އިސްރާއީލުން ދިން ވައިގެ ހަމަލާއެއްގައި ހުޅަނގުއައްސޭރީގައި ތިން މީހަކު މަރުވެއްޖެ
29 އޯގަސްޓު 2026 | ހޮނިހިރު 08:29ހުޅަނގު އައްސޭރީގެ ޖެނީންގައި އިސްރާއީލުން ދިން ޑްރޯން ހަމަލާއެއްގައި އިސްލާމިކް ޖިހާދުގެ އިސް އޮޕަރޭޓިވްއަކު މަރާލާފައިވާއިރު، އެ ސަރަހައްދުގައި އިސްރާއީލުގެ އަސްކަރީ ހަރަކާތްތަކާއި ވަޒަންވެރިންގެ ހަމަލާތައް ވަނީ ވަރަށް ބޮޑަށް އިތުރުވެފައި. މީގެ އިތުރުން ޣައްޒާއަށް ދިން އެކި ހަމަލާތަކުގައި އެއް އާއިލާއެއްގެ ތިން މީހުން ހިމެނޭހެން ފަސް މީހަކު މަރުވެފައިވާ ކަމަށް ފަލަސްތީނުގެ ސިއްހީ އިދާރާތަކުން ބުނޭ
އިސްރާއީލުން ހިފާފައިވާ ހުޅަނގު އައްސޭރީގެ ޖެނިންއަށް، 2026 އޯގަސްޓް 28 ވަނަ ދުވަހު އިސްރާއީލު ސިފައިން ދިން ވައިގެ ހަމަލާތަކަކަށްފަހު، އެ ސިޓީގެ އިމާރާތެއްގެ ކައިރީގައި އިސްރާއީލުގެ އަސްކަރީ ފައުޖުތަކުން ހަރަކާތްތެރިވަނީ | ރޮއިޓާސް
އިސްރާއީލުން ހިފާފައިވާ ފަލަސްތީނުގެ ހުޅަނގު އައްސޭރިއަށް ހުކުރު ދުވަހު ދިން ވައިގެ ހަމަލާއެއްގައި، ހަމާސް ޖަމާއަތުގެ ހަނގުރާމަވެރިއަކާއި އޭނާއަށް އެހީތެރިވި އިތުރު ދެ މީހަކު މަރާލާފައިވާ ކަމަށް އިސްރާއީލު ސިފައިން ބުނެފި އެވެ. މިއީ ހުޅަނގު އައްސޭރީގައި އިސްރާއީލުން ވައިގެ މަގުން މިފަދަ ނުރައްކާތެރި ހަމަލާއެއް ދިން މަދު ފަހަރުތަކުގެ ތެރެއިން ފަހަރެކެވެ.
ހުޅަނގު އައްސޭރީގެ އުތުރުގައި އޮންނަ ޖެނީން ސަރަހައްދުގައި ދުއްވާފައި ދިޔަ ކާރަކަށް އަމާޒުކޮށް ދިން މި ހަމަލާ ހަމާސް ޖަމާއަތުން ކުށްވެރިކުރި ނަމަވެސް، އިސްރާއީލުން ގާއިސް ބިތާވީގެ ނަމުން ނަންދީފައިވާ އެ މީހާއަކީ އެ ޖަމާއަތުގެ މެންބަރެއް ކަމަކަށް ބުނެފައެއް ނުވެ އެވެ. އިސްރާއީލު ސިފައިންނާއި މެޑިކަލް ޓީމުތަކުން ވަނީ މި ހަމަލާ އަމާޒުކުރީ ޖެނީން ސަރަހައްދަށް ކަން ކަށަވަރުކޮށްދީފަ އެވެ.
އިސްލާމިކް ޖިހާދު ޖަމާއަތުން ނެރުނު ބަޔާނެއްގައި ބުނެފައިވަނީ، ބިތާވީއަކީ އެ ޖަމާއަތުގެ އަސްކަރީ ގަފިލާގެ އިސް އޮޕަރޭޓިވްއެއް ކަމަށެވެ.
ހުޅަނގު އައްސޭރީގައި އިސްރާއީލުގެ ހަރުކަށި ވަޒަންވެރިން ފަލަސްތީނު މީހުންނަށް ދޭ ހަމަލާތަކާއި، އިސްރާއީލު ސިފައިން ފަލަސްތީނުގެ އަވަށްތަކަށް އަރައި ހިންގާ އޮޕަރޭޝަންތައް ވަނީ ފަހަކަށް އައިސް ވަރަށް ބޮޑަށް އިތުރުވެފަ އެވެ. ޖެނީން ހިމެނޭ ހުޅަނގު އައްސޭރީގެ އުތުރު ސަރަހައްދަކީ މިދިޔަ އަހަރު އިސްރާއީލުން ބޮޑު އަސްކަރީ އޮޕަރޭޝަނެއް ހިންގި ސަރަހައްދެކެވެ. އިސްރާއީލުން ބުނާ ގޮތުގައި އެ އޮޕަރޭޝަނަކީ ހަނގުރާމަވެރިންގެ މަރުކަޒުތައް ނައްތާލުމަށް ހިންގި އޮޕަރޭޝަނެކެވެ.
