ނަތަންޔާހޫގެ ދަރިފުޅުގެ ފުރާނައަށް ނުރައްކާއޮތް ކަމަށް ބުނެ އެމެރިކާއިން ކުއްލިގޮތަކަށް ސިއްރުން ބޭރުކޮށްފި

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ދޮށީ ދަރިފުޅު ޔައީރު ނަތަންޔާހޫގެ ފުރާނައަށް "ނުރައްކާތެރި އިންޒާރެއް" ލިބުމާ ގުޅިގެން، އެ ގައުމުގެ ސަލާމަތީ އިދާރާ ކަމަށްވާ ޝިން ބެޓް އިން އޭނާ ސިއްރުން އެމެރިކާއިން ބޭރުކޮށްފި އެވެ.

މިކަން ހާމަވެފައި މިވަނީ، އީރާނުން އޭނާގެ ދަރިންގެ ތެރެއިން އެކަކު "މަރާލަން މަސައްކަތް ކުރި" ކަމަށް ބޮޑުވަޒީރު ނަތަންޔާހޫ އިސްރާއީލުގެ ޗެނަލް 14 އަށް ދެއްވި ފޯނު އިންޓަވިއުއެއްގައި ވިދާޅުވިތާ މަދު ދުވަސްކޮޅެއްގެ ތެރޭގަ އެވެ. ނަމަވެސް އެއީ ކޮން ދަރިއެއްކަން ނުވަތަ އެ ރޭވުމުގެ ތަފްސީލެއް އޭރު އޭނާ ހާމަކުރައްވާފައެއް ނުވެ އެވެ.

ޔައީރު ނަތަންޔާހޫއަށް ގެއްލުން ދިނުމަށް ނުރައްކާތެރި ރޭވުމެއް އޮތްކަން ފާހަގަކުރެވިފައިވާ ކަމަށާއި، އެކަމާ ގުޅިގެން ހާލަތު ވަޒަންކުރުމަށްފަހު، އޭނާއާއި އޭނާގެ ސަލާމަތީ ޓީމު ކުއްލި ގޮތަކަށް އަނބުރާ އިސްރާއީލަށް ގެނައުމަށް ނިންމީ ކަމަށް ޝިން ބެޓް އިން ހޮނިހިރު ދުވަހު ނެރުނު ބަޔާނެއްގައި ބުނެފައިވެ އެވެ. ނަމަވެސް އެއީ ކޮން ކަހަލަ ނުރައްކަލެއް ކަމެއް ނުވަތަ އެ އޮޕަރޭޝަން ހިންގީ ސީދާ ކޮން ތާރީޚެއްގައި ކަމެއް އެ އިދާރާއަކުން ހާމައެއް ނުކުރެ އެވެ.

އެމެރިކާގެ ގާނޫނު ތަންފީޒުކުރާ އިދާރާއެއްގެ މަސްދަރަކާ ހަވާލާދީ ނިއުސްމެކްސް އިން ބުދަ ދުވަހު ރިޕޯޓުކޮށްފައިވާ ގޮތުގައި، ޔައީރާ ދެކޮޅަށް ރާވަމުންދިޔަ ރޭވުމެއް އިސްރާއީލުގެ ޖާސޫސީ އިދާރާއަށް ފަހުމްވީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ.

އިސްރާއީލުގެ ޗެނަލް 12 އިން ރިޕޯޓުކޮށްފައިވާ ގޮތުގައި، މި އޮޕަރޭޝަން ކުރިއަށް ގެންދިއުމަށްޓަކައި ޝިން ބެޓް އިން ވަނީ އެ ވަގުތު ނިއުޔޯކްގައި އިސްރާއީލުގެ ރައީސް އައިޒަކް ހަރްޒޮގްގެ ސަލާމަތީ ކަންކަން ބަލަހައްޓަމުންދިޔަ އެޖެންޓުން އެ މަސައްކަތުން ވަކިކޮށް، ޔައީރު ސަލާމަތްކުރުމުގެ މަސައްކަތަށް ނެރެފަ އެވެ.

