ޓްރަމްޕްގެ އެކުވެރި އިސްރާއީލް އިން ވެސް، އިންފަންޓީނޯ އަށް ދީފައިވާ ތާއީދު އަނބުރާ ގެންގޮސްފި

ދުނިޔޭގެ ފުޓްބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އަލުން އެ މަޤާމަށް އިންތިޚާބު ކުރުމަށް ކުރިން ދެމުން ދިޔަ ތާއީދު އަނބުރާ ގެންދަން އިސްރާއީލްގެ ފުޓުބޯޅަ އެސޯސިއޭޝަން އިން ނިންމައިފި އެވެ.

އިސްރާއީލް އިން މި ނިންމުން ނިންމާފައިވަނީ ފީފާގެ ޗީފް އޮޕަރޭޓިން އޮފިސަރު ކެވިން ލަމޯ ފީފާގެ ވޯލްޑް ކަޕް ވިއްކާލުމުގެ ޕްލޭން އަށް ފާޑު ވިދާޅުވުމާ ގުޅިގެން، އިންފަންޓީނޯ އޭނާ މަޤާމުން ވަކިކުރެއްވުމުން އުފެދިފައިވާ ނުތަނަވަސްކަމުގެ ތެރޭގައި އެވެ.

އިސްރާއީލްގެ ފުޓުބޯޅަ އެސޯސިއޭޝަން (އައިއެފްއޭ) ގެ ރައީސް މޯޝޭ ޒުއަރޭސް ފީފާ އަށް ފޮނުއްވި ސިޓީއެއްގައި ވިދާޅުވީ، ފީފާގެ ހިންގުމާ މެދު ޔުއެފާ އާއި ފީފާއާ ދެމެދު އުފެދިފައިވާ ޚިޔާލު ތަފާތުވުންތަކުގެ ސަބަބުން އިތުބާރު ގެއްލިފައިވާ ކަމަށެވެ. މިއީ ވަރަށް ފުން އަދި އުސޫލީ މައްސަލައެއް ކަމަށާއި، އެހެންކަމުން އިންފަންޓީނޯ އަށް ކުރިން ދިން ތާއީދު އަނބުރާ ގެންދިޔުން ނޫން ގޮތެއް މިހާރު ނެތް ކަމަށް އޭނާ ވިދާޅުވި އެވެ. އަދި އިސްރާއީލްގެ މި ނިންމުމަކީ އެ ޤައުމުގެ ފުޓުބޯޅަ އެސޯސިއޭޝަންގެ ބޯޑުގެ އިއްތިފާގުން ނިންމި ނިންމުމެކެވެ.

އިސްރާއީލްގެ މި ނިންމުމަކީ އިންފަންޓީނޯ އަށް ލިބިވަޑައިގެންނެވި ބޮޑު ނާކާމިޔާބީއެކެވެ. ޚާއްސަކޮށް ފަލަސްތީން އާއި އިސްރާއީލްގެ ކުޅިވަރުގެ ގުޅުން ރަނގަޅު ކުރުމަށް އޭނާ ކުރައްވަމުން ގެންދަވާ މަސައްކަތްތަކަށް މީގެ ސަބަބުން ހުރަސްތަކެއް އެޅޭނެ އެވެ.

މިދިޔަ އޭޕްރީލް މަހު ބޭއްވި ފީފާ ކޮންގްރެސްގައި ފަލަސްތީން އާއި އިސްރާއީލްގެ ވަފުދު އެކުގައި ފޮޓޯއަކަށް އެރުވުމަށް އިންފަންޓީނޯ ކުރެއްވި މަސައްކަތް ވެސް ވަނީ ނާކާމިޔާބުވެފައި އެވެ. އެ ފަހަރު ފަލަސްތީނު ފުޓުބޯޅަ ފެޑަރޭޝަންގެ ރައީސް ޖިބްރީލް ރަޖޫބް ވަނީ އިސްރާއީލްގެ އޮފިޝަލުންނާ އެކު ފޮޓޯ އަށް އަރަން ދެކޮޅު ހައްދަވާފައި އެވެ.

އިންފަންޓީނޯ އަށް އޮތް ތާއީދު އަނބުރާ ގެންދިޔަ ޤައުމުތަކުގެ ތެރޭގައި އިނގިރޭސިވިލާތް، ވޭލްސް، ސްކޮޓްލެންޑު އަދި އަޔަލެންޑު ހިމެނެ އެވެ. މި ހުރިހާ މައްސަލައެއްގެ އަސްލަކީ ފީފާ ފޯވާޑް އެންޓަޕްރައިޒް (އެފްއެފްއީ) ގެ ނަމުގައި ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ހުށަހެޅުއްވި ހުށަހެޅުމެވެ. މި ހުށަހެޅުމަށް ފާޑު ވިދާޅުވި ކެވިން ލަމޯ މަޤާމުން ވަކިކުރުމުން ގިނަ ބައެއްގެ ފާޑު ކިޔުން ވަނީ އަމާޒުވެފައި އެވެ.

ޔުއެފާގެ ނައިބު ރައީސް ލޯރާ މެކްއަލިސްޓާ ވިދާޅުވީ، ކެވިން ލަމޯ މަޤާމުން ވަކިކުރުމަކީ ފީފާގެ ހިންގުން ބަލިކަށި ވެގެންދާނެ ކަމެއް ކަމަށެވެ. އަދި ފީފާ އަކީ ހަމައެކަނި އެ އިދާރާގެ ރައީސް ނޫން ކަމަށާއި، އެއީ މުޅި ފުޓުބޯޅަ އާއިލާ ކަމަށް އޭނާ ވިދާޅުވި އެވެ. މީގެ އިތުރުން އިނގިރޭސި ޕްރިމިއާ ލީގުގެ ޗީފް އެގްޒެކެޓިވް ރިޗަޑް މާސްޓާސް ވިދާޅުވީ، އިންފަންޓީނޯ ވަނީ ވޯލްޑް ކަޕް ވިއްކާލަން އުޅުމުގެ ތެރެއިން އަމިއްލަ އަށް "ސެލްފް ޑިސްޓްރަކްޓް" ބަޓަން އަށް ފިއްތަވާފައި ކަމަށެވެ.

ފީފާ އަކީ ފައިދާ އަށް މަސައްކަތްކުރާ ކުންފުންޏެއް ނޫން ކަމަށާއި، ވޯލްޑް ކަޕްގެ ހިއްސާ ވިއްކާލުމަކީ ދުވަހަކު ވެސް ކޮށްގެންވާނެ ކަމެއް ނޫން ކަމަށް މާސްޓާސް ފާހަގަ ކުރެއްވި އެވެ. މި މައްސަލައިގައި އިންފަންޓީނޯއާ ދެކޮޅަށް އޮތް ޕްރެޝަރު ކުރިއަށް އޮތް ދުވަސްތަކުގައި އިތުރަށް ބޮޑުވާނެ ކަމަށް ބެލެވެ އެވެ.