އިސްރާއީލްް އާއެކު ގުޅުން ގާއިމުކުރުމަށް، ޓްރަމްޕް ސައުދީ އަށް ޕްރެޝަރު ކުރައްވަނީ

ސައުދީ އަރަބިއްޔާ އާއެކު މަދަނީ ނިއުކްލިއަރ ހަކަތައިގެ އެއްބަސްވުމެއް ގާއިމުކުރުމަށް ބޭނުންވާ ލިޔެކިޔުންތައް އެމެރިކާގެ ޤާނޫނު ހަދާ މަޖިލިސް ނުވަތަ ކޮންގްރެސް އަށް އެ ޤައުމުގެ ރައީސް ޑޮނަލްޑް ޓްރަމްޕް ހުށަހަޅުއްވައިފި އެވެ.

ރޮއިޓާސް ނިއުސް އެޖެންސީ އިން ރިޕޯޓުކޮށްފައިވާ ގޮތުގައި، މި އެއްބަސްވުމަކީ މެދުއިރުމަތީގެ ސަލާމަތާއި ރައްކާތެރިކަމާ ގުޅިފައިވާ މުހިންމު ނިންމުމެކެވެ.

ޓްރަމްޕް ކޮންގްރެސް އަށް ފޮނުއްވި ސިޓީފުޅެއްގައި ވިދާޅުވެފައިވަނީ، ސައުދީ އަރަބިއްޔާ އާއެކު މި އެއްބަސްވުން ކުރިއަށް ގެންދެވޭނީ އެ ޤައުމުން "އަބްރަހަމް އެކޯޑްސް" ނުވަތަ އިސްރާއީލް އާއެކު ގުޅުން ޤާއިމުކުރުމުގެ އެއްބަސްވުމުގައި ބައިވެރިވުމުން ކަމަށެވެ. މިއީ މި އެއްބަސްވުން ތަންފީޒު ކުރުމަށް އެމެރިކާ ސަރުކާރުން ކުރިމަތިކޮށްފައިވާ އެންމެ މުހިންމު ޝަރުތެވެ.

މި އެއްބަސްވުމުގެ ދަށުން ސައުދީ އަރަބިއްޔާ އަށް މަދަނީ ބޭނުންތަކަށް ނިއުކްލިއަރ ހަކަތަ އުފެއްދުމުގެ ފުރުސަތު ލިބިގެންދާނެ އެވެ. ނަމަވެސް، މިކަމުގެ ބަދަލެއްގެ ގޮތުން ސައުދީ އަރަބިއްޔާ އިން އިސްރާއީލް އާއެކު އޮންނަ ގުޅުން ރަސްމީކޮށް، ސަރަހައްދީ ހަމަޖެހުމަށް މަސައްކަތް ކުރަން ޖެހޭނެ ކަމަށް އެމެރިކާގެ ރިޔާސީ ގަނޑުވަރު ވައިޓް ހައުސްގެ ސިޔާސަތުތަކުން ހާމަވެ އެވެ.

އެމެރިކާ ސަރުކާރުން ޤަބޫލުކުރާ ގޮތުގައި މިފަދަ އެއްބަސްވުމެއްގެ ސަބަބުން މެދުއިރުމަތީގެ ޤައުމުތަކުގެ މެދުގައި އޮންނަ ނުތަނަވަސްކަން ކުޑަވެ، އިޤްތިސާދީ އަދި ސިޔާސީ ގުޅުންތައް އިތުރަށް ވަރުގަދަ ވެގެންދާނެ އެވެ. އަދި މިއީ ސައުދީ އަރަބިއްޔާގެ ހަކަތައިގެ ސިޔާސަތަށް ލިބޭނެ ބޮޑު ކުރިއެރުމެއްގެ ގޮތުގައި ވެސް ވަނީ ފާހަގަކޮށްފައި އެވެ.

އެމެރިކާގެ ކޮންގްރެސް އަށް މި އެއްބަސްވުން ހުށަހެޅުމާއެކު، ކުރިއަށް އޮތް ދުވަސްތަކުގައި މެންބަރުން މިކަމާ މެދު ބަހުސްކޮށް ގޮތްތަކެއް ނިންމާނެ އެވެ. މި އެއްބަސްވުމަކީ ޓްރަމްޕްގެ ސަރުކާރުން މެދުއިރުމަތީގައި ގެންގުޅޭ ޚާއްސަ ޚާރިޖީ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ.

އަބްރަހަމް އެކޯޑްސް އަކީ މީގެ ކުރިން ވެސް މެދުއިރުމަތީގެ ބައެއް ޤައުމުތަކުން އިސްރާއީލް އާއެކު ގުޅުން ގާއިމުކުރުމަށް ސޮއިކޮށްފައިވާ އެއްބަސްވުމެކެވެ. ސައުދީ އަރަބިއްޔާ ފަދަ ނުފޫޒު ގަދަ ޤައުމަކުން މި އެއްބަސްވުމުގައި ބައިވެރިވުމަކީ، މުޅި ސަރަހައްދުގެ ސިޔާސީ މަސްރަހަށް ބޮޑެތި ބަދަލުތަކެއް އަންނާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.