ވެނެޒުއޭލާގެ 65 ބިލިއަން ފީފާ ތެލުގެ ކޮންޓްރޯލް އެމެރިކާއަށް
29 އޯގަސްޓު 2026 | ހޮނިހިރު 13:29ވެނެޒުއޭލާގެ ތެލުގެ ރިޒާވްގެ ބޮޑު ބައެއް އެމެރިކާގެ ކޮންޓްރޯލްގެ ދަށަށް ގެނައުމަށް އެ ގައުމުގެ ސަރުކާރާއެކު ތާރީޚީ އެއްބަސްވުމެއްގައި ސޮއިކޮށްފައިވާކަން ރައީސް ޑޮނަލްޑް ޓްރަމްޕް އިއުލާން ކުރައްވައިފި. މި މަޝްރޫއުގެ ސަބަބުން އެމެރިކާގައި ތެލުގެ އަގު ހެޔޮވެގެންދާއިރު، ވެނެޒުއޭލާގެ އިގްތިސާދު ބިނާކުރުމަށް ބޭނުންވާ ބިލިއަނުން ޑޮލަރުގެ އިންވެސްޓްމަންޓާއި ވަޒީފާގެ ފުރުސަތުތައް އެ ގައުމަށް ލިބިގެންދާނެ
ވެނެޒުއޭލާގެ ކަރަބޯބޯ ސްޓޭޓްގެ ޕުއެރްޓޯ ކަބެއްލޯގައި ހުންނަ އެލް ޕަލީޓޯ ރިފައިނަރީ | ގެޓީ އިމޭޖަސް
ވެނެޒުއޭލާގެ ތެލުގެ ރިޒާވްގައި ހިމެނޭ ގާތްގަނޑަކަށް 65 ބިލިއަން ފީފާ ތެލުގެ ކޮންޓްރޯލް އެމެރިކާއަށް ލިބޭނެ ފަދަ އެއްބަސްވުމެއްގައި އެ ގައުމުގެ ސަރުކާރާއެކު ސޮއިކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރައްވައިފި އެވެ. މިއީ ދުނިޔޭގެ ތާރީޚުގައި ވެސް ސޮއިކުރެވޭ ތެލުގެ އެންމެ ބޮޑު މުއާމަލާތް ކަމަށް ޓްރަމްޕް ސިފަކުރެއްވިއިރު، މި އެއްބަސްވުމުގެ ސަބަބުން އޯޕެކްގެ މެންބަރު ގައުމެއް ކަމަށްވާ ވެނެޒުއޭލާގެ އިނދަޖެހިފައިވާ ހަކަތައިގެ ސިނާއަތަށް އާ ދިރުމެއް ލިބިގެންދާނެ އެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރޫތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، މިއީ ތާރީޚީ މުއާމަލާތެއް ކަމަށާއި، މީގެ ސަބަބުން އެމެރިކާގެ ތެލުގެ ރިޒާވް ދެގުނައަށް ވުރެ އިތުރުވެގެންދާނެ ކަމަށެވެ. އަދި މިކަމުގެ ސަބަބުން އެމެރިކާގެ ހުރިހާ ރައްޔިތުންނަށް ލިބޭ ތެލުގެ އަގު ވަރަށް ބޮޑަށް ހެޔޮވެގެންދާނެ ކަމަށް ވެސް ޓްރަމްޕް ވިދާޅުވި އެވެ.
