އަބްރަހަމް ލިންކަން އެނބުރި ޤައުމަށް ދިޔުމުގެ ތެރޭގައި ސިންގަޕޫރު ކައިރިން ދަތުރުކޮށްފި

މެދުއިރުމަތީގައި ގިނަ ދުވަސް ތަކެއް ވަންދެން ހަރަކާތްތެރިވުމަށް ފަހު، އެމެރިކާގެ މަތިންދާ ބޯޓު އުފުލާ މަނަވަރު "ޔޫއެސްއެސް އަބްރަހަމް ލިންކަން" އެނބުރި ޤައުމަށް ދިޔުމުގެ ދަތުރުގައި އާދީއްތަ ދުވަހުގެ ފަތިހުގެ ވަގުތެއްގައި ސިންގަޕޫރު ކައިރިން ދަތުރުކޮށްފި އެވެ.

މި މަނަވަރު އެނބުރި އެމެރިކާ އަށް ދިޔުމުގެ ކުރިން މަޑުކުރުމަށް ހަމަޖެހިފައިވަނީ ތައިލެންޑުގައި އެވެ.

ސިންގަޕޫރު ކައިރިން މި މަނަވަރު ދަތުރު ކުރަނިކޮށް ފެނިފައި ވަނީ އާދީއްތަ ދުވަހުގެ ފަތިހު، އިންޑޮނޭޝިއާގެ ބަޓާމް ރަށުގައި ތިބި އެސޯސިއޭޓެޑް ޕްރެސް (އޭޕީ) ގެ ނޫސްވެރިންނަށެވެ. ސިންގަޕޫރު ކަނޑު އޮޅިން މި ބިޔަ މަނަވަރު ދަތުރު ކުރަމުން ދިޔަ މަންޒަރު އެ ސަރަހައްދުން ވަނީ ފެނިފައި އެވެ.

އެމެރިކާގެ ކަނޑުގެ ސިފައިންގެ އެންމެ ބޮޑު އެއް މަނަވަރު ކަމަށްވާ ލިންކަން މެދުއިރުމަތީގައި ހަރަކާތްތެރިވީ އީރާންއާ ދެކޮޅަށް އެމެރިކާ އިން ކުރަމުންދާ މަސައްކަތް ތަކަށް އެހީތެރިވުމަށެވެ. މި ދަތުރުގައި އެ މަނަވަރު ވަނީ އެއްވެސް މެދު ކެނޑުމެއް ނެތި ކަނޑު މަތީގައި 250 އަށް ވުރެ ގިނަ ދުވަސް ހޭދަކޮށް، އައު ރެކޯޑެއް ގާއިމު ކޮށްފައި އެވެ.

މިހާ ގިނަ ދުވަހު މަނަވަރު ކަނޑު މަތީގައި އޮތުމާ ގުޅިގެން، އޭގައި މަސައްކަތް ކުރާ ފަޅުވެރިންގެ ނަފްސާނީ ދުޅަހެޔޮކަމާ މެދު ވަނީ ކަންބޮޑުވުން ތަކެއް އުފެދިފައި އެވެ. މީގެ އިތުރުން މަނަވަރުގައި ކާބޯތަކެއްޗާއި، އަމިއްލަ ސާފުތާހިރުކަމަށް ބޭނުންވާ ތަކެތި ހުސްވަމުންދާ ކަމުގެ ރިޕޯޓުތަކެއް ވެސް ވަނީ ފެންމަތިވެފައި އެވެ.

ތައިލެންޑުގެ އޮފިޝަލުން ވިދާޅުވި ގޮތުގައި، އެމެރިކާގައި ހުންނަ މަރުކަޒަށް ދިޔުމުގެ ކުރިން ފަޅުވެރިންނަށް އަރާމު ކުރުމަށާއި، ބޭނުންވާ ތަކެތި ހަމަކުރުމަށްޓަކައި މި މަނަވަރު ތައިލެންޑުގެ ބަނދަރަކަށް ކައިރި ކުރާނެ އެވެ. މިއީ ގިނަ ދުވަސް ތަކެއްގެ ބުރަ މަސައްކަތަށް ފަހު ފަޅުވެރިންގެ ހާލަތު ރަނގަޅު ކުރުމަށް އަޅާ ފިޔަވަޅެއް ކަމަށް ބެލެވެ އެވެ.