ޓްރަމްޕް ކިމްއާ ބައްދަލުކުރައްވާނެ ކަމަށް ވިދާޅުވިތަނާ އުތުރު ކޮރެއާއިން 10 މިސައިލް ފޮނުވާލައިފި

އެމެރިކާގެ ރައީސް ޑޮނަލްޑް ޓްރަމްޕް، އުތުރު ކޮރެއާގެ ލީޑަރު ކިމް ޖޮންގް އުންއާ މިއަހަރުގެ ފަހުކޮޅު ބައްދަލުކުރައްވާނެ ކަމަށް ވިދާޅުވިތާ މަދު ގަޑިއިރުތަކެއްގެ ތެރޭގައި، އުތުރު ކޮރެއާއިން ކުރު ރާސްތާގެ 10 ވަރަކަށް ބެލިސްޓިކް މިސައިލް ފޮނުވާލާފައިވާ ކަމަށް ދެކުނު ކޮރެއާގެ އަސްކަރިއްޔާއިން ބުރާސްފަތި ދުވަހު ބުނެފި އެވެ.

ސޯލްގެ ޖޮއިންޓް ޗީފްސް އޮފް ސްޓާފްގެ އޮފިޝަލަކު އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، އުތުރު ކޮރެއާގެ ވެރިރަށް ޕިޔޮންގްޔަންގް ސަރަހައްދުން ކުރު ރާސްތާގެ 10 ވަރަކަށް ބެލިސްޓިކް މިސައިލް ފޮނުވާލާފައިވާ ކަމަށެވެ.

ޖަޕާނުގެ ބޮޑުވަޒީރުގެ އޮފީހުން އެކްސްގައި ކުރި ޕޯސްޓެއްގައި ބުނެފައިވަނީ، އުތުރު ކޮރެއާއިން ފޮނުވާލާފައިވަނީ ބެލިސްޓިކް މިސައިލެއް ކަމަށް ބެލެވޭ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވައިޓް ހައުސްގައި ނޫސްވެރިންނާ ވާހަކަދައްކަވަމުން ވިދާޅުވީ، އޭނާގެ ފުރަތަމަ ދައުރުގައި ނިއުކްލިއާ ހަތިޔާރު އުފައްދާ އުތުރު ކޮރެއާގެ ލީޑަރާއެކު އުފެއްދެވި ގާތް ގުