އޮގަސްޓްގައި އިސްރާއީލުގެ 5،209 ވަޒަންވެރިން އަލްއަޤްޞާ މިސްކިތަށް ވަދެގަތް

ފަލަސްތީނުގެ ބިންތައް އިސްތިއުމާރު ކޮށްފައިވާ އިސްރާއީލުގެ ވަޒަންވެރިންގެ 5،209 މީހުން އޮގަސްޓް މަހު އަލްއަޤްޞާ މިސްކިތުގެ ހަރަމްފުޅަށް ވަދެގަނެފައިވާ ކަމަށާއި، އެ މުއްދަތުގެ ތެރޭގައި އިސްރާއީލު ސިފައިން ފަލަސްތީނުގެ ދެ މީހަކު ޝަހީދުކޮށްލައި، ފަސް ކުޑަކުދިން ހިމެނޭހެން 114 މީހަކު ހައްޔަރުކޮށްފައިވާ ކަމަށް ފަލަސްތީނުގެ ގުދުސް ގަވަރްނަރޭޓުން ހާމަކޮށްފި އެވެ. އެ އިދާރާއިން ނެރުނު އޮގަސްޓް މަހު ރިޕޯޓުގައި ބަޔާންކޮށްފައިވާ ގޮތުގައި، އެ މަހުގެ ތެރޭގައި އިސްރާއީލު ފުލުހުންގެ ސީދާ ރައްކާތެރިކަމުގެ ދަށުން، އިސްރާއީލުގެ ވަޒަންވެރިން ވަނީ އަލްއަޤްޞާ މިސްކިތުގެ ހަރަމްފުޅުގެ އެތެރެއަށާއި މިސްކިތުގެ ދޮރުތައް ކައިރިއަށް ވަދެގަނެ، ޔަހޫދީ ދީނީ އަޅުކަންތައް ކުރިއަށްވުރެ ބޮޑަށް އިތުރުކޮށްފަ އެވެ.

ގުދުސް ގަވަރްނަރޭޓުން ހާމަކުރި ގޮތުގައި، އޮގަސްޓް މަހުގެ ތެރޭގައި އިސްރާއީލުގެ ވަޒަންވެރިން އަލްއަޤްޞާ މިސްކިތަށް ވަދެގަތް 5،209 ހާދިސާއެއް ރެކޯޑުކުރެވިފައިވާއިރު، އެންމެ ގިނަ އަދަދަކަށް މީހުން ވަދެގަނެފައި ވަނީ އޮގަސްޓް 13 ވަނަ ދުވަހު އެވެ. އެ ދުވަހު އެކަނި ވެސް 751 މީހުން ވަނީ މިސްކިތުގެ ހަރަމްފުޅަށް ވަދެގަނެފަ އެވެ. މީގެ އިތުރުން، ފަލަސްތީނުގެ ރައްޔިތުން އަލްއަޤްޞާ މިސްކިތަށް ވަނުމަށް ހުރަސްއަޅައި، އިސްރާއީލުގެ ކަމާބެހޭ ފަރާތްތަކުން ފަސް އަމުރެއް ނެރެފައިވާ ކަމަށް ވެސް އެ ރިޕޯޓުގައިވެ އެވެ.

އިސްރާއީލު ފުލުހުން ގެންދަނީ 2003 ވަނަ އަހަރުން ފެށިގެން އިސްރާއީލުގެ ވަޒަންވެރިންނަށް އަލްއަޤްޞާ މިސްކިތުގެ ހަރަމްފުޅަށް ވަނުމުގެ ހުއްދަ ދެމުންނެވެ. ނަމަވެސް، ގުދުސްގެ އިސްލާމިކް ވަޤްފް ޑިޕާޓްމަންޓުން ތަކުރާރުކޮށް ބުނަމުން ދަނީ އަލްއަޤްޞާ މިސްކިތަކީ ހަމައެކަނި މުސްލިމުންގެ މުޤައްދަސް ބިނާއެއް ކަމަށެވެ. އަދި، އެ ތަނަށް ވަދެގަތުން ހުއްޓާލުމަށް އެ އިދާރާއިން ވަނީ އެތައް ފަހަރަކު ގޮވާލާފަ އެވެ.

