އިންފަންޓީނޯގެ ޕްލޭން އަށް ފާޑު ކިޔާފައިވާ ފީފާގެ ސީއޯއޯ މަގާމުން ވަކިކޮށްފި
18 އޯގަސްޓު 2026 | އަންގާރަ 07:03ފީފާގެ ތަރުޖަމާނަކު ނެރުނު ބަޔާނެއްގައި ބުނީ ފީފާ އާއި ކެވިން ލަމޯރުއާ ދެމެދުގައި އޮތް ވަޒީފާގެ އެއްބަސްވުން އޮގަސްޓު މަހުގެ 17 ވަނަ ދުވަހުން ފެށިގެން ނިމިފައިވާ ކަމަށް. މީގެ ދެ އަހަރު ކުރިން ފީފާގެ ސީއޯއޯގެ މަގާމަށް ވަޑައިގެން، އޭނާ ކޮށްދެއްވާފައިވާ ޚިދުމަތްތަކަށް ޝުކުރު އަދާ ކުރާ ކަމަށް ވެސް އެ ބަޔާނުގައި ވަނީ ބުނެފައި
ފީފާގެ ރައީސް އިންފަންޓީނޯ އާއި ފީފާގެ ޗީފް އޮޕަރޭޓިން އޮފިސަރުގެ މަގާމުގައި ހުންނެވި ކެވިން ލަމޯރު | ސޯޝަލް މީޑިއާ
ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ގެންގުޅުއްވި ޕްލޭން އަށް ފާޑު ވިދާޅުވި ފީފާގެ ޗީފް އޮޕަރޭޓިން އޮފިސަރުގެ މަގާމުގައި ހުންނެވި ކެވިން ލަމޯރު މަގާމުން ވަކިކޮށްފި އެވެ.
ފީފާގެ ތަރުޖަމާނަކު ނެރުނު ބަޔާނެއްގައި ބުނީ ފީފާ އާއި ކެވިން ލަމޯރުއާ ދެމެދުގައި އޮތް ވަޒީފާގެ އެއްބަސްވުން އޮގަސްޓު މަހުގެ 17 ވަނަ ދުވަހުން ފެށިގެން ނިމިފައިވާ ކަމަށެވެ. އަދި މީގެ ދެ އަހަރު ކުރިން ފީފާގެ ސީއޯއޯގެ މަގާމަށް ވަޑައިގެން، އޭނާ ކޮށްދެއްވާފައިވާ ޚިދުމަތްތަކަށް ޝުކުރު އަދާ ކުރާ ކަމަށް ވެސް އެ ބަޔާނުގައި ވަނީ ބުނެފައި އެވެ.
ފީފާގެ ސެކްރެޓަރީ ޖެނެރަލް މަޓިއާސް ގްރާފްސްޓްރޯމް ހޯމަ ދުވަހުގެ ރޭ މުވައްޒަފުންނަށް ފޮނުވި އީމެއިލްގައި ބުނެފައި ވަނީ، ފީފާ އާއި ލަމޯރުއާ ދެމެދު އޮތް އެއްބަސްވުން ނިމިފައިވާ ކަމަށާއި ލަމޯރު މިހާރު ފީފާގައި މަސައްކަތް ނުކުރައްވާނެ ކަމަށެވެ.
މިދިޔަ ޖުލައި މަހު ލަމޯރު ވަނީ ފީފާ ފޯވަޑް އެންޓަޕްރައިޒް ޕްލޭން އަކީ އެންމެ މީހެއްގެ ޕްރޮޖެކްޓެއް ކަމަށް ބުނެ ފާޑު ވިދާޅުވެފަ އެވެ. އޭނާ ވިދާޅުވީ ފުޓުބޯޅައިގެ ސިޔާސީ ލީޑަރުން ރަނގަޅު ސުވާލުތައް އަމިއްލަ ނަފުސަށް ކުރުމާއި ރަނގަޅު ނިންމުންތައް ނިންމުމުގެ ވަގުތު އައިސްފައިވާ ކަމަށެވެ.
ލަމޯރު ވިދާޅުވި އެ ޕްރޮޖެކްޓާ ގުޅިގެން ފީފާގެ އިދާރާ އަށް ވެސް ދޮގު ހަދާފައިވާ ކަމަށެވެ. އޭނާ ވިދާޅުވެފައި ވަނީ ފީފާގެ އެތައް ސަތޭކަ މުވައްޒަފުންގެ މަސައްކަތަކީ ފުޓުބޯޅަ އަށް ޚިދުމަތް ކުރުން ކަމަށާއި، ރައީސަކު ކުރަން ޖެހޭނީ މީހުން އެއްކޮށް އެކުވެރި ކުރުން ކަމަަށެވެ. ނަމަވެސް، އޭރު ދިމާވެފައި ވަނީ އެއާ ޚިލާފު ކަމެއް ކަމަށް ވެސް އޭނާ ވިދާޅުވެފައިވެ އެވެ.
ޔުއެފާ ޑެޕިއުޓީ ޖެނަރަލް ސެކްރެޓަރީގެ މަގާމުގައި ހުންނެވުމަށް ފަހު، ފީފާގެ ސީއޯއޯގެ މަގާމަށް ލޯމަރު ވަޑައިގެންފައި ވަނީ 2024 ވަނަ އަހަރުގެ ނޮވެމްބަރު މަހު އެވެ. ލޯމަރު އަކީ ފީފާގެ ރައީސް އިންފަންޓީނޯ އަށް ވުރެ، ދެ ދަރަޖަ ދަށުގެ މަގާމެއްގައި ހުންނެވި ބޭފުޅެކެވެ.