އިސްރާއީލު ސިފައިން ނެރުނު ބަޔާނެއްގައި ބުނެފައިވަނީ، ބިތާވީއަކީ އިސްރާއީލުގެ އާންމުންނާއި ސަލާމަތީ ބާރުތަކަށް އަމާޒުކޮށް ދޭ ހަމަލާތައް ރޭވުމާއި، އެކަމަށް ފައިސާ ހޯދުމާއި، ހަމަލާތައް ތަންފީޒުކުރުމުގައި އިސްކޮށް އުޅުނު މީހެއް ކަމަށެވެ. އަދި އޭނާއަކީ ޣައްޒާގައި ތިބޭ ހަމާސްގެ މެންބަރުންނާއި، ގައުމުން ބޭރުގައި ތިބޭ އެ ޖަމާއަތުގެ މީހުންނާ ގާތް ގުޅުމެއް ބޭއްވި މީހެއް ކަމަށްވެސް އެ ބަޔާނުގައިވެ އެވެ.
ފަލަސްތީނުގެ ރެޑް ކްރެސެންޓް އެމްބިއުލާންސް ސާވިސްއިން ބުނި ގޮތުގައި، ޑްރޯން ހަމަލާ ދިން ސަރަހައްދަށް އިސްރާއީލުގެ އެއްގަމު ސިފައިން އަރައި، އެތަނުގައި ތިބި ސިއްހީ އެހީތެރިން ކުޑަވަގުތުކޮޅަކަށް ހިފަހައްޓައި، ހަމަލާގައި ޒަޚަމްވި މީހުންނާއި މަރުވި މީހުން ހޮސްޕިޓަލަށް ގެންދިއުމަށް ހުރަސްއަޅާފައިވެ އެވެ.
2025 ވަނަ އަހަރު ހުޅަނގު އައްސޭރީގެ އުތުރުގައި އިސްރާއީލުން ހިންގި އަސްކަރީ އޮޕަރޭޝަންތަކުގެ ސަބަބުން އެތައް ހާސް ފަލަސްތީނު ރައްޔިތުންނަށް ވަނީ އެމީހުންގެ ގެދޮރު ދޫކޮށް ދާން މަޖުބޫރުވެފަ އެވެ. އެ އޮޕަރޭޝަންތަކުގައި އިސްރާއީލު ސިފައިން ވަނީ ރެފިއުޖީ ކޭމްޕުތައް ހުސްކޮށް، ފާއިތުވި އެތައް އަހަރެއްގެ ތެރޭގައި ހުޅަނގު އައްސޭރީގެ ސިޓީތަކުގައި ސިފައިން އެންމެ ގިނަ ދުވަހު މަޑުކުރި ފަހަރަށް އެ ފަހަރު ވެފަ އެވެ.
ހިއުމަން ރައިޓްސް ވޮޗުން ވަނީ އިސްރާއީލުން މީހުން މަޖުބޫރުން ބޭރުކުރަމުންދާ ކަމަށް ބުނެ، އެ ގައުމުން ހަނގުރާމައިގެ ކުށްތަކާއި އިންސާނިއްޔަތާ ޚިލާފު ޖަރީމާތައް ހިންގަމުންދާ ކަމަށް ތުހުމަތުކޮށްފަ އެވެ. ނަމަވެސް އިސްރާއީލުން އެފަދަ ކުށްތަކަށް އިންކާރު ކުރެ އެވެ.
ޣައްޒާގައި ހަމާސްގެ ހަނގުރާމަވެރިން ހަތިޔާރު ބެހެއްޓުމުގެ ބަދަލުގައި އިސްރާއީލު ސިފައިން އެ ސަރަހައްދުން ފޭބުމަށް އެމެރިކާއިން އިސްވެ އެއްބަސްވުމެއް ގާއިމުކުރުމަށް މަސައްކަތް ކުރަމުންދަނިކޮށް، ހުކުރު ދުވަހު އިސްރާއީލުން ދިން ތިން ހަމަލާއެއްގައި މަދުވެގެން ފަސް ފަލަސްތީނު މީހުން މަރުވެފައިވާ ކަމަށް ޣައްޒާގެ ސިއްހީ އޮފިޝަލުން ބުނެ އެވެ.
ސިއްހީ އޮފިޝަލުން މައުލޫމާތު ދޭ ގޮތުގައި، މި ހަމަލާތަކުގެ ތެރޭގައި ދީރުލް ބަލާހް ކައިރިއަށް ދިން ހަމަލާއެއްގައި އެއް އާއިލާއެއްގެ ތިން މީހަކު މަރުވުމާއި، ޣައްޒާ ސިޓީގައި ސައިކަލަކަށް ދިން ހަމަލާއެއްގައި އެކަކު މަރުވުމުގެ އިތުރުން، އެ ސިޓީގެ އެހެން ސަރަހައްދަކަށް ދިން ހަމަލާއެއްގައި އިތުރު ފަލަސްތީނު މީހަކު މަރުވުން ހިމެނެ އެވެ.
މި ހަމަލާތަކާ ގުޅޭގޮތުން އިސްރާއީލު ސިފައިން ވަގުތުން އެއްވެސް ކޮމެންޓެއް ދީފައެއް ނުވެ އެވެ.
މަސްދަރު: ރޮއިޓާސް
