އެއްބަސްވުމުގައިވާ ކަންކަން އެމެރިކާ އިން ފުރިހަމަކޮށްފި ނަމަ، އީރާން އިން ވެސް އެކަން ކުރާނެ: ޕެޒެޝްކިއާން
1 ސެޕްޓެމްބަރު 2026 | އަންގާރަ 06:14ބިޝްކެކްގައި ބޭއްވި ސަމިޓްގައި ޕެޒެޝްކިއާން ވަނީ ދެ ޤައުމުގެ ދެމެދު ހިނގަމުން އަންނަ މަޝްވަރާތަކުގެ ވާހަކަތަކާ ގުޅޭ ގޮތުން ވާހަކަ ދައްކަވާފައި. އެމެރިކާ އިން އެއްބަސްވުމުގައި ހިމެނޭ ކަންކަން ފުއްދައިފި ނަމަ، އީރާން އިން ވެސް އެއްބަސްވުމުގައި ހިމެނޭ ކަންކަން ވަގުތުން ފުއްދާނެ ކަމަށް ޕެޒެޝްކިއާން ވިދާޅުވި
އީރާންގެ ރައީސް މަސްއޫދު ޕެޒެޝްކިއާން | ގެޓީ އިމޭޖަސް
އެމެރިކާ އާއި އީރާންއާ ދެމެދު މިދިޔަ ޖޫން މަހު ސޮއިކުރެވުނު ވަގުތީ އެއްބަސްވުމުގައި އެމެރިކާ އިން އެއްބަސްވެފައިވާ ކަންކަން އެ ޤައުމުން ފުރިހަމަކޮށްފި ނަމަ، އީރާން އިން ވެސް އެކަން ކުރާނެ ކަމަށް އެ ޤައުމުގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.
ކިރިގިސްތާންގެ ބިޝްކެކްގައި ބޭއްވި ޝަންހާއީ ކޯޕަރޭޝަން އޮގަނައިޒޭޝަންގެ ސަމިޓްގައި ޕެޒެޝްކިއާން މިހެން ވިދާޅުވެފައިވާ ކަމަށް އީރާންގެ އައިއެސްއެންއޭ ނޫސް އެޖެންސީ އިން ރިޕޯޓުކޮށްފައިވެ އެވެ.
އެމެރިކާ އާއި އީރާންއާ ދެމެދު ޖޫން މަހުގެ 17 ވަނަ ދުވަހު ސޮއިކުރި މެމޮރެންޑަމް އޮފް އަންޑަސްޓޭންޑިން، އޯގަސްޓް މަހުގެ 17 ވަނަ ދުވަހު ވަނީ ހަމަވެފަ އެވެ. މި އެއްބަސްވުމަކީ ދެ ޤައުމުގެ ދެމެދު ހިނގަމުން އަންނަ ނުތަނަވަސްކަމަށް ހައްލު ހޯދުމަށް ޤާއިމުކުރި މުހިންމު އެއްބަސްވުމެކެވެ.
މި އެއްބަސްވުމުގެ ދަށުން ސުލްހައިގެ މަޝްވަރާތައް ފަސޭހަކުރުމަށް ވަނީ ހަމަޖެހިފަ އެވެ. އަދި ހުރްމުޒް ކަނޑުއޮޅި އަލުން ހުޅުވުމަށް ވެސް މި އެއްބަސްވުމުގައި ވަނީ ހިމަނާފަ އެވެ. ހުރްމުޒް ކަނޑުއޮޅި އަކީ މިހާރު ހިނގަމުން އަންނަ ހަނގުރާމައިގައި ވަރަށް ބޮޑު ބަހުސް އަކަށްވެފައިވާ ސަރަހައްދެކެވެ.
ބިޝްކެކްގައި ބޭއްވި ސަމިޓްގައި ޕެޒެޝްކިއާން ވަނީ ދެ ޤައުމުގެ ދެމެދު ހިނގަމުން އަންނަ މަޝްވަރާތަކުގެ ވާހަކަތަކާ ގުޅޭ ގޮތުން ވާހަކަ ދައްކަވާފަ އެވެ. އެމެރިކާ އިން އެއްބަސްވުމުގައި ހިމެނޭ ކަންކަން ފުއްދައިފި ނަމަ، އީރާން އިން ވެސް އެއްބަސްވުމުގައި ހިމެނޭ ކަންކަން ވަގުތުން ފުއްދާނެ ކަމަށް ޕެޒެޝްކިއާން ވިދާޅުވި އެވެ.
މެދުއިރުމަތީގެ ސަރަހައްދުގައި ހިނގަމުން އަންނަ ހަނގުރާމައާ ގުޅިގެން ދެ ޤައުމުގެ ދެމެދު ވަނީ ވަރަށް ބޮޑު ހަމަނުޖެހުމެއް އަދި ނުތަނަވަސްކަމެއް އުފެދިފަ އެވެ. ޚާއްސަކޮށް ހުރްމުޒް ކަނޑުއޮޅި ބަންދުކުރުމާ ގުޅޭ ގޮތުން ދެ ޤައުމުގެ ދެމެދު ވަނީ ބޮޑެތި ޚިލާފުތައް އުފެދިފަ އެވެ.
މި އެއްބަސްވުމުގެ މުއްދަތު ހަމަވެފައިވާއިރު، އަލުން ވާހަކަތައް ފަށާނެ ކަމާ ގުޅޭ ގޮތުން އަދި ސާފުކޮށް އެއްވެސް އެއްޗެއް ހާމަކޮށްފައި ނުވެ އެވެ. ނަމަވެސް ޕެޒެޝްކިއާންގެ ވާހަކަ އިން ދޭހަވަނީ އީރާން އިން މި ވާހަކަތަކަށް ވަރަށް ބޮޑަށް އިސްކަންދޭ ކަމަށާއި އެމެރިކާ އިން އެއްބަސްވެފައިވާ ކަންކަން ފުއްދައިފި ނަމަ އީރާން އިން ވެސް އެކަންކަން ފުއްދަން ތައްޔާރަށް ތިބި ކަމަށެވެ.
މަސްދަރު: އަލް ޖަޒީރާ
