މުސްލިމު ޤައުމުތަކުގެ އިޤްތިސާދީ ބާރު ވަރަށް ކުޑަ: އީރާންގެ ރައީސް ޕެޒެޝްކިއާން

މުސްލިމު ޤައުމުތަކުގެ އިޤްތިސާދީ ބާރު، އެ ޤައުމުތަކުގެ އާބާދީ އާއި ދުނިޔޭގެ ސިޔާސީ ބިންގަލުގައި އޮންނަ މުހިންމު ޖާގައާ އަޅާބަލާއިރު ވަރަށް ކުޑަ ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އެއާއެކު، މި ދާއިރާގައި ޤައުމުތަކުގެ ދެމެދުގައި އިތުރު އެއްބާރުލުން ބޭނުންވާ ކަމަށް ޕެޒެޝްކިއާން ވަނީ ފާހަގަ ކުރައްވައިފަ އެވެ. ޕެޒެޝްކިއާން މިހެން ވިދާޅުވީ، އީރާންގެ ވެރި ރަށް ތެހެރާންގައި ބޭއްވި ސާޅީސް ވަނަ ބައިނަލްއަޤުވާމީ އިސްލާމީ އެކުވެރިކަމުގެ ކޮންފަރެންސްގައި ވާހަކަ ދައްކަވަމުންނެވެ. 

އޯގެނައިޒޭޝަން އޮފް އިސްލާމިކް ކޯޕަރޭޝަންގެ މެންބަރު ޤައުމުތަކުގެ އަދަދު 57 ކަމަށާއި، އެ ޤައުމުތައް ދެކުނު އިރުމަތީ އޭޝިއާ އިން ފެށިގެން އެފްރިކާއާ ހަމައަށް ފެތުރިފައިވާ ކަމަށް ޕެޒެޝްކިއާން ވިދާޅުވި އެވެ. މި ޤައުމުތައް އޮންނަނީ މުހިންމު ކަނޑުގެ މަގުތަކާއި ބިންމަގުތަކުގެ މެދުތެރޭގައި ކަމަށާއި އެ ޤައުމުތަކުގައި ހުރީ އެނާޖީ ވަސީލަތާއި ޒުވާން އާބާދީ އާއި ބޮޑު ބާޒާރެއް ކަމަށް ވެސް ޕެޒެޝްކިއާން ވިދާޅުވި އެވެ.

މީގެ އިތުރުން ޕެޒެޝްކިއާން ވިދާޅުވީ 2024 ވަނަ އަހަރު މި ޤައުމުތަކުގެ އިޤްތިސާދު ނުވަ ޓްރިލިއަން ޑޮަލަރުގައި ހުރި ކަމަށެވެ. އެކަމަކު މިއީ ދުނިޔޭގެ އިޤްތިސާދުގެ 8.3 އިންސައްތަ ކަމަށާއި، މިއީ ވަރަށް ކުޑަ އިންސައްތައެއް ވެސް އޭނާ ފާހަގަ ކުރެއްވި އެވެ. 

މީގެ އިތުރުން ޕެޒެޝްކިއާން ވިދާޅުވީ، މި ޤައުމުތަކުގެ އެކްސްޕޯޓުގެ އެންމެ 19 އިންސައްތަ ދެމިގެންދަނީ މި ގުރޫޕުގެ ތެރޭގައި ކަމަށެވެ. ބާކީ އޮންނަ ބައި ދަނީ އޯއައިސީ އިން ބޭރުގެ ޤައުމުތަކަށް ކަމަށް ވެސް އޭނާ ވިދާޅުވި އެވެ. އެހެންކަމުން މުސްލިމު ޤައުމުތަކުގެ ދެމެދުގައި ވިޔަފާރީގެ އަދަދު އިތުރު ކުރަން ޕެޒެޝްކިއާން ވަނީ ގޮވާލައްވައިފަ އެވެ. 

މި ކޮންފަރެންސްގައި މުސްލިމު ދުނިޔޭގެ އިސްވެރިންނާއި ދީނީ އިލްމުވެރިން ބައިވެރިވެ ވަޑައިގެންނެވި އެވެ. ކޮންފަރެންސްގެ މައިގަނޑު މަގުސަދަކީ މުސްލިމު ޤައުމުތަކުގެ ދެމެދުގައި އެކުވެރިކަން ބަދަހިކުރުމާއި، އެ ޤައުމުތަކުން ކުރިމަތިވާ ގޮންޖެހުންތަކަށް ހައްލު ހޯދުމެވެ.