އެމެރިކާގެ އަމުރުތަކަށް ބޯލަނބަމުން، ޔޫރަޕަށް މިނިވަންކަމެއް ނޯންނާނެ: އީރާން
1 ސެޕްޓެމްބަރު 2026 | އަންގާރަ 06:24ބަޣާއީ ވިދާޅުވީ އެމެރިކާ އިން އަންގާ ގޮތަށް ކަންކަން ކުރަމުން ޔޫރަޕުން "ސްޓްރެޓީޖިކް އޮޓޮނޮމީ" ނުވަތަ އިސްތިރާތީޖީ މިނިވަންކަމުގެ ވާހަކަ ދެއްކުމުގެ ފުރުސަތެއް މިހާރު ނެތް ކަމަށް
އީރާންގެ ފޮރިން މިނިސްޓްރީގެ ނައިބު އިސްމާއީލް ބަޣާއީ | ގެޓީ އިމޭޖަސް
ޔޫރަޕް އަކީ މިނިވަން އަދި އަމިއްލަ އިސްތިގުލާލެއް އޮތް ބައެއްގެ ގޮތުގައި ދެއްކެން އޮތީ އެމެރިކާގެ ނުފޫޒުން އެއްކިބާވެގެން ކަމަށާއި އެމެރިކާގެ އަމުރުތަކަށް ބޯލަނބަމުން ޔޫރަޕަށް އެ މިނިވަންކަމުގައި ނޯވެވޭނެ ކަމަށް އީރާންގެ ފޮރިން މިނިސްޓްރީ އިން ބުނެފި އެވެ.
އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ އެކްސްގައި ކުރެއްވި ޕޯސްޓެއްގައި ވިދާޅުވީ، އަނިޔާވެރިކަމަށް މަގުފަހިކޮށްދޭ ފަރާތްތަކާ ގުޅޭ ގޮތުން ފްރެންޗް ފިލޯސަފަރު އެޓިއެން ޑި ލަ ބޮއެޓީގެ "ޑިސްކޯސް ޑި ލަ ސާވިޓިއުޑް ވޮލަންޓިއާ" ގައި ބަޔާންކޮށްފައިވާ ފަދައިން، ބާރުގެ ބޭނުންކޮށްގެން އެކަނި ނުފޫޒު ފޯރުވުމަކީ ދެމެހެއްޓެނިވި ކަމެއް ނޫން ކަމަށެވެ. އަދި އަމިއްލަ އަށް ކަންކަން ނިންމުމުގެ ޤާބިލުކަން ހުރި ފަރާތްތަކުން އަޅުވެތިކަމަށް އިސްކަންދޭ ނަމަ، އެ ނުފޫޒު ދެމި އޮންނާނެ ކަމަށް އޭނާ ފާހަގަކުރެއްވި އެވެ.
ބަޣާއީ ވިދާޅުވީ، އެމެރިކާ އިން އަންގާ ގޮތަށް ކަންކަން ކުރަމުން، ޔޫރަޕުން "ސްޓްރެޓީޖިކް އޮޓޮނޮމީ" ނުވަތަ އިސްތިރާތީޖީ މިނިވަންކަމުގެ ވާހަކަ ދެއްކުމުގެ ފުރުސަތެއް މިހާރު ނެތް ކަމަށެވެ. އިސްތިރާތީޖީ މިނިވަންކަމަކީ ހަމައެކަނި ބޮޑެތި ބަޔާންތަކަކުން ހާސިލު ކުރެވޭނެ ކަމެއް ނޫން ކަމަށާއި، އެކަން ހާސިލު ކުރެވޭނީ ބޮޑެތި ބާރުތަކުގެ ނިންމުންތަކާ ތަފާތުވި ނަމަވެސް، އަމިއްލަ އަށް ޒިންމާދާރުކަމާއެކު ގޮތް ނިންމުމުގެ ޤާބިލުކަން ހުރެގެން ކަމަށް އޭނާ ވިދާޅުވި އެވެ.
މީގެ އިތުރުން އީރާންގެ ފޮރިން މިނިސްޓްރީގެ ތަރުޖަމާނު ވިދާޅުވީ، ޔޫރަޕުން މިހާރު ގޮތެއް ނިންމަން ޖެހިފައިވާ ކަމަށެވެ. އެއީ މިނިވަން ފަރާތެއްގެ ގޮތުގައި އަމަލުކުރުން ނުވަތަ އެހެން ބައެއްގެ ސިޔާސަތުތައް ތަކުރާރުކޮށް ކޮޕީ ކުރުމަށް އާދަވެ، އެއީ މިނިވަންކަން ކަމަށް ހީކޮށްގެން ތިބުން ކަމަށް އޭނާ ވިދާޅުވި އެވެ.
އީރާން އިން މިފަދަ މޭރުމަކުން ވާހަކަ ދައްކާފައި މިވަނީ، ބައިނަލްއަޤުވާމީ މައިދާނުގައި ހިނގާ ބޮޑެތި ކަންކަމުގައި ޔޫރަޕުގެ ޤައުމުތަކުން އެމެރިކާގެ ސިޔާސަތުތަކަށް ތާއީދުކޮށް، އެމެރިކާގެ ނުފޫޒުގެ ދަށުން އަމަލު ކުރަމުންދާ ކަމަށް ބުނެ ގިނަ ފާޑުކިޔުންތަކެއް އަމާޒުވެފައިވާ ދަނޑިވަޅެއްގަ އެވެ.
