ޔުނައިޓެޑުން ބްރައިޓަން ބަލިކުރި އިރު، ފެނާންޑޭސް އަށް ރެކޯޑެއް

އިނގިރޭސި ޕްރިމިއަރ ލީގުގައި ބްރައިޓަންއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ތިން ވަނައިގައި ސީޒަން ނިންމާލައިފި އެވެ.

ބްރައިޓަންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ޔުނައިޓެޑުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޔުނަައިޓެޑުން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. 

މެޗުގެ ފުރަތަމަ ހާފުގެ 33 ވަނަ މިނެޓުގައި ޔުނައިޓެޑަށް ލީޑު ނަަގައިދިނީ ޕެޓްރިކް ޑޯގޫ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކެޕްޓަން ބްރޫނޯ ފެނާންޑޭސް އެވެ. އެއާ އެކު، ފެނާންޑޭސް ވެފައި ވަނީ، ޕްރިމިއާ ލީގުގެ އެއް ސީޒަނެއްގައި އެންމެ ގިނަ އެސިސްޓް ހެދި ކުޅުންތެރިޔާ އަށެވެ. އޭނާ ވަނީ މި ސީޒަންގައި 21 އެސިސްޓް ހަދައިފަ އެވެ.

އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް ޔުނައިޓެޑުގެ ދެ ވަނަ ލަނޑު ޖެހީ ބްރަޔަން އެމްބުއޭމޯ އެވެ. މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ޔުނައިޓެޑުގެ ތިން ވަނަ ލަނޑު ޖަހަައި އިތުރަށް ލީޑު ފުޅާ ކޮށްދިނީ ފެނާންޑޭސް އެވެ. އެ ލަނޑު ޖަހަން ފެނާންޑޭސް އަށް ފުރުސަތު ތަނަވަސްކޮށްދިނީ ޑޯގޫ އެވެ. މީގެ އިތުރުން ފެނާންޑޭސް ވަނީ މި ސީޒަންގެ ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ. 

މައިކަލް ކެރިކްގެ އިރުޝާދުގެ ދަށުން ޔުނައިޓެޑުން ސީޒަން ނިންމާލީ ތިން ވަނައިގަ އެވެ. އެއީ ލީގުގައި އެ ޓީމު ކުޅެފައިވާ 38 މެޗުން 71 ޕޮއިންޓާ އެކު އެވެ. ޔުނައިޓެޑުގެ ވަގުތީ ކޯޗުކަމާ ކެރިކް ހަވާލުވެ، އޭނާ ވަނީ އެ ޓީމަށް އަންނަ ސީޒަންގެ ޔުއެފާ ޗެމްޕިއަންސް ލީގުގެ ޖާގައެއް ވެސް ހޯދައިދީފަ އެވެ. ޔުނައިޓެޑުން ވަނީ ކެރިކް އަށް ދެ އަހަރު ދުވަހުގެ ދާއިމީ އެއްބަސްވުމެއް ވެސް ދީފަ އެވެ.