މައިން ހަރުކުރުމަށް އީރާން އިން އުޅޭ ކަމަށް ބުނެ، އެމެރިކާ އިން ހަމަލާދީފި
31 އޯގަސްޓު 2026 | ހޯމަ 04:29މި ހަމަލާއާ ގުޅިގެން އީރާންގެ އައިއާރުޖީސީ އިން ބުނީ، ލާރަކް އައިލެންޑަށް ދިން ހަމަލާގައި އީރާންގެ ސިފައިންނާއި އާންމުންގެ ބަޔަކު މަރުވެ، ގިނަ ބަޔަކު ޒަޚަމްވެފައިވާ ކަމަށް. ނަމަވެސް މަރުވި މީހުންގެ ސީދާ އަދަދެއް އީރާން އިން ހާމަކޮށްފައި ނުވޭ. އީރާން އިން ވަނީ މި ހަމަލާގެ ބަދަލު ހިފާނެ ކަމަށާއި މިކަމުގެ ޒިންމާ އުފުލަންޖެހޭ ފަރާތްތަކަށް ހަރުކަށި އަދަބު ދޭނެ ކަމަށް ބުނެ އިންޒާރު ދީފައި
އެމެރިކާ އިން އީރާާން އަށް ދިން ހަމަލާގެ ތެރެއިން | ސޯޝަލް މީޑިއާ
ހުރްމުޒް ކަނޑުއޮޅީގައި ކަނޑު އަޑީގެ މައިން ހަރުކުރުމަށް އީރާން އިން ތައްޔާރުވަމުންދާ ކަމަށް ބުނެ، އެމެރިކާގެ އަސްކަރިއްޔާ އިން އީރާންގެ ލާރަކް އައިލެންޑަށް ވަރުގަދަ ހަމަލާތަކެއް އާދިއްތަ ދުވަހު ދީފި އެވެ.
އެމެރިކާގެ އޮފިޝަލަކު އަލް އަރަބިއްޔާ އިންގްލިޝް އަށް މައުލޫމާތު ދެއްވަމުން ވިދާޅުވީ، މި ހަމަލާތައް އަމާޒުކޮށްފައި ވަނީ ހުރްމުޒް ކަނޑުއޮޅި އަށް މައިން އުކުމަށް ބޭނުންކުރާ އީރާންގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ދެ ލޯންޗަރަކަށް ކަމަށެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކުރި ގޮތުގައި، ބައިނަލްއަޤުވާމީ ކަނޑުގެ ދަތުރުފަތުރުގެ މަގުތަކުގައި ހުރި މައިންތައް ސާފު ކުރުމުގެ މަސައްކަތް މިދިޔަ ހަފުތާގައި ވަނީ ނިންމާލާފަ އެވެ. އެމެރިކާގެ އޮފިޝަލު އިތުރަށް ވިދާޅުވީ، އެ ސަރަހައްދު ވަރަށް ގާތުން ބަލަމުންދާ ކަމަށާއި ދުނިޔޭގެ ވިޔަފާރީގެ މުހިންމު މި މަގުން މުދާ އުފުލުމަށް ހުރަސްއެޅޭ ކޮންމެ ކަމަކުން ދިފާއުވުމަށް އެމެރިކާ އޮތީ ތައްޔާރަށް ކަމަށެވެ.
މި ހަމަލާއާ ގުޅިގެން އީރާންގެ އައިއާރުޖީސީ އިން ބުނީ، ލާރަކް އައިލެންޑަށް ދިން ހަމަލާގައި އީރާންގެ ސިފައިންނާއި އާންމުންގެ ބަޔަކު މަރުވެ، ގިނަ ބަޔަކު ޒަޚަމްވެފައިވާ ކަމަށެވެ. ނަމަވެސް މަރުވި މީހުންގެ ސީދާ އަދަދެއް އީރާން އިން ހާމަކޮށްފައި ނުވެ އެވެ. އީރާން އިން ވަނީ މި ހަމަލާގެ ބަދަލު ހިފާނެ ކަމަށާއި މިކަމުގެ ޒިންމާ އުފުލަންޖެހޭ ފަރާތްތަކަށް ހަރުކަށި އަދަބު ދޭނެ ކަމަށް ބުނެ އިންޒާރު ދީފަ އެވެ.
އީރާންގެ ލާރަކް އައިލެންޑަށް އެމެރިކާ އިން ދިން ހަމަލާގެ ތެރެއިން
އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފުތާގައި ވިދާޅުވެފައި ވަނީ ހުރްމުޒް ކަނޑުއޮޅީގެ ބައިނަލްއަޤުވާމީ ސަރަހައްދުގައި ހުރި ހުރިހާ މައިންތަކެއް މިހާރު ނައްތާލެވިފައިވާ ކަމަށެވެ. އަދި އަލުން މައިން ހަރުކުރަން އުޅޭ ކޮންމެ އުޅަނދެއް ސުންނާފަތިކޮށްލައްވާނެ ކަމުގެ އިންޒާރު އީރާން އަށް ދެއްވާފައިވާނެ ކަމަށް ވެސް ޓްރަމްޕް ވިދާޅުވި އެވެ.
މިދިޔަ ޖުލައި މަހުގެ ފަހުން އެމެރިކާ އިން އީރާން އަށް ދިން ފުރަތަމަ ހަމަލާ އަކީ މިއީ އެވެ. ފާއިތުވި ހަފުތާ ތަކުގައި ހަނގުރާމަ ވަނީ ވަކި ކޮޅަކަށް ނުނިމި މަޑުޖެހުމަކަށް އައިސްފަ އެވެ. މި ދަނޑިވަޅުގައި އެމެރިކާ އިން ވަނީ އީރާން އަށް އެހީތެރިވާ ޤައުމުތަކާ ދެކޮޅަށް ވަރުގަދަ އިގުތިސާދީ ދަތިކުރުމުގެ ފިޔަވަޅުތައް އަޅާނެ ކަމުގެ އިންޒާރު ދީފަ އެވެ.
މި ހަނގުރާމަ ފެށުނީ މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލް އިން އީރާން އަށް ދިން ހަމަލާތަކަކާ ގުޅިގެންނެވެ. އޭގެ ރައްދުގައި އީރާން އިން ވަނީ އިސްރާއީލް އާއި އަވަށްޓެރި ޤައުމުތަކަށް ހަމަލާދީފަ އެވެ. މިހާރު ހަ މަސް ދުވަސްވެފައިވާ މި ހަނގުރާމައިގައި އެމެރިކާގެ 18 ސިފައިން މަރުވެފައިވާއިރު، އިސްރާއީލް އާއި އެމެރިކާ އިން އީރާން އާއި ލުބުނާން އަށް ދެމުންދާ ހަމަލާތަކުގައި އެތައް ހާސް ބަޔަކު މަރުވެ، މިލިއަނުން މީހުން ވަނީ ހާލުގައި ޖެހިފަ އެވެ.
މި ހަނގުރާމައިގެ ސަބަބުން ހުރްމުޒް ކަނޑުއޮޅި ބަންދުވެފައިވާއިރު، މިއީ މުޅި ދުނިޔޭގައި ބޭނުންކުރާ ތެލުގެ ފަސްބައިކުޅަ އެއްބައި އުފުލާ އެންމެ މުހިންމު މަގެވެ. މި މަގު ބަންދުވުމުގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ.
މަސްދަރު: އަލް ޖަޒީރާ
