންގަޕޫރުގެ މީހަކު ލިޔެފައިވަނީ، އެ ގައުމުގެ ގިނަ ބަޔަކު ބޮޑެތިވަނީ ބުނާ އެއްޗަކަށާއި، އަޑުއުފުލާ މިންވަރަށް ވަރަށް ބޮޑަށް ސަމާލުވާން ދަސްކޮށްގެން ކަމަށެވެ.

"ފަލަސްތީނާއެކު ސާބިތުވެ ތިބިކަމަށްޓަކައި ޝުކުރިއްޔާ...،" އެ މީހާ ލިޔެފައިވެ އެވެ.

ނަމަވެސް، އެ ކޮންސަރޓަށް ދިޔަ ސިންގަޕޫރުގެ ކޮންޓެންޓް ކްރިއޭޓަރެއް ކަމަށްވާ ކްރިސްޓަލް ލިމް-ލޭންޖް އިންސްޓަގްރާމްގައި ބުނެފައިވަނީ މިއީ ވަރަށް "އޮޅުންބޮޅުން ބޮޑު މައްސަލައެއް" ކަމަށެވެ.

އޭނާ ގަބޫލުކުރާ ގޮތުގައި ފަންނާނުން ޝޯ ދޭ ގައުމުތަކުގެ ގާނޫނުތަކަށް އިހުތިރާމް ކުރަންޖެހޭނެ އެވެ.

"އެހެންނަމަވެސް، އަހަރެން ގަބޫލުކުރާ ގޮތުގައި ފަންނުވެރިކަމަކީ އަބަދުވެސް އާންމު ވިސްނުންތަކަށް ގޮންޖަހައި، މުޖުތަމައު ރަމްޒުކޮށްދީ، އުނދަގޫ މައުޟޫއުތަކަށް ބަހުސް އުފައްދާ އެއްޗެއް. ފަންނުވެރިކަމާއި ސިޔާސީ ކަންކަން ވަކިކުރުމަކީ ދުވަހަކުވެސް ފަސޭހަ ކަމެއް ނޫން،" އޭނާ ލިޔެފައިވެ އެވެ.

މެސިވް އެޓޭކް ބޭންޑަކީ ޣައްޒާ ހަނގުރާމަ ހިމެނޭހެން ތަފާތު އެކި މައްސަލަތަކުގައި ސިޔާސީ ގޮތުން ފާޅުގައި ޝުއޫރު ފާޅުކުރާ ބޭންޑެއްގެ ގޮތުގައި މަޝްހޫރު ބޭންޑެކެވެ.

މި އަހަރުގެ ކުރީކޮޅު ލަންޑަނުގައި ބޭއްވި މުޒާހަރާއެއްގެ ތެރޭގައި، މަނާކޮށްފައިވާ ޖަމާއަތެއް ކަމަށްވާ "ޕަލަސްޓައިން އެކްޝަން" އަށް ތާއީދުކުރި ކަމުގެ ތުހުމަތުގައި ޑެލް ނާޖާ ވަނީ ހައްޔަރުކޮށްފަ އެވެ.

އުމުރުން 61 އަހަރުގެ ޑެލް ނާޖާ އެ ދުވަހު މުޒާހަރާގެ ބައިވެރިންނާއެކު އިށީނދެގެން އިނީ "އަހަރެން ނަސްލު ނައްތާލުމާ ދެކޮޅު، އަހަރެން ޕަލަސްޓައިން އެކްޝަނަށް ތާއީދުކުރަން" ލިޔެފައިވާ ބޯޑެއް ހިފައިގެންނެވެ.

އިސްރާއީލާއި ޣައްޒާ ހަނގުރާމައާ ގުޅޭގޮތުން އާންމުކޮށް ޝުއޫރު ފާޅުކުރުމާ މެދު ސިންގަޕޫރުން ގެންގުޅެނީ ވަރަށް ހަރުކަށި ސިޔާސަތެކެވެ. ތަފާތު ސަގާފަތްތަކުގެ މީހުން ދިރިއުޅޭ އެ ގައުމުގެ ކަމާބެހޭ ފަރާތްތަކުން ބުނަނީ، މިއީ ނަސްލީ އަދި އިޖުތިމާއީ ބަދަހިކަން ދެމެހެއްޓުމަށް ކޮންމެހެން ބޭނުންތެރި ކަމެއް ކަމަށެވެ.

ސިންގަޕޫރުގެ ހޯމް އެފެއާޒް މިނިސްޓްރީން 2023 ވަނަ އަހަރު ނެރުނު ބަޔާނެއްގައި، އިސްރާއީލް-ޣައްޒާ ހަނގުރާމައާ ގުޅުންހުރި ބޭރު ގައުމުތަކުގެ ނިޝާންތައް ހިމެނޭ ތަކެތި އާންމުކޮށް ދެއްކުމާއި ބޭނުންކުރުމާ ދެކޮޅަށް އިރުޝާދު ދީފައިވެ އެވެ.

މި އަހަރުގެ ކުރީކޮޅު، ފަލަސްތީނުގެ ހައްގުގައި ހުއްދަ ނުހޯދައި ހިނގާލުމެއް ބޭއްވި މައްސަލައިގައި ވެސް ސިންގަޕޫރުން ވަނީ ބައެއް މީހުން ޖޫރިމަނާކޮށްފަ އެވެ.

"ސިންގަޕޫރުގެ ތަފާތު ނަސްލުތަކާއި ދީންތަކުގެ މެދުގައި އޮތް ސުލްހަވެރިކަމާއި އެކުވެރިކަމަކީ އާދައިގެ ކަމެއްގެ ގޮތުގައި ދެކިގެން ނުވާނެ. އަދި ބޭރުގެ ހާދިސާތަކުގެ ސަބަބުން އަހަރެމެންގެ މުޖުތަމައަށް އަސަރުކުރިޔަ ދީގެން ނުވާނެ،" ފުލުހުންގެ ތަރުޖަމާނު ކުރިން ބީބީސީއަށް ވިދާޅުވެފައިވެ އެވެ.

މެސިވް އެޓޭކް ބޭންޑުން މިހާރު ދަނީ ދުނިޔޭގެ ދަތުރެއް ކުރަމުންނެވެ. އޭޝިއާގެ ދަތުރުތައް ނިންމާލުމަށްފަހު، އަންނަ ހަފުތާގައި އެ ބޭންޑުން އޮސްޓްރޭލިއާގައި ޝޯތައް ދިނުމަށް ވަނީ ހަމަޖެހިފަ އެވެ.