އިސްރާއީލު ސިފައިން ގުދުސްގައި ހިންގާފައިވާ ލާއިންސާނީ އަމަލުތަކަށް ބަލާއިރު، އޮގަސްޓް މަހުގެ ތެރޭގައި އެ މީހުން ވަނީ ފަލަސްތީނުގެ ދެ މީހަކު ޝަހީދުކޮށްލައި، 83 މީހަކު ޒަޚަމްކޮށްލާފަ އެވެ. އަދި، ފަސް ކުޑަކުދިން ހިމެނޭހެން 114 މީހަކު ވަނީ ހައްޔަރުކޮށްފަ އެވެ. މީގެ އިތުރުން، ފަލަސްތީނުގެ ރައްޔިތުންނަށާއި އެ މީހުންގެ މުދަލަށް އަމާޒުކޮށް އިސްރާއީލުގެ ވަޒަންވެރިން ދީފައިވާ 44 ހަމަލާއެއް ގުދުސް ގަވަރްނަރޭޓުން ވަނީ ޑޮކިއުމަންޓްކޮށްފަ އެވެ. ހަމައެއާއެކު، ގުދުސްގައި ހުރި ފަލަސްތީނު މީހުންގެ ގެދޮރާއި ބިނާތައް ތަޅާލުމުގެ 40 އޮޕަރޭޝަނެއް ހިންގާފައިވާއިރު، އިތުރު 86 ތަނެއް ތަޅާލުމަށް ނުވަތަ އިމާރާތްކުރުމުގެ މަސައްކަތް ހުއްޓާލުމަށް އަމުރު ނެރެފައިވާ ކަމަށް ވެސް އެ އިދާރާއިން ބުނެ އެވެ.

މި ހަމަނުޖެހުންތައް އިތުރުވެފައި މި ވަނީ، އަންނަ އޮކްޓޯބަރު މަހުގެ 27 ވަނަ ދުވަހު ބޭއްވުމަށް ހަމަޖެހިފައިވާ ކްނެސެޓްގެ (އިސްރާއީލުގެ ޤާނޫނުހަދާ މަޖިލިސް) އިންތިޚާބާ ދިމާކޮށް، ހަރުކަށި ފިކުރުގެ ޕާޓީތަކުގެ ރުހުން ހޯދުމަށް ޓަކައި ބޮޑުވަޒީރު ބެންޖަމިން ނަތަންޔާހޫ މަސްރަހު ގޯސްކުރަން މަސައްކަތް ކުރަމުންދާ ކަމަށް އިސްރާއީލުގެ މީޑިއާތަކުން ރިޕޯޓުކުރަމުންދާ ދަނޑިވަޅެއްގަ އެވެ.

ފަލަސްތީނުން ތުހުމަތުކުރާ ގޮތުގައި، އިސްރާއީލުން ގެންދަނީ އަލްއަޤްޞާ މިސްކިތް ހިމެނޭހެން އިސްތިއުމާރުކޮށްފައިވާ ގުދުސްއަކީ ޔަހޫދީ ތަނަކަށް ހެދުމަށާއި، އެ ރަށުގެ އަރަބި އަދި އިސްލާމީ ވަންތަކަން ފޮހެލުމަށް ހީލަތްތެރި ޖަރީމާތަކެއް ހިންގަމުންނެވެ. ފަލަސްތީނުގެ ރައްޔިތުން އަބަދު ވެސް ގަބޫލުކުރާ ގޮތުގައި، އެ މީހުން އުއްމީދުކުރާ މިނިވަން ދައުލަތުގެ ވެރިރަށަކީ އިރުމަތީ ގުދުސްއެވެ.

2023 ވަނަ އަހަރުގެ އޮކްޓޯބަރު މަހު އިސްރާއީލުން ޣައްޒާގައި ގަތުލުއަންމެއް ފަށައި ދޭން ފެށި ލާއިންސާނީ ހަމަލާތަކާއި ނަސްލު ނައްތާލުމުގެ އަމަލުތަކާ ގުޅިގެން، އިސްތިއުމާރުކޮށްފައިވާ ހުޅަނގު އައްސޭރީގެ ރަށްތަކާއި ރެފިއުޖީ ކޭމްޕުތަކަށް އިސްރާއީލު ސިފައިން ވަދެގަތުމާއި، މީހުން ހައްޔަރުކުރުން ވަނީ ވަރަށް ބޮޑަށް އިތުރުވެފަ އެވެ. އަދި، ފަލަސްތީނުގެ ރައްޔިތުންނަށާއި އެ މީހުންގެ މުދަލަށް އަމާޒުކޮށް އިސްރާއީލުގެ ވަޒަންވެރިން ދޭ ހަމަލާތައް ވެސް މި މުއްދަތުގައި ވަނީ އިންތިހާއަށް އިތުރުވެފަ އެވެ.