އީރާނުގެ އެޖެންޓުން ޔައީރު ދިރިއުޅޭ ތަނާއި އޭނާގެ ހަރަކާތްތައް މޮނިޓަރު ކުރަމުންދިޔަ ކަމަށް ތުހުމަތު ކުރެވެ އެވެ. އެމެރިކާގައި އަރާމު ދިރިއުޅުމެއް އުޅެމުންދިޔަ ޔައީރަށް، އޭނާގެ އަމިއްލަ ސާމާނުތައްވެސް ގެންދަން ފުރުސަތު ނުލިބި، ވަގުތުން އެ ގައުމުން ފުރައިގެން އިސްރާއީލަށް ދިއުމަށް ވަނީ އަމުރުކޮށްފަ އެވެ.

ޔައީރު ގައުމުން ބޭރުގައި ގިނަ ދުވަސްތަކެއް ވަންދެން ހުރުމުން އިސްރާއީލުގެ އާންމުންގެ ފާޑުކިޔުން އޭނާއަށް ވަނީ އަމާޒުވެފަ އެވެ. ޚާއްސަކޮށް 2023 ވަނަ އަހަރުގެ އޮކްޓޫބަރު މަހު ހަމާސް އިން ދިން ހަމަލާއާ ގުޅިގެން، އިސްރާއީލުގެ އެތައް ލައްކަ ރިޒާވް ސިފައިންނެއް ޣައްޒާގެ ހަނގުރާމައަށް ނެރެފައިވާއިރު، އޭނާ ގައުމުން ބޭރުގައި ހުރުމުން ގިނަ ބަޔަކު ވަނީ ސުވާލު އުފައްދާފަ އެވެ.

މީގެ އިތުރުން، މިދިޔަ ޖުލައި މަހު ނަތަންޔާހޫގެ އަނބިކަނބަލުން ސާރާ އާއި އެ ދެމަފިރިންގެ ދެ ދަރިންނަށް ދައުލަތުގެ ޚަރަދުގައި ދޭ ސަލާމަތީ ރައްކާތެރިކަން އިތުރުކުރުމާ ގުޅިގެން، އާންމުންގެ މެދުގައާއި ސިޔާސީ ދާއިރާގައި ބޮޑެތި ބަހުސްތަކެއް ވަނީ އުފެދިފަ އެވެ.

މި ހާދިސާ ހިނގާފައި މިވަނީ، އީރާނާއެކު ކުރަމުންދާ ހަނގުރާމަ ހުއްޓުމަކަށް ނައިސް ދިގުލައިގެން ގޮސްފައިވާ ދަނޑިވަޅެއްގައި، ނަތަންޔާހޫގެ ކޯލިޝަނަށް އިންތިޚާބުގައި ބޮޑެތި ގޮންޖެހުންތަކެއް ކުރިމަތިވެފައިވާ ވަގުތެއްގަ އެވެ. މި ހަނގުރާމަ ފެށުނީ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން ގުޅިގެން ތެހެރާނަށް ދިން ހަމަލާތަކެއްގައި، އީރާނުގެ އެންމެ މަތީ ވެރިޔާ އަލީ ޚާމަނާއީ އާއި އޭނާގެ އާއިލާގެ ހަތަރު މެންބަރަކު އަވަހާރަކޮށްލުމާއެކުގަ އެވެ. އޭގެ ތެރޭގައި ޚާމަނާއީގެ ދަރިކަނބަލުން ބުޝްރާ އާއި 14 މަހުގެ ކާފަ ދަރިފުޅު ޒަހްރާ ހިމެނެ އެވެ.

ޚާމަނާއީ އަވަހާރަވިތާ ހަފުތާއެއް ފަހުން އީރާނުގެ އާ އެންމެ މަތީ ވެރިޔާގެ މަގާމާ ހަވާލުވެވަޑައިގަތް އޭނާގެ ދަރިކަލުން މުޖްތަބާ ވަނީ، ބައްޕާފުޅުގެ މަރަށް "ބަދަލު ހިފާނެ" ކަމަށް ވައުދުވެވަޑައިގެންފަ އެވެ. ނަމަވެސް، ނަތަންޔާހޫގެ ދަރިފުޅު މަރާލަން އުޅުނު ކަމަށް ބުނާ މައްސަލާގައި ތެހެރާނުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.