އީރާާންގެ ވެރިންނަކީ ނުލަފާ ބައެއް، އެއްބަސްވުމަކަށް ނުދާނަން: ނަތަންޔާހޫ
26 އޯގަސްޓު 2026 | ބުދަ 10:37ޓްރަމްޕް އާއެކު ދާދި ފަހުން ބޭއްވި ބައްދަލުވުމެއްގެ ތަފުސީލު ހިއްސާ ކުރައްވަމުން ނަތަންޔާހޫ ވިދާޅުވީ، އީރާން އާއެކު ސިޔާސީ މަޝްވަރާތައް ކުރިއަށް ގެންދިއުމުގެ ފުރުސަތާ ގުޅޭ ގޮތުން ދެ ބޭފުޅުން ވާހަކަ ދެއްކެވި ކަމަށް. ނަމަވެސް، އީރާންގެ މިހާރުގެ ވެރިކަމުގައި ތިބި "ނުލަފާ" ގުރޫޕް އާއެކު އެއްވެސް ކަހަލަ އެއްބަސްވުމަކަށް އާދެވިދާނެ ކަމާ މެދު ޝައްކު އުފެދޭ ކަމަށާއި، އެފަދަ އެއްބަސްވުމަކަށް އިސްރާއީލުން ދުވަހަކު ވެސް ނުދާނެ ކަމަށް ޓްރަމްޕް އަރިހުގައި ދެންނެވި ކަމަށް ނަތަންޔާހޫ ވިދާޅުވި
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ | ގެޓީ އިމޭޖަސް
އީރާންގެ ވެރިންނަކީ "ނުލަފާ ބައެއްގެ" ގޮތުގައި ސިފަކުރައްވައި، އެ ޤައުމާއެކު ސިޔާސީ އެއްވެސް އެއްބަސްވުމަކަށް ވަޑައިނުގަންނަވާނެ ކަމަށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.
ހިފާފައިވާ ހުޅަނގު އައްސޭރީގެ އިސްރާއީލް އާބާދީއެއްގައި އަންގާރަ ދުވަހުގެރޭ ބޭއްވި ހަފްލާއެއްގައި ވާހަކަ ދައްކަވަމުން ނަތަންޔާހޫ ވަނީ، އެމެރިކާގެ ރައީސް ޑޮނަލްޑް ޓްރަމްޕް އީރާންއާ ދެކޮޅަށް ފަށްޓަވާފައިވާ އިޤްތިސާދީ ފިއްތުންތަކުގެ ކެމްޕެއިން އަށް ވަރަށް ބޮޑަށް ތައުރީފު ކުރައްވާފައި އެވެ.
ޓްރަމްޕް އާއެކު ދާދި ފަހުން ބޭއްވި ބައްދަލުވުމެއްގެ ތަފުސީލު ހިއްސާ ކުރައްވަމުން ނަތަންޔާހޫ ވިދާޅުވީ، އީރާން އާއެކު ސިޔާސީ މަޝްވަރާތައް ކުރިއަށް ގެންދިއުމުގެ ފުރުސަތާ ގުޅޭ ގޮތުން ދެ ބޭފުޅުން ވާހަކަ ދެއްކެވި ކަމަށެވެ. ނަމަވެސް، އީރާންގެ މިހާރުގެ ވެރިކަމުގައި ތިބި "ނުލަފާ" ގުރޫޕް އާއެކު އެއްވެސް ކަހަލަ އެއްބަސްވުމަކަށް އާދެވޭނެ ކަމާ މެދު ޝައްކު އުފެދޭ ކަމަށާއި، އެފަދަ އެއްބަސްވުމަކަށް އިސްރާއީލުން ދުވަހަކު ވެސް ނުދާނެ ކަމަށް ޓްރަމްޕް އަރިހުގައި ދެންނެވި ކަމަށް ނަތަންޔާހޫ ވިދާޅުވި އެވެ.
