ޓްރަމްޕްގެ މަންދޫބެއްގެ ގޮތުގައި ޕާކިސްތާންގެ އަސްކަރީ އިސްވެރިޔާ އީރާން އަށް ވަޑައިގެންނެވި ކަމަށް ދެކެވޭ ވާހަކަ ދޮގުކޮށްފި

އެމެރިކާގެ ރައީސް ޑޮނަލްޑް ޓްރަމްޕްގެ މަންދޫބެއްގެ ގޮތުގައި ޕާކިސްތާންގެ އަސްކަރިއްޔާގެ އިސްވެރިޔާ ފީލްޑު މާޝަލް އާސިމް މުނީރު އީރާން އަށް ވަޑައިގެންނެވި ކަމަށް ދެކެވޭ ވާހަކަ، ޕާކިސްތާންގެ ސަރުކާރުން ދޮގުކޮށްފި އެވެ. 

ޕާކިސްތާން އިން ބުނީ މި ޚަބަރުތަކަކީ ހަގީގަތާ ޚިލާފު އަދި އާންމުންނަށް އޮޅޭގޮތަށް ފަތުރާފައިވާ މައުލޫމާތުތަކެއް ކަމަށެވެ.

Advertisement

ޕާކިސްތާންގެ ފޮރިން އޮފީހުގެ ތަރުޖަމާނު ތާހިރު އަންދްރާބީ ބުރާސްފަތި ދުވަހު ބޭއްވި ހަފުތާގެ ނޫސްވެރިންގެ ބައްދަލުވުމުގައި ވިދާޅުވީ، އޮގަސްޓް މަހުގެ 24 ވަނަ ދުވަހު އާސިމް މުނީރު އީރާން އަށް ކުރެއްވި ދަތުރުފުޅަކީ ހަމައެކަނި މެދުވެރިއެއްގެ ގޮތުން ޕާކިސްތާން އިން އަދާކުރަމުންދާ ދައުރުގެ ތެރެއިން ކުރެއްވި ދަތުރުފުޅެއް ކަމަށެވެ.

މި ދަތުރުފުޅަކީ އެމެރިކާގެ ރިޔާސީ ގަނޑުވަރު ވައިޓް ހައުސް އާއި އީރާންއާ ދެމެދު އުފެދިފައިވާ ޚިޔާލު ތަފާތުވުންތައް ކުޑަ ކުރުމަށް ޕާކިސްތާން އިން ކުރަމުންދާ އިޚުލާސްތެރި މަސައްކަތްތަކުގެ ބައެއް ކަމަށް އޭނާ ފާހަގަ ކުރެއްވި އެވެ.

މި ދަތުރުފުޅުގައި އާސިމް މުނީރު ވަނީ އީރާންގެ ރައީސް މަސްއޫދު ޕެޒެޝްކިއާންގެ އިތުރުން، އެ ޤައުމުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ މަންދޫބާއި، ޤާނޫނު ހަދާ މަޖިލީހުގެ ރައީސް އާއި، ފޮރިން މިނިސްޓަރު އަދި ޑިފެންސް މިނިސްޓަރާ ބައްދަލު ކުރައްވާފައި އެވެ. ތަރުޖަމާނު ވިދާޅުވި ގޮތުގައި، ސަރަހައްދީ ހަމަޖެހުމަށް ޕާކިސްތާން އިން ކުރަމުންދާ މަސައްކަތްތަކަށް އީރާންގެ ލީޑަރޝިޕް އިން ވަނީ ވަރަށް ބޮޑަށް ތައުރީފުކޮށްފައި އެވެ.

ޕާކިސްތާންގެ އަސްކަރިއްޔާގެ މީޑިއާ ގޮފިން ނެރުނު ބަޔާނެއްގައި ބުނެފައި ވަނީ، އީރާންގެ އޮފިޝަލުން ޕާކިސްތާންގެ ބިނާކުރުވަނިވި ދައުރާއި، އިޚުލާސްތެރި މަސައްކަތްތައް ބަލައިގެންފައިވާ ކަމަށެވެ. މީގެ އިތުރުން، އީރާންގެ ރައީސްގެ އޮފީހުގެ އޮފިޝަލަކު ވިދާޅުވީ، މި ދަތުރުފުޅަކީ ވަރަށް ކާމިޔާބު އަދި ޑިޕްލޮމެޓިކް ގޮތުން އަގުހުރި ނަތީޖާތަކެއް ލިބިގެން ދިޔަ ދަތުރުފުޅެއް ކަމަށެވެ.

އީރާންގެ އޮފިޝަލުން އިތުރަށް ހާމަކުރެއްވި ގޮތުގައި، މި ދަތުރުފުޅުގެ ސަބަބުން ނުކުންނާނެ ހެޔޮ ނަތީޖާތައް ވަރަށް އަވަހަށް ފެންނަން ފަށާނެ އެވެ. ޕާކިސްތާން އިން މިކަން ސާފުކޮށްދީފައި މި ވަނީ، އެމެރިކާގެ ރައީސް ޑޮނަލްޑް ޓްރަމްޕް އަލުން އިންތިޚާބުވެ ވަޑައިގަތުމާ ގުޅިގެން، އޭނާގެ މަންދޫބެއްގެ ގޮތުގައި ޕާކިސްތާންގެ އަސްކަރީ ވެރިޔާ މަސައްކަތް ކުރައްވާ ކަމަށް ބައިނަލްއަޤުވާމީ ބައެއް މީޑިއާތަކުން ރިޕޯޓުކޮށްފައިވާ ދަނޑިވަޅެއްގައި އެވެ.