ޕްރިމިއާ ލީގުގެ އެންމެ މޮޅު ކޯޗަކަށް އާޓެޓާ ހޮވިއްޖެ

އިނގިރޭސި ޕްރިމިއާ ލީގުގެ މި ސީޒަންގެ އެންމެ މޮޅު ކޯޗަކަށް، އާސެނަލް އަށް އިރުޝާދު ދެމުން އަންނަ މިކޭލް އާޓެޓާ ހޮވިއްޖެ އެވެ.

ޕްރިމިއާ ލީގުގެ އެންމެ މޮޅު ކޯޗުގެ މަގާމަށް އާޓެޓާ ހޮވިފައިވާއިރު، އޭނާގެ އިރުޝާދުގެ ދަށުން އާސެނަލް އިން ވަނީ ޕްރިމިއާ ލީގު ކާމިޔާބު ކޮށްފަ އެވެ. އެއީ އާސެނަލް އިން 22 އަހަރުގެ ދިގު އިންތިޒާރަކަށް ފަހު ޕްރިމިއާ ލީގު ކާމިޔާބު ކުރި ފުރަތަމަ ފަހަރެވެ. 2004 ވަނަ އަހަރު ޕްރިމިއާ ލީގު ކާމިޔާބު ކުރި ފަހުން، އާސެނަލް އަށް ޕްރިމިއާ ލީގު ކާމިޔާބު ކުރެވިފައި ނުވެ އެވެ.

އާޓެޓާގެ އިރުޝާދުގެ ދަށުން މި ސީޒަންގެ ޕްރިމިއާ ލީގުގައި އާސެނަލް އިން 38 މެޗު ކުޅެފައިވާއިރު، އޭގެ ތެރެއިން 26 މެޗުން އެ ޓީމު ވަނީ މޮޅުވެފަ އެވެ. ހަތް މެޗެއް އެއްވަރު ވެފައިވާއިރު، ފަސް މެޗަކުން ވަނީ ބަލިވެފަ އެވެ. އާސެނަލް އިން ޕްރިމިއާ ލީގު ކާމިޔާބު ކުރީ 85 ޕޮއިންޓާ އެކު އެވެ. 

އާސެނަލް އިން ޕްރިމިއާ ލީގު ކާމިޔާބު ކޮށްފައިވާއިރު، މި ސީޒަންގެ ޔުއެފާ ޗެމްޕިއަންސް ލީގު ކާމިޔާބު ކުރުމުގެ ފުރުސަތު ވެސް އެ ޓީމަށް އެބަ އޮތެވެ. އެގޮތުން މިފަހަރުގެ ޗެމްޕިއަންސް ލީގުގެ ފައިނަލްގައި އާސެނަލް ނިކުންނާނީ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ. އާސެނަލް އިން 2006 ވަނަ އަހަރުގެ ޗެމްޕިއަންސް ލީގުގެ ފައިނަލްގައި ކުޅުނު ނަމަވެސް، އެ ފަހަރު ވަނީ ބަލިވެފަ އެވެ.

އާސެނަލްގެ ކޯޗުކަމާ އާޓެޓާ ހަވާލުވީ 2019 ވަނަ އަހަރު އެވެ. އޭގެ ފަހުން އާސެނަލް އިން ރަނގަޅު ނަތީޖާ ތަކެއް ނެރެމުން އަންނައިރު، މިދިޔަ ސީޒަން ތަކުގައި ވެސް އާސެނަލް އިން ވަނީ ލީގު ރޭހުގައި ވާދަކޮށްފަ އެވެ.