އިންފަންޓީނޯ އަށް ފާޑުކިޔަނީ ހަސަދަވެރިވާ މީހުން ކަމަށް ޓްރަމްޕްގެ އަރިސް އަދި ވޯލްޑް ކަޕްގެ ޓާސްކްފޯހުގެ އިސްވެރިޔާ ވިދާޅުވެއްޖެ

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އަށް ފާޑު ކިޔާ މީހުން އެކަން ކުރަނީ، ހަސަދަވެރިކަން އޮވެގެން ކަމަށް އެމެރިކާގެ ރައީސް ޑޮނަލްޑް ޓްރަމްޕްގެ އަރިސް ބޭފުޅެއް ކަމަށްވާ އެންޑްރޫ ގިއުލިއާނީ ވިދާޅުވެއްޖެ އެވެ. 

އެމެރިކާގެ ނިއު ޔޯކް ސިޓީގެ ކުރީގެ މޭޔަރު ރޫޑީ ގިއުލިއާނީގެ ދަރިކަލުން، އެންޑްރޫ ގިއުލިއާނީ އަކީ ވޯލްޑް ކަޕަށް ތައްޔާރުވުމުގެ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް އިން އެކުލަވާލާފައިވާ ޓާސްކު ފޯހުގެ އިސްވެރިޔާ އެވެ.

ވޯލްޑް ކަޕުގެ ބައެއް ހިއްސާ ޕްރައިވެޓް އިންވެސްޓަރުންނަށް ވިއްކުމަށް އިންފަންޓީނޯގެ ގެންގުޅުއްވި ޕްލޭންގެ ސަބަބުން އޭނާ އަށް ބޮޑެތި ފާޑުކިޔުންތަކާ ކުރިމަތިލާން ޖެހިފައިވެ އެވެ. އެތައް ބައެއްގެ ފާޑުކިޔުންތަކާ އެކު އެންމެ ފަހުން އިންފަންޓީނޯ ވަނީ އެ ޕްލޭންގެ މަސައްކަތްތައް ހުއްޓާލައްވައިފަ އެވެ. 

އެކަމާ ގުޅޭ ގޮތުން ގިއުލިއާނީ ވިދާޅުވީ، އެ ފާޑުކިޔުންތައް އަމާޒު ކުރަނީ ސިޔާސީ ސަބަބުތަކަށްޓަކައި ކަމަށެވެ. އަދި އެއީ ކުދިކުދި ކަންކަން، ބޮޑު ކޮށްލަން ބޭނުންވާ ބަޔަކު ކުރާ ކަމެއް ކަމަށް ވެސް އޭނާ ވިދާޅުވި އެވެ. 

ގިއުލިއާނީ ދަ އެތުލެޓިކް އަށް ދެއްވި އިންޓަވިއުއެއްގައި ވިދާޅުވީ، މިއީ ސިޔާސީ ކަމެއް ކަމަށާއި، މިފަދަ ކަންކަން ޓްރަމްޕްއާ ދެކޮޅަށް ވެސް މީގެ ކުރިން ކޮށްފައިވާ ކަމަށެވެ. އޭނާ ވިދާޅުވީ ބޮޑެތި ކާމިޔާބީތައް ހޯދާ މީހުންނަށް އެހެން މީހުން ހަސަދަވެރިވާ ކަމަށާއި، އިންފަންޓީނޯ ފީފާ އަށް ހާސިލު ކޮށްދެއްވާފައިވާ ކާމިޔާބީތައް ވަރަށް ބޮޑު ކަމަށެވެ.

ގިއުލިއާނީ އިތުރަށް ވިދާޅުވީ ކުޅިވަރު މިހާރު ވިޔަފާރީއަކަށް ވެފައިވާ ކަމަށާއި، އިންފަންޓީނޯގެ ޖުމުލަ މަސައްކަތްތައް ބަލައި ހުކުމް ކުރަން ޖެހޭ ކަމަށެވެ. އޭނާ ވިދާޅުވީ، އިންފަންޓީނޯ އަބަދުވެސް އޭނާގެ އިދާރާ ރަނގަޅު ކުރެއްވުމަށް މަސައްކަތް ކުރައްވާ ކަމަށާއި، އެއީ ފީފާ އަށް ބޭނުންތެރި ލީޑަރެއް ކަމަށެވެ.

އިންފަންޓީނޯގެ އެ ޕްލޭންގެ ސަބަބުން، އެތައް ބަަޔަކު އަދިވެސް އަންނަނީ އޭނާ އަށް ފާޑުކިޔުން އަމާޒު ކުރަމުންނެވެ.