ތިން އަހަރުގެ އެއްބަސްވުމެއްގެ ދަށުން މާޓިނޭޒް ޗެލްސީ އަށް ބަދަލުވެއްޖެ

އެސްޓަން ވިލާ އަށް ކުޅެމުން އައި އާޖެންޓީނާގެ ޤައުމީ ޓީމުގެ ގޯލުކީޕަރު އެމިލިއާނޯ މާޓިނޭޒް، އިނގިރޭސި ކުލަބު ޗެލްސީ އަށް ސޮއިކޮށްފި އެވެ.

އުމުރުން 33 އަހަރުގެ މާޓިނޭޒް ޗެލްސީއާ ގުޅުނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. 2022 ވަނަ އަހަރުގެ ފީފާ ވޯލްޑް ކަޕް އާޖެންޓީނާ އަށް ކާމިޔާބު ކޮށްދިނުމުގައި މުހިންމު ދައުރެއް އަދާކުރި މާޓިނޭޒް ޗެލްސީ އަށް ސޮއިކުރުމަށްފަހު ބުނީ، އެފަދަ ބޮޑު ކުލަބަކާ ގުޅުމަކީ އޭނާ އާއި އޭނާގެ އާއިލާ އަށް ނިންމަން ވަރަށް ފަސޭހަ ނިންމުމެއް ކަމަށެވެ.

މާޓިނޭޒް އިތުރަށް ބުނި ގޮތުގައި އޭނާ އަކީ އަބަދު ވެސް ކާމިޔާބީ އަށް ލޯބިކުރާ، ކޮންމެ ކަމެއްގައި ވެސް މޮޅުވާން ބޭނުންވާ ކުޅުންތެރިޔެކެވެ. ޗެލްސީ އަކީ ތަށިތައް ކާމިޔާބުކުރާ ކުލަބަކަށް ވުމުން، އެއީ އޭނާގެ މިޒާޖާ ވަރަށް ގުޅޭ ކުލަބެއް ކަމަށް މާޓިނޭޒް ފާހަގަކުރި އެވެ. އަދި ކުލަބާއި ޓީމުގެ ކުޅުންތެރިންނާއި ސަޕޯޓަރުން ފަޚުރުވެރިވާ ފަދަ ކުޅުމެއް ދެއްކުމަށްޓަކައި ކޮންމެ މެޗެއްގައްޔާއި ކޮންމެ ތަމްރީނު ސެޝަނެއްގައި ވެސް 100 އިންސައްތަ މަސައްކަތް ކުރާނެ ކަމުގެ ޔަޤީންކަން އޭނާ ވަނީ ދީފަ އެވެ.

އާޖެންޓީނާގެ އިންޑެޕެންޑިއެންޓޭގެ ޒުވާން ޓީމުން ކެރިއަރު ފެށި މާޓިނޭޒް، އުމުރުން 17 އަހަރުގައި އާސެނަލްއާ ގުޅުނީ 2010 ވަނަ އަހަރުގެ އޮގަސްޓް މަހު އެވެ. އޭގެ ފަހުން ތަޖުރިބާ ހޯދުމަށް އެކި ކުލަބުތަކަށް ލޯނު އުސޫލުން ކުޅުމަށް ފަހު، އޭނާ އަށް އާސެނަލްގެ ފުރަތަމަ އެގާރަ އިން ޤަވާއިދުން ފުރުސަތު ލިބެން ފެށީ 2019/20 ވަނަ ސީޒަންގަ އެވެ. އެ ސީޒަނުގެ ފަހު 11 މެޗުގައި ކުޅެ، އޭނާ ވަނީ އާސެނަލް އާއެކު އެފްއޭ ކަޕް ކާމިޔާބުކޮށްފައި އެވެ. އަދި ޖެހިގެން އައި ސީޒަންގެ ކުރީކޮޅު ކޮމިއުނިޓީ ޝީލްޑު ކާމިޔާބު ކުރުމަށް ފަހު، 2020 ވަނަ އަހަރުގެ ސެޕްޓެމްބަރު މަހު އޭނާ އެސްޓަން ވިލާ އަށް ބަދަލުވި އެވެ.

އެސްޓަން ވިލާގައި ހޭދަކުރި ހަ ސީޒަނުގެ ތެރޭގައި މާޓިނޭޒް ވަނީ ދުނިޔޭގެ އެންމެ މޮޅު ކީޕަރުންގެ ތެރޭގައި ހިމެނިފަ އެވެ. އެ ކުލަބަށް ޖުމްލަ 256 މެޗު ކުޅެދީފައިވާއިރު، މިދިޔަ މެއި މަހު އޭނާ ވަނީ އެ ޓީމާ އެކު ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. މާޓިނޭޒްގެ ބައިނަލްއަޤުވާމީ ކެރިއަރަށް ބަލާއިރު، 2021 ވަނަ އަހަރުގެ ޖޫން މަހު އާޖެންޓީނާގެ ޤައުމީ ޓީމަށް ފުރަތަމަ މެޗު ކުޅެދިން ފަހުން އޭނާ ވަނީ އެ ޤައުމުގެ އެއް ވަނަ ކީޕަރުގެ މަގާމު ދަމަހައްޓާފަ އެވެ.

އާޖެންޓީނާގެ ޤައުމީ ޓީމަށް މިހާތަނަށް 67 މެޗު ކުޅެދީފައިވާ މާޓިނޭޒް ވަނީ އެ ޤައުމާއެކު 2021 އަދި 2024 ވަނަ އަހަރުގެ ކޮޕާ އެމެރިކާ ކާމިޔާބު ކުރުމުގެ އިތުރުން، 2022 ވަނަ އަހަރުގެ ވޯލްޑް ކަޕް ކާމިޔާބު ކޮށްފަ އެވެ. މި ކާމިޔާބީތަކާއެކު، ދުނިޔޭގެ އެންމެ މޮޅު ކީޕަރަށް ދޭ ޔާޝިން ޓްރޮފީ 2023 އަދި 2024 ވަނަ އަހަރުގެ ބެލެންޑިއޯ ހަފްލާގައި އޭނާ ވަނީ ހޯދައިފަ އެވެ.