ކުރުދިސްތާނުގައި ދިން ޑްރޯން ހަމަލާތަކަށް ފަހު ތެޔޮ އުފެއްދުން އަލުން ފަށައިފި

އިރާގުގެ ކުރުދިސްތާން ސަރަހައްދުގެ ތެޔޮ އުފައްދާ މަރުކަޒުތަކަށް އަމާޒުކޮށް ދިން ޑްރޯން ހަމަލާތަކާ ގުޅިގެން މެދުކަނޑާލާފައި އޮތް ތެޔޮ އުފެއްދުމުގެ މަސައްކަތް އަލުން ފަށައިފި އެވެ.

މި މަސައްކަތްތައް އަލުން ފަށާފައިވަނީ ހަމަލާތަކާ ގުޅިގެން ސަލާމަތީ ސަބަބުތަކަށްޓަކައި މަސައްކަތް ހުއްޓާލި ކުންފުނިތަކުން އަނބުރާ މަސައްކަތަށް ނުކުތުމާ ގުޅިގެންނެވެ.

ކުރުދިސްތާން ސަރަހައްދުގެ އެކްޓިން ނެޗުރަލް ރިސޯސަސް މިނިސްޓަރު އެ ސަރަހައްދުގެ މީޑިއާތަކަށް މައުލޫމާތު ދެއްވަމުން ވިދާޅުވީ، މަސައްކަތްތައް އަލުން ފެށުމާ އެކު މިހާރު ދުވާލަކު 220،000 އާއި 230،000 އާ ދެމެދުގެ އަދަދަކަށް ބަރޭލް ތެޔޮ އުފައްދަމުންދާ ކަމަށެވެ. މިއީ އެ ސަރަހައްދުގެ އިގުތިސާދަށް މުހިންމު ކުރިއެރުމެއް ކަމަށް ވެސް މިނިސްޓަރު ފާހަގަ ކުރެއްވި އެވެ.

މި ސަރަހައްދުގެ ތެޔޮ އުފައްދާ ވަސީލަތްތަކަށް ހަމަލާތައް އަމާޒުވެފައި ވަނީ އިސްރާއީލް އާއި އެމެރިކާ އިން އީރާންއާ ދެކޮޅަށް ކުރަމުންދާ ހަނގުރާމައިގެ ތެރެއިންނެވެ. މި ހަމަލާތަކުގެ ސަބަބުން ސަލާމަތީ ނުރައްކާ ބޮޑުވެ، ތެޔޮ އުފައްދާ ކުންފުނިތަކުން ވަނީ ވަގުތީ ގޮތުން މަސައްކަތްތައް މެދުކަނޑާލައި، މުވައްޒަފުންގެ ރައްކާތެރިކަން ކަށަވަރުކޮށްފައި އެވެ.

އިރާގުގެ ކުރުދިސްތާން އަކީ ގިނަ އަދަދަކަށް ތެޔޮ އުފައްދާ ސަރަހައްދަކަށްވާއިރު، ސަރަހައްދީ ހަމަނުޖެހުންތަކުގެ ސަބަބުން ތެޔޮ އުފެއްދުމަށް ދޭތެރެ ދޭތެރެއިން ހުރަސްތައް ކުރިމަތިވެ އެވެ. ނަމަވެސް މިނިސްޓަރު ވިދާޅުވީ މިހާރު މަސައްކަތްތައް އާންމު ހާލަތަކަށް ރުޖޫއަވެފައިވާ ކަމަށާއި، ކުރިއަށް އޮތް ތަނުގައި އުފައްދާ މިންވަރު އިތުރުވެގެންދާނެ ކަމަށް އުންމީދު ކުރައްވާ ކަމަށެވެ.