އިންފަންޓީނޯއާ ވާހަކަ ދެއްކުން ހުއްޓާލައިފިން، ފީފާގެ ރައީސް ކަމަށް ޝައުޤުވެރިކަމެއް ނެތް: ޗެފެރިން
24 އޯގަސްޓު 2026 | ހޯމަ 07:46އުމުރުން 58 އަހަރުގެ ޗެފެރިން ވިދާޅުވީ، އެއް ސަބަބަކީ އޭނާ ޔުއެފާ އަށް ލޯބި ކުރެއްވުން ކަމަށާއި ޔުއެފާގައި މަސައްކަތް ކުރެއްވުން މާބޮޑަށް ވެސް ކަމުދާ ކަމަށް. އަދި ހަޔާތުގައި އުފަލާއި މަޖާ ކުރުމަށް ވެސް ވަގުތު ހޯއްދަވަން ޖެހޭ ކަމަށް ޗެފެރިން ވިދާޅުވި. ދެ ވަނަ ސަބަބެއްގެ ގޮތުގައި ޗެފެރިން ވިދާޅުވީ، ފީފާގެ ރައީސް ކަމުގެ މަޤާމަށް އެއްވެސް ޝައުޤުވެރިކަމެއް ނެތުން ކަމަށް
ފީފާގެ ރައީސް އިންފަންޓީނޯ އާއި ޔުއެފާގެ ރައީސް ޗެފެރިން | ދި ޓަައިމްސް
ފީފާގެ ރައީސް ޖިއާނީ އިންފަންޓީނޯއާ ވާހަކަ ދެއްކުން ހުއްޓާލައްވާފައިވާ ކަމަށާއި، ފީފާގެ ރައީސްކަމުގެ މަޤާމަށް އެއްވެސް ޝައުޤުވެރިކަމެއް ނެތް ކަމަށް ޔުއެފާގެ ރައީސް އެލެކްސެންޑަރ ޗެފެރިން ވިދާޅުވެއްޖެ އެވެ.
ހޯމަ ދުވަހު ދަ ރެސްޓް އިޒް ޕޮލިޓިކްސް ޕޮޑްކާސްޓުގައި ވާހަކަ ދައްކަވަމުން ޗެފެރިން ވިދާޅުވީ، ފީފާގެ ރައީސް ކަމަށް ކުރިމަތިލައްވަން ބޭނުން ނުވަނީ ދެ ސަބަބަކާ ހުރެ ކަމަށެވެ.
އުމުރުން 58 އަހަރުގެ ޗެފެރިން ވިދާޅުވީ، އެއް ސަބަބަކީ އޭނާ ޔުއެފާ އަށް ލޯބި ކުރެއްވުން ކަމަށާއި، ޔުއެފާގައި މަސައްކަތް ކުރެއްވުން މާބޮޑަށް ވެސް ކަމުދާ ކަމަށެވެ. އަދި ހަޔާތުގައި އުފަލާއި، މަޖާ ކުރުމަށް ވެސް ވަގުތު ހޯއްދަވަން ޖެހޭ ކަމަށް ޗެފެރިން ވިދާޅުވި އެވެ. ދެ ވަނަ ސަބަބެއްގެ ގޮތުގައި ޗެފެރިން ވިދާޅުވީ، ފީފާގެ ރައީސް ކަމުގެ މަޤާމަށް އެއްވެސް ޝައުޤުވެރިކަމެއް ނެތުން ކަމަށެވެ.
ފީފާގެ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ގެންގުޅުއްވި ޕްލޭންގެ ސަބަބުން، ޔުއެފާ އާއި ފީފާގެ ގުޅުން ގޯސްވެ، ވޯލްޑް ކަޕް ބޮއިކޮޓް ކުރުމަށް ޔުއެފާ އިން ވަނީ ނިންމައިފަ އެވެ. އޭގެ ފަހުން އިންފަންޓީނޯ އަށް ދެމުން އައި ތާއީދު އަނބުރާ ގެންދަން ބައެއް ފެޑެރޭޝަންތަކުން ވަނީ ނިންމައިފަ އެވެ.
އަންނަ އަހަރު މޮރޮކޯގައި ބާއްވާ ފީފާގެ ކޮންގްރެސްގައި އަލުން ރައީސް ކަމަށް ވަޑައިގަންނަވަން ބޭނުން ނަމަ، އިންފަންޓީނޯ އަށް ޖެހޭނީ މަޤާމުން އިސްތިއުފާ ދެއްވަން ކަމަށް ވެސް ޗެފެރިން ވަނީ ވިދާޅުވެފައި އެވެ. އެހެން ނޫން ނަމަ، ލީޑާޝިޕްގެ ޗެލެންޖަކާ ކުތިމަތިލާން ޖެހޭނެ ކަމަށް ޗެފެރިން ޤަބޫލު ކުރައްވަ އެވެ.
މީގެ އިތުރުން ޗެފެރިން ވިދާޅުވެފައި ވަނީ، މި މައްސަލަ ފެށުނީއްސުރެ ފެށިގެން އިންފަންޓީނޯއާ ވާހަކަ ނުދައްކަވާ ކަމަށެވެ. އިންފަންޓީނޯ އަށް މާ ގިނަ އޮޕްޝަންތަކެއް ނެތް ކަމަށް ޗެފެރިން ވަނީ ފާހަގަ ކުރައްވައިފަ އެވެ. ފުރަތަމަ އޮޕްޝަން އަކީ ތާއީދު ނެތް ކަމަށް އިންފަންޓީނޯ އަމިއްލަ އަށް ޤަބޫލު ކުރެއްވުމެވެ. ދެ ވަނަ އޮޕްޝަން އަކީ މާޗު މަހު އިންތިޚާބުގައި ވާދަ ކުރެއްވުން ކަމަށާއި، ނަމަވެސް އެ ހާލަތުގައި އިންފަންޓީނޯއާ ދެކޮޅަށް ނުކުންނާނެ ކެންޑިޑޭޓަކު ހުންނާނެ ކަަމަށް ޗެފެރިން ވަނީ ވިދާޅުވެފައި އެވެ.
މި މައްސަލައިގައި ޔުއެފާ އިން ގެންގުޅޭ ސްޓޭންޑަށް އޭޝިއާގެ އޭއެފްސީ އާއި އުތުރު އަދި މެދު އެމެރިކާ އަދި ކެރީބިއަންގެ ކޮންކަކާފް އިން ތާއީދު ކުރެ އެވެ.