ޓްރަމްޕް ލިޔުއްވާފައިވާ ގޮތުގައި، އެމަނިކުފާނުގެ އިރުޝާދުގެ ދަށުން ސެކްރެޓަރީ އޮފް ސްޓޭޓް މާކޯ ރޫބިއޯ އާއި ސެކްރެޓަރީ އޮފް ވޯ ޕީޓް ހެގްސެތު ވަނީ ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒްއާ ގާތުން މަސައްކަތް ކުރައްވާފަ އެވެ. އަމިއްލަ ވިޔަފާރިތަކާ ގުޅިގެން ކުރިއަށްގެންދާ މި ޕާޓްނަޝިޕްގެ ދަށުން، ވެނެޒުއޭލާގައި ހުރި 65 ބިލިއަނަށް ވުރެ ގިނަ ފީފާގެ ތެލުގެ ރިޒާވްގެ މެޖޯރިޓީ ކޮންޓްރޯލް އެމެރިކާއަށް ވަނީ ކަށަވަރުކޮށްދީފަ އެވެ. އަދި މިއީ އެމެރިކާގެ ޓެކްސް ދައްކާ ރައްޔިތުންގެ އަތުން އެއްވެސް ޚަރަދެއް ހިނގާނެ ކަމެއް ނޫން ކަމަށް ވެސް ޓްރަމްޕް ވިދާޅުވި އެވެ.
ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް ވަނީ މި އެއްބަސްވުމަށް މަރުހަބާ ވިދާޅުވެފަ އެވެ. މި އެއްބަސްވުމުގެ ސަބަބުން ވެނެޒުއޭލާގެ ދައުލަތުގެ ޚަޒާނާއަށް ގާތްގަނޑަކަށް 209 ބިލިއަން ޑޮލަރު ވަންނާނެ ކަމަށް ބެލެވެ އެވެ.
މި އެއްބަސްވުން އިއުލާންކޮށްފައި މިވަނީ، ވެނެޒުއޭލާގެ ތެޔޮ އުފައްދާ ސަރަހައްދުތަކުން ދިގު މުއްދަތަކަށް ތެޔޮ ނެގުމުގެ ފުރުސަތު އެމެރިކާގެ ކުންފުނިތަކަށް ދިނުމަށާއި، އެމެރިކާއަށް ބޭނުންވާ ސާފުނުކުރާ ތެޔޮ މެދުކެނޑުމެއް ނެތި ލިބޭނެކަން ކަށަވަރު ކުރުމަށްޓަކައި ހަފުތާތަކެއް ވަންދެން ކުރި މަޝްވަރާތަކަށް ފަހުގަ އެވެ.
ވެނެޒުއޭލާގެ އޮފިޝަލުން ތައްޔާރުވަމުންދަނީ އަންނަ ހަފުތާގައި މި އެއްބަސްވުންތަކުގައި ސޮއިކުރުމަށެވެ. މީގެ ދަށުން ތެޔޮ ހޯދުމާއި އުފެއްދުމުގެ އާ ހުއްދަތައް ގިނަ ކުންފުނިތަކަކަށް، ޚާއްސަކޮށް އެމެރިކާގެ ކުންފުނިތަކަށް ދިނުމަށް ވަނީ ހަމަޖެހިފަ އެވެ.
ރޮއިޓާސް ނިއުސް އެޖެންސީއަށް މައުލޫމާތު ދިން މަސްދަރުތަކުން ކުރިން ބުނެފައިވާ ގޮތުގައި، ތެޔޮ އުފައްދާ ސަރަހައްދުތައް އެމެރިކާގެ ކުންފުނިތަކަށް ކުއްޔަށް ދިނުމުގެ ނުވަތަ ނީލަން ކިޔުމުގެ މޮޑެލްއަކަށް ވިސްނާފައިވެ އެވެ. ނަމަވެސް، ވެނެޒުއޭލާގެ ގާނޫނުއަސާސީގެ ދަށުން ތެލުގެ ސިނާއަތުގެ މައިގަނޑު ކަންކަން ދައުލަތުގެ ކޮންޓްރޯލްގެ ދަށުގައި އޮންނަން ޖެހޭތީ، މި އިންތިޒާމަށް ގާނޫނީ ގޮންޖެހުންތަކެއް ކުރިމަތިވުމުގެ ފުރުސަތު އެބައޮތެވެ.
