ފުޓުބޯޅަ ކުޅުން ހުއްޓާލަން ނިންމާފައިވާކަން މިލްނާ އިއުލާން ކޮށްފި

ފުޓުބޯޅަ ކުޅުން ހުއްޓާލަން ނިންމާފައިވާ ކަމަށް، ބްރައިޓަން އަށް ކުޅެމުން އައި އިންގްލެންޑުގެ ޖޭމްސް މިލްނާ އިއުލާން ކޮށްފި އެވެ. 

އުމުރުން 40 އަހަރުގެ މިލްނާ އެކަން އިއުލާން ކޮށްފައި ވަނީ އޭނާގެ ސޯޝަލް މީޑިއާގަ އެވެ. ފުޓުބޯޅަ ކުޅުން ހުއްޓާލަން ނިންމިއިރު، މިލްނާ އަކީ އިނގިރޭސި ޕްރިމިއާ ލީގުގައި އެންމެ ގިނަ މެޗު ކުޅެފައިވާ ކުޅުންތެރިޔާ އެވެ. އޭނާ ވަނީ ޕްރިމިއާ ލީގުގައި ޖުމުލަ 658 މެޗު ކުޅެފަ އެވެ. މި ރެކޯޑު މިލްނާ ހެދީ މިއަހަރުގެ ފެބްރުވަރީ މަހުގެ ތެރޭގައި ބްރައިޓަން އިން ބްރެންޓްފޯޑްއާ ދެކޮޅަށް ކުޅުނު މެޗުގަ އެވެ. 

މިލްނާގެ ކުރިން މި ރެކޯޑު އޮތީ ގަރެތު ބެރީގެ އަތުގަ އެވެ. ނަމަވެސް، މިހާރު މިލްނާ ވަނީ ބެރީ އަށް ވުރެ ފަސް މެޗު އިތުރަށް ކުޅެފަ އެވެ. ބެރީ ކުޅެފައި ވަނީ 653 މެޗެވެ.  

މިލްނާ ވަނީ އޭނާގެ ކެރިއަރުގައި ލީޑްސް ޔުނައިޓެޑު، ނިއުކާސަލް ޔުނައިޓެޑު، އެސްޓަން ވިލާ، މެންޗެސްޓަރ ސިޓީ، ލިވަޕޫލް އަދި ބްރައިޓަން އަށް ކުޅެފަ އެވެ. އެކި ކުލަބު ތަކާ އެކު ޕްރިމިއާ ލީގުގައި 24 ސީޒަން ހޭދަ ކުރުމަށް ފަހު މިލްނާ ބުނީ، މިއީ އޭނާގެ ކެރިއަރު ނިންމާލަން އެންމެ ރަނގަޅު ވަގުތު ކަމަށެވެ. 

ކުޅުން ހުއްޓާލުން އިއުލާން ކުރަމުން މިލްނާ ބުނީ އެންމެ ކުޑައިރު ސަޕޯޓު ކުރި ލީޑްސް ޔުނައިޓެޑުގައި އުމުރުން 16 އަހަރުގައި ކުޅުމާއި، ޕްރިމިއާ ލީގުގައި އެންމެ ޒުވާން އުމުރުގައި ލަނޑު ޖެހި ކުޅުންތެރިޔާގެ މަގާމުން ފެށިގެން މިހާތަނަށް އޭނާ ކޮށްފައިވާ ދަތުރަކީ ހުވަފެނުގައި ވެސް ނުފެންނަ ދަތުރެއް ކަމަށެވެ. ފަޔަށް ލިބުނު އަނިޔާއެއްގެ ސަބަބުން، ފައި ނަގާލަން ވެސް ނުކެރިފައި ހުއްޓާ އަލުން އެނބުރި އައިސް އުމުރުް 40 އަހަރުގައި ދެ ވަނަ ފަހަރަށް ބްރައިޓަން ޔޫރަޕަށް ކޮލިފައި ކޮށްދިނުމުގައި ބައިވެރިވެފައިވާ ކަމަށް އޭނާ ބުންޏެވެ.

މިލްނާ ވަނީ އޭނާގެ ކެރިއަރުގައި ޕްރިމިއާ ލީގު ތިން ފަހަރު ކާމިޔާބު ކޮށްފަ އެވެ. އެއީ ސިޓީ އާއެކު ދެ ފަހަރު އަދި ލިވަޕޫލް އާއެކު އެއް ފަހަރު އެވެ. އޭގެ އިތުރުން އޭނާ ވަނީ ޔުއެފާ ޗެމްޕިއަންސް ލީގުގެ އިތުރުން، އެފްއޭ ކަޕް ދެ ފަހަރު އަދި ކަރަބޯ ކަޕް ވެސް ދެ ފަހަރު ކާމިޔާބު ކޮށްފަ އެވެ. ހަމަ އެހެންމެ މިލްނާ ވަނީ އެފްއޭ ކޮމިއުނިޓީ ޝީލްޑް، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ވެސް ކާމިޔާބު ކޮށްފަ އެވެ. 

މިލާން ވަނީ އިނގިރޭސިވިލާތުގެ ޤައުމީ ޓީމަށް 61 މެޗު ކުޅެދީފަ އެވެ. ޤައުމީ ޓީމަށް އޭނާ ވަނީ ހަތް އަހަރު ވަންދެން ކުޅެދީފަ އެވެ. ޤައުމީ ޓީމާ އެކު 2010 ވަނަ އަހަރާއި، 2014 ވަނަ އަހަރުގެ ފީފާ ވޯލްޑް ކަޕް ކުޅުނުއިރު، 2012 ވަނަ އަހަރާއި 2016 ވަނަ އަހަރުގެ ޔޫރޯ ފުޓުބޯޅަ މުބާރާތުގައި ވެސް ކުޅެފައިވެ އެވެ. 

ފުޓުބޯޅަ ކުޅުން ހުއްޓާލަން ނިންމިކަން އިއުލާން ކުރަމުން މިލްނާ ވަނީ، އޭނާ އަށް އިރުޝާދު ދިން ކޯޗުންނާއި، އޭނާ އާއެކު ޓީމު ތަކުގައި ކުޅެފައިވާ ކުޅުންތެރިން އަދި ސަޕޯޓަރުންނަށް ވެސް ޝުކުރު އަދާ ކޮށްފަ އެވެ. ފުޓުބޯޅަ އިން ހޯދުނު ހުރިހާ ކާމިޔާބަކަށް ޝުކުރުވެރިވާކަން ފާހަގަކޮށް މިލްނާ ބުނީ، އެންމެ ބޮޑަށް ހަނދާން ވާނީ ކުޅިވަރުން ލިބުނު ރަޙުމަތްތެރިންގެ މަތުން ކަަމަށެވެ.