ކުޑަހުވަދޫ މެޗު ހުރާ އަށް ދިނުމާ އެކު، ލީގުގެ ޗެމްޕިއަންކަން އެ ޓީމަށް ލިބިއްޖެ

މިހާރު ކުރިއަށްދާ އެފްއޭއެމް ރީޖަނަލް ލީގުގެ ސެންޓްރަލް ރީޖަންގެ ޗެމްޕިއަންކަން ކ.ހުރާ އަށް ލިބިއްޖެ އެވެ.

ހުރާ އަށް ޗެމްޕިއަންކަން ލިބިފައި ވަނީ ދ.ކުޑަހުވަދޫއާ ދެކޮޅަށް ކުޅުނު މެޗު އެ ޓީމަށް ދިނުމަށް ނިންމުމުންނެވެ. ލީގުގެ ފަހު މެޗުގައި ކުޑަހުވަދޫ އާއި ހުރާ ބައްދަލު ކުރިއިރު، އެ މެޗު ކުޑަހުވަދޫ އިން ވަނީ 4-1 އިން ކާމިޔާބު ކޮށްފަ އެވެ. އެއާ އެކު، ސެންޓްރަލް ލީގުގެ ޗެމްޕިއަންކަން އަދި ދިވެހި ޕްރިމިއާ ލީގުގެ ކޮލިފިކޭޝަންގެ ޖާގަ ކުޑަހުވަދޫ އަށް ލިބުނެވެ. 

ނަމަވެސް، އެފްއޭއެމް އިން ނެރެފައިވާ ބަޔާނެއްގައި ބުނެފައި ވަނީ، ކުޑަހުވަދޫ އިން ހުއްދަ ނެތް ދެ ކުޅުންތެރިޔަކު އެ މެޗުގައި ބޭނުން ކޮށްފައިވާ ކަމަށެވެ. ކުޑަހުވަދޫ އިން ޤަވާއިދާ ޚިލާފަށް ކުޅުންތެރިން ބޭނުން ކޮށްފައިވާތީ، އެފްއޭއެމް އިން ނިންމާފައި ވަނީ އެ މެޗު 2-0 އިން ހުރާ އަށް ލިބުނީ ކަމަށެވެ. އެއާ އެކު، ހުރާ އަށް ވަނީ ސެންޓްރަލް ރީޖަންގެ އެއް ވަނަ ލިބިފަ އެވެ.

އެގޮތުން ހަ މެޗުން ހުރާ އަށް 13 ޕޮއިންޓު ލިބޭއިރު، ދެ ވަނައިގައި ކުޑަހުވަދޫ އަށް ލިބެނީ ހަ މެޗުން އަށް ޕޮއިންޓެވެ. ތިން ވަަނައިގައި ދ.މީދޫ އޮތީ ފަސް މެޗުން ހަ ޕޮއިންޓާ އެކު އެވެ. ހަތަރު ވަނައިގައި އޮތް އދ.މަހިބަދޫ އަށް ލިބެނީ ހަތަރު ޕޮއިންޓެވެ. 

ދިވެހި ޕްރިމިއާ ލީގުގެ ކޮލިފިކޭޝަންގައި ޖުމުލަ ހަ ޓީމެއް ކުޅޭއިރު، ލީގުން ޖާގަ ލިބޭނީ ހަތަރު ޓީމަކަށެވެ. މިވަގުތު ފަސް ޓީމަކުން މި ވަނީ ކޮލިފިކޭޝަންގެ ޖާގަ ހޯދައިފަ އެވެ. އެއީ ކުލަބު ގްރީން ސްޓްރީޓްސް އާއި ޓީސީ ސްޕޯޓްސް ކުލަބުގެ އިތުރުން، ބިސް ބުރު ސްޕޯޓްސް ކުލަބާއި، ހއ.ދިއްދޫ އަދި ހުރާ އެވެ. ބާކީ ދެން އޮތީ ސައުތު ރީޖަނަލް ލީގުގެ ޖާގަ އެވެ.