ދަތިކުރުމުގެ ފިޔަވަޅު އަޅާފައި އޮތް އީރާންގެ ތެޔޮ ޓޭންކަރާ އެއްވެސް ގުޅުމެއް ނެތް ކަމަށް އިރާގުން ބުނެފި
1 ސެޕްޓެމްބަރު 2026 | އަންގާރަ 04:49ސޯމޯ އިން ނެރުނު ބަޔާނެއްގައި ބުނެފައި ވަނީ، "ބައިނަރީ ސްޓަރ" ނަމަކަށް ކިޔާ ތެލާއި ކެމިކަލް އުފުލާ ޓޭންކަރާއެކު އެއްވެސް ކަހަލަ ވިޔަފާރީގެ ނުވަތަ ކޮންޓްރެކްޓެއްގެ ދަށުން ހިންގާ މުއާމަލާތެއް ނޯންނާނެ ކަމަށް. އަދި އެ އުޅަނދުގެ ވެރިފަރާތާއި ނުވަތަ އެ އުޅަނދު އޮޕަރޭޓްކުރާ ފަރާތާއެކު ވެސް އެއްވެސް ގުޅުމެއް ނޯންނާނެ ކަމަށް އެ ކުންފުނިން ވަނީ ކަށަވަރުކޮށްދީފައި
ތެޔޮ އުފުލުމުގެ މަސައްކަތް ކުރާ އުޅަނދުތަކެއް | ރޮއިޓާސް
އީރާންގެ ތެލުގެ އުފެއްދުންތައް އުފުލުމުގައި ހަރަކާތްތެރިވާ ކަމަށް ބުނެ ދަތިކުރުމުގެ ފިޔަވަޅު އަޅާފައިވާ ތެޔޮ ޓޭންކަރަކާ އެއްވެސް ގުޅުމެއް ނެތް ކަމަށް، އިރާގުގެ ދައުލަތުގެ ތެޔޮ ކުންފުނި، ސްޓޭޓް އޯގަނައިޒޭޝަން ފޯރ މާކެޓިން އޮފް އޮއިލް (ސޯމޯ) އިން ބުނެފި އެވެ.
ސޯމޯ އިން ނެރުނު ބަޔާނެއްގައި ބުނެފައި ވަނީ، "ބައިނަރީ ސްޓާރ" ނަމަކަށް ކިޔާ ތެލާއި ކެމިކަލް އުފުލާ ޓޭންކަރާއެކު އެއްވެސް ކަހަލަ ވިޔަފާރީގެ ނުވަތަ ކޮންޓްރެކްޓެއްގެ ދަށުން ހިންގާ މުއާމަލާތެއް ނޯންނާނެ ކަމަށެވެ. އަދި އެ އުޅަނދުގެ ވެރިފަރާތާއި ނުވަތަ އެ އުޅަނދު އޮޕަރޭޓްކުރާ ފަރާތާއެކު ވެސް އެއްވެސް ގުޅުމެއް ނޯންނާނެ ކަމަށް އެ ކުންފުނިން ވަނީ ކަށަވަރުކޮށްދީފަ އެވެ.
ބައިނަރީ ސްޓާރ އަކީ އީރާންގެ ތެލާއި ތާރު (ބިޓުމަން) ގަލްފުގެ ސަރަހައްދުގައި އުފުލާ ކަމަށް ތުހުމަތުކޮށް، އެމެރިކާ އާއި ވިލާތުގެ އިއްތިހާދުން ދަތިކުރުމުގެ ފިޔަވަޅު އަޅާފައިވާ އުޅަނދެކެވެ. މި އުޅަނދަކީ ބައިނަލްއަޤުވާމީ މިންގަނޑުތަކާ ޚިލާފަށް އީރާންގެ ތެޔޮ އެކި ޤައުމުތަކަށް ފޯރުކޮށްދިނުމުގައި ބޭނުންކުރާ އުޅަނދެއްގެ ގޮތުގައި ވަނީ ފާހަގަކުރެވިފަ އެވެ.
އިރާގުގެ ތެޔޮ ބޭރުކުރުމަށް ބޭނުންކުރާ އުޅަނދުތަކާ ގުޅޭ ގޮތުން ސޯމޯ އިން ބުނީ، އެ ޤައުމުގެ ތެޔޮ އުފުލުމަށް ހަމަޖައްސާ ހުރިހާ އުޅަނދަކީ ބައިނަލްއަޤުވާމީ ގޮތުން ކަނޑައަޅާފައިވާ މިންގަނޑުތަކަށް ފެތޭ އުޅަނދުތަކެއްތޯ ވަރަށް ބޮޑަށް ބަލާ ކަމަށެވެ. އަދި ބައިނަލްއަޤުވާމީ ދަތިކުރުމުގެ ފިޔަވަޅު އަޅާފައިވާ ލިސްޓެއްގައި ހިމެނޭ އެއްވެސް އުޅަނދަކަށް، އިރާގުގެ ތެޔޮ އުފުލުމުގެ ފުރުސަތު ނުދޭނެ ކަމަށް ވެސް އެ ކުންފުނިން ބުނެފައިވެ އެވެ.
މީގެ އިތުރުން، އިރާގުގެ ކަނޑުގެ ސަރަހައްދުގައި ދަތުރުކުރާ އުޅަނދުތަކުގެ ހަރަކާތްތައް އެ ކުންފުނިން ވަރަށް ގާތުން މޮނިޓަރ ކުރަމުންދާ ކަމަށް ސޯމޯ އިން ބުންޏެވެ. މީގެ ތެރޭގައި އުޅަނދުތަކުގެ ލޮކޭޝަން ޑޭޓާ އާއި އައިޑެންޓިފިކޭޝަން ސިގްނަލްތަކަށް ބަދަލު ގެނެސްގެން އޮޅުވާލަން މަސައްކަތް ކުރޭތޯ ބެލުން ވެސް ހިމެނެ އެވެ.
ސޯމޯ އިން އިތުރަށް ތަފްސީލު ކޮށްދިން ގޮތުގައި، އުޅަނދެއް އިރާގުގެ ކަނޑުގެ ސަރަހައްދުގައި އޮތުމަކީ، ނުވަތަ އުޅަނދުތައް ޓްރެކްކުރާ ސިސްޓަމަކުން އެ އުޅަނދެއް ފެނުމަކީ، އެ އުޅަނދަކާ ސޯމޯއާ ދެމެދު ވިޔަފާރީގެ އެއްވެސް ގުޅުމެއް އޮތް ކަމުގެ ހެއްކެއް ނޫން ކަމަށެވެ.
އެ ކުންފުނިން މިކަން ސާފުކޮށްދީފައި މިވަނީ، ދަތިކުރުމުގެ ފިޔަވަޅު އަޅާފައިވާ އުޅަނދުތަކުން އިރާގުގެ ނަން ބޭނުން ކޮށްގެން، ނުވަތަ އެ ސަރަހައްދުގެ ބޭނުން ހިފައިގެން ޤަވާއިދާ ޚިލާފު މުއާމަލާތްތައް ހިންގައިފާނެތީ، އެކަމާ ސަމާލުވުމުގެ ގޮތުންނެވެ.
މަސްދަރު: އަލް ޖަޒީރާ