އީރާން އާއެކު ސިޔާސީ ގޮތުން މުއާމަލާތް ކުރުމަކީ ނަތަންޔާހޫ އަބަދު ވެސް ދެކޮޅު ހައްދަވާ ކަމެކެވެ. އެގޮތުން 2015 ވަނަ އަހަރު އެމެރިކާގެ ކުރީގެ ރައީސް ބަރަކް އޮބާމާގެ ސަރުކާރުން އީރާން އާއެކު އެކުލަވާލި ނިއުކްލިއަރ އެއްބަސްވުމާ ދެކޮޅަށް ވެސް އޭނާ ވަނީ ފާޅުގައި މަސައްކަތް ކުރައްވާފައި އެވެ. ނަމަވެސް، ޓްރަމްޕް އީރާން އާއެކު މަޝްވަރާގެ މަގު އިޚުތިޔާރު ކުރައްވަން އުޅުއްވި ދުވަސްވަރު، ޓްރަމްޕް އަށް ފާޑު ވިދާޅުނުވުމަށް ނަތަންޔާހޫ ވަނީ ވަރަށް ބޮޑަށް ސަމާލުކަން ދެއްވާފައި އެވެ.
މިދިޔަ ފެބްރުއަރީ މަހުގެ ފަހު ކޮޅު އެމެރިކާ އާއި އިސްރާއީލް ގުޅިގެން އީރާން އަށް ހަމަލާތަކެއް ދީފައިވީ ނަމަވެސް، އެމެރިކާގެ އާންމު ރައްޔިތުންގެ ޚިޔާލު ހުރިގޮތުންނާއި ތެލުގެ އަގު އިންތިހާ އަށް އުފުލުމާ ގުޅިގެން، އޭޕްރީލް މަހު ޓްރަމްޕް ވަނީ ހަމަލާ ބަދަލު ލކުރުން ހުއްޓާލުމަށް އެއްބަސްވެ ވަޑައިގެންފައި އެވެ. އެހެން ނަމަވެސް، އީރާން އިން އެމެރިކާގެ ޝަރުތުތަކަށް އެއްބަސްނުވުމުން ޓްރަމްޕް ވަނީ މިދިޔަ ހޯމަ ދުވަހު "އިޤްތިސާދީ ޑީ-ޑޭ" އިއުލާނު ކުރައްވައި، އީރާންގެ އިޤްތިސާދު އިނދަޖައްސާލުމަށް ވަރުގަދަ ފިޔަވަޅުތަކެއް އަޅުއްވާފައި އެވެ.
ނަތަންޔާހޫ ވިދާޅުވީ ޓްރަމްޕް އިޚުތިޔާރު ކުރެއްވި މި ތިންވަނަ ގޮތަކީ ވަރަށް ވަރުގަދަ އަދި މުހިންމު ނިންމުމެއް ކަމަށެވެ. އަދި މި ފިޔަވަޅުތަކަކީ ހަމައެކަނި އީރާން އަށް އަމާޒުކޮށްގެން އަޅާ ފިޔަވަޅުތަކެއް ނޫން ކަމަށާއި، އެ ޤައުމުގެ "ނުލަފާ ޑިކްޓޭޓާޝިޕް އަށް" އެހީތެރިވާ ހުރިހާ ފަރާތްތަކެއް ހިސާރު ކުރުމަށް ނިންމި ނިންމުމެއް ކަމަށް ވެސް އޭނާ ވިދާޅުވި އެވެ.
އީރާން އިން އިސްރާއީލްއާ ދެކޮޅު ހަތިޔާރު އެޅި ޖަމާއަތްތައް ކަމަށްވާ ހިޒްބުالله އާއި ހަމާސް އަށް އެހީތެރިކަން ފޯރުކޮށްދޭތީ، އެމެރިކާ އިން އީރާން އަށް ހަމަލާ ދިނުމަށް ނަތަންޔާހޫ ބާރު އަޅުއްވާތާ އަހަރުތަކެއް ވެއްޖެ އެވެ.
