ސައުދީގެ ވަލީއަހުދު މުހައްމަދު އާއި ފްރާންސްގެ ރައީސް މެކްރޮންގެ އަރިހުގައި އިންފަންޓީނޯ، އެތައް ބައެއްގެ ސުވާލުތަކެއް!

ފްރާންސް އަށް ކުރައްވަމުން ގެންދަވާ ދަތުރުފުޅުގެ ތެރެއިން ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން އާއި ފްރާންސްގެ ރައީސް އިމަނުއެލް މެކްރޮން އީސްޕޯޓްސް ވޯލްޑް ކަޕް ނިންމުމުގެ ރަސްމިއްޔާތުގައި ބައިވެރިވެ ވަޑައިގެންނެވިއިރު، އަރިހުގައި ފީފާގެ ރައީސް ޖިއާނީ އިންފަންޓީނޯ ހުންނެވުމުން ގިނަ ބައެއްގެ ސަމާލުކަން ލިބިއްޖެ އެވެ. 

ހަތް ހަފުތާގެ ވަރުގަދަ ވާދަކުރުންތަކަކަށް ފަހު، މިއަހަރުގެ އީސްޕޯޓްސް ވޯލްޑް ކަޕްގެ ޗެމްޕިއަންކަން ހޯދީ އޭޖީއޭއެލް އެވެ. އެ ޓީމަށް މުބާރާތުގެ ތަށި ހަވާލު ކޮށްދެއްވީ ފްރާންސްގެ ރައީސް މެކްރޮން އެވެ. މިއީ ސައުދީ އަރަބިއްޔާގެ އިސް ނެގުމުގެ މަތިން، އެ ޤައުމުގައި ބާއްވަން ފެށި ބައިނަލްއަޤުވާމީ ބޮޑު މުބާރާތެކެވެ. 

މި މުބާރާތް އިންތިޒާމުކުރާ ސައުދީގެ ނޮން ޕްރޮފިޓް ޖަމިއްޔާއެއް ކަމަށްވާ އީސްޕޯޓްސް ވޯލްޑް ކަޕް ފައުންޑޭޝަން އިން ބުނި ގޮތުގައި، 2026 ވަނަ އަހަރުގެ މުބާރާތް ބޭއްވުމަށް ފްރާންސްގެ ވެރި ރަށް ޕެރިސް ހޮވީ އެ ސިޓީގެ ވަސީލަތްތައް ތަރައްޤީ ވެފައިވުމާއި، ދަތުރު ފަތުރުގެ ފަސޭހަކަމާއި، ބައިނަލްއަޤުވާމީ ފެންވަރުގެ މުބާރާތެއް ބޭއްވުމަށް އެކަށީގެންވާ ވާދަވެރި މާހައުލެއް އޮތުމުންނެވެ.

މި މުބާާރާތް ނިންމުމުގެ ރަސްމިއްޔާތުގައި ސައުދީގެ ވަލީއަހުދު މުހައްމަދާއި ފްރާންސްގެ ރައީސް މެކްރޮންގެ އަރިހުގައި ފީފާގެ ރައީސް އިންފަންޓީނޯ ބައިވެރިވެވަޑައިގެން ހީ ސަމާސާ ކުރައްވައި ފޮޓޯ ނަންގަވާފައިވާއިރު، ގިނަ ބައެއްގެ ސަމާލުކަން އެކަމަށް ލިބުނެވެ. ވޯލްޑް ކަޕް ހިމެނޭހެން، ފީފާގެ މުބާރާތްތަކުގެ ހިއްސާ ވިއްކާލުމަށް އިންފަންޓީނޯ ގެންގުޅުއްވި ޕްލޭންގެ ސަބަބުން އޭނާ ހޫނު ފެނަށް ވެއްޓިފައިވާއިރު، އެކަމުގައި މެކްރޮން ވެސް މަސައްކަތް ކުރެއްވީ އިންފަންޓީނޯއާ ދެކޮޅަށް ކަމަށް ރިޕޯޓުތައް ބުނެ އެވެ.

މިއަހަރުގެ މުބާރާތް ޕެރިހުގައި ބޭއްވި ނަމަވެސް، އީސްޕޯޓްސް ވޯލްޑް ކަޕްގެ މައި މަރުކަޒެއްގެ ގޮތުގައި ދެމި އޮންނާނީ ސައުދީގެ ވެރި ރަށް ރިޔާޟް އެވެ. މި ފަހަރުގެ މުބާރާތުގައި ދުނިޔޭގެ 100 އަށް ވުރެ ގިނަ ޤައުމުން، 200 ކުލަބަކަށް ނިސްބަތްވާ 2،000 އަށް ވުރެ ގިނަ ކުޅުންތެރިން ވާދަކޮށްފައިވެ އެވެ.

އީސްޕޯޓްސް ވޯލްޑް ކަޕް ފައުންޑޭޝަން އިން ހާމަކޮށްފައިވާ ގޮތުގައި 2027 ވަނަ އަހަރުގެ އީސްޕޯޓްސް ވޯލްޑް ކަޕް ބޭއްވުމަށް ހަމަޖެހިފައިވަނީ ސައުދީ އަރަބިއްޔާގައި އެވެ. މިއީ ދުނިޔޭގެ ކުޅިވަރުގެ ދާއިރާގައި ސައުދީ އިން ހޯދަމުންދާ ކުރިއެރުންތަކުގެ ތެރެއިން ފާހަގަ ކޮށްލެވޭ މުހިންމު ހަރަކާތެކެވެ.