20 އަހަރުގެ ކާމިޔާބު ކެރިއަރަށް ފަހު އެންތަނީ ޓޭލާ ރިޓަޔާކޮށްފި

ދުނިޔޭޭގެ ފުޓުބޯޅައިގައި ފާހަގަކޮށްލެވޭ އެންމެ ތަޖުރިބާކާރު އެއް ރެފްރީ ކަމަށްވާ، އެންތަނީ ޓޭލާ ރެފްރީކަން ކުރުމުން ރިޓަޔާކޮށްފި އެވެ.

20 އަހަރުގެ ކާމިޔާބު ކެރިއަރަކަށް ފަހު ޓޭލާ ރިޓަޔާ ކުރިއިރު، އޭނާ އެންމެ ފަހުން ރެފްރީކަން ކުރި މެޗަކީ އެމެރިކާ އާއި ކެނެޑާ އަދި މެކްސިކޯގައި ނިމުނު ފީފާ ވޯލްޑް ކަޕްގެ ގަދަ 16 ގައި ޕޯޗުގަލް އާއި ސްޕެއިން ބައްދަލު ކުރި މެޗެވެ. ޓޭލާގެ ކެރިއަރުގައި އޭނާ ވަނީ ޖުމުލަ 831 މެޗުގައި ރެފްރީކަން ކޮށްފައި އެވެ. 

ރެފްރީ ކަމުން ރިޓަޔާ ކުރުމާ ގުޅޭ ގޮތުން ވާހަކަ ދައްކަމުން ޓޭލާ ބުނީ، އެންމެ މަތީ ފަންތީގައި ރެފްރީކަން ކުރުމަކީ އޭނާ އަށް ލިބުނު ވަރަށް ބޮޑު ޝަރަފެއް ކަމަށެވެ. ނަމަވެސް، މި ދާއިރާގައި އޮންނަ ޕްރެޝަރު ބޮޑު ވެފައި، އަބަދުވެސް މީހުންގެ ފާޑު ކިޔުންތަކާއި ފާރަވެރިވުން ކުރިމަތިވާ ކަމަށް އޭނާ ފާހަގަ ކުރި އެވެ. އެހެންކަމުން، މިއީ ރެފްރީ ކަމުން ދުރަށްޖެހި، ކެރިއަރުގެ އައު ބާބެއް ފެށުމަށް އެންމެ ރަނގަޅު ވަގުތު ކަމަށް އޭނާ ގަބޫލު ކުރެ އެވެ.

މީގެ އިތުރުން، އޭނާގެ އެހީތެރި ރެފްރީން ކަމަށްވާ ގޭރީ އާއި އެޑަމްގެ އިތުރުން، އޭނާގެ އާއިލާ އާއި ރެފްރީންގެ ދާއިރާގައި މަސައްކަތް ކުރާ ހުރިހާ ފަރާތްތަކުން ދިން އެއްބާރުލުމަށް ޓޭލާ ވަނީ ޝުކުރު އަދާކޮށްފައި އެވެ.

އިނގިރޭސި ޕްރިމިއާ ލީގުގައި 16 ސީޒަން ހޭދަކުރި ޓޭލާ ވަނީ އެ ލީގުގެ 432 މެޗެއްގައި ރެފްރީކަން ކޮށްފައި އެވެ. އޭނާ ވަނީ އިނގިރޭސިވިލާތުގެ ހުރިހާ މުހިންމު ކަޕް ފައިނަލްތަކެއްގައި އިންސާފު ކޮށްފައި އެވެ. މީގެ ތެރޭގައި 2017 އަދި 2020 ވަނަ އަހަރުގެ އެފްއޭ ކަޕް ފައިނަލް އާއި، 2015 ވަނަ އަހަރުގެ ލީގު ކަޕް ފައިނަލް އާއި، 2015 ވަނަ އަހަރުގެ ކޮމިއުނިޓީ ޝީލްޑްގެ އިތުރުން 2018 ވަނަ އަހަރުގެ ޗެމްޕިއަންޝިޕް ޕްލޭ އޮފް ފައިނަލް ހިމެނެ އެވެ.

ބައިނަލްއަގުވާމީ މައިދާނުގައި ޓޭލާ ވަނީ ފީފާގެ ލިސްޓުގައި 14 އަހަރު ހޭދަ ކޮށްފައި އެވެ. މި މުއްދަތުގެ ތެރޭގައި އޭނާ ވަނީ 2022 ވަނަ އަހަރާއި 2026 ވަނަ އަހަރުގެ ވޯލްޑް ކަޕްގައި އިންސާފު ކޮށްފައި އެވެ. އަދި 2020 ވަނަ އަހަރާއި 2024 ވަނަ އަހަރުގެ ޔޫރޯ މުބާރާތުގައި ވެސް އޭނާ އިންސާފު ކުރި އެވެ. 

ޓޭލާ ވަނީ 2022 ވަނަ އަހަރާއި 2025 ވަނަ އަހަރުގެ ކުލަބު ވޯލްޑް ކަޕްގައި ވެސް އިންސާފު ކޮށްފައި އެވެ. އޭނާ އިންސާފު ކުރި 163 ބައިނަލްއަގުވާމީ މެޗު ތަކުގެ ތެރޭގައި 2020 ވަނަ އަހަރުގެ ޔޫއެފާ ސުޕަ ކަޕް އާއި، 2021 ވަނަ އަހަރުގެ ޔުއެފާ ނޭޝަންސް ލީގު ފައިނަލް އާއި، 2022 ވަނަ އަހަރުގެ ކްލަބް ވޯލްޑް ކަޕް ފައިނަލް އަދި 2023 ވަނަ އަހަރުގެ ޔޫރޮޕާ ލީގު ފައިނަލް ފަދަ ބޮޑެތި މެޗުތައް ހިމެނެ އެވެ.