މި އާ އެއްބަސްވުމާއެކު ވެނެޒުއޭލާގެ ތެލުގެ ސިނާއަތުގައި އެމެރިކާގެ ދައުރު ވަރަށް ބޮޑަށް ފުޅާވެގެންދާނެ އެވެ. ޓްރަމްޕް ސަރުކާރުގެ އަމާޒަކީ ވެނެޒުއޭލާގެ ތެޔޮ އުފައްދާ މިންވަރު އިތުރުކޮށް، އެމެރިކާގެ ތެޔޮ ސާފުކުރާ ކާރުޚާނާތަކަށް ބޭނުންވާ ސާފުނުކުރާ ތެޔޮ އިތުރަށް ހޯދުމެވެ. ވެނެޒުއޭލާއަކީ ދުނިޔޭގައި އެންމެ ބޮޑު ތެލުގެ ރިޒާވް އޮތް ގައުމު ކަމަށް ވިޔަސް، އިންވެސްޓްމަންޓްތައް މަދުވުމާއި، މެނޭޖްމަންޓް ގޯސްވުމާއި، އަދި ދަތިކުރުމުގެ ފިޔަވަޅުތަކުގެ ސަބަބުން މިހާރު އެ ގައުމުން އުފައްދަނީ ދުވާލަކު އެންމެ 1.25 މިލިއަން ފީފާ ތެލެވެ. މިއީ އެ ގައުމުގެ ގާބިލިއްޔަތަށް ބަލާއިރު ވަރަށް މަދު މިންވަރެކެވެ.
މި އެއްބަސްވުން ބައްޓަންކޮށްފައިވާ ގޮތާއި، މީގައި ހިމެނޭ ވަކިވަކި ސަރަހައްދުތަކާއި ކުންފުނިތަކުގެ ތަފްސީލެއް ޓްރަމްޕް ހާމައެއް ނުކުރައްވަ އެވެ. އަދި ތެލުގެ ރިޒާވްގެ މެޖޯރިޓީ ކޮންޓްރޯލް އެމެރިކާއިން ބަލަހައްޓާނީ ކިހިނެއް ކަމެއް ވެސް ވިދާޅެއް ނުވެ އެވެ.
ސެކްރެޓަރީ އޮފް ސްޓޭޓް މާކޯ ރޫބިއޯ އެކްސްގައި ކުރެއްވި ޕޯސްޓެއްގައި މި އެއްބަސްވުން ސިފަކުރެއްވީ ދެ ގައުމަށްވެސް ލިބުނު ކާމިޔާބީއެއްގެ ގޮތުގަ އެވެ. އޭނާ ވިދާޅުވީ މީގެ ސަބަބުން އެމެރިކާއަށް އަގުހެޔޮކޮށް އަދި ދާއިމީކޮށް ތެޔޮ ލިބޭނެކަން ކަށަވަރުވެ، ޕެޓްރޯލްގެ އަގު ދަށްކުރުމަށް އެހީތެރިވެދޭނެ ކަމަށެވެ.
ވެނެޒުއޭލާއަށް ބަލާއިރު، މި އެއްބަސްވުމުގެ ސަބަބުން އަމިއްލަ ފަރާތްތަކުން ގާތްގަނޑަކަށް 100 ބިލިއަން ޑޮލަރުގެ އިންވެސްޓްމަންޓް އެ ގައުމަށް ވަންނާނެ ކަމަށް ރޫބިއޯ ވިދާޅުވި އެވެ. އަދި މީގެ ސަބަބުން ބޮޑު މުސާރަ ލިބޭ އެތައް ހާސް ވަޒީފާއެއް އުފެދި، ވެނެޒުއޭލާގެ އިގްތިސާދު އަލުން ބިނާކުރުމަށް މަގުފަހިވާނެ ކަމަށް ވެސް އޭނާ ފާހަގަކުރެއްވި އެވެ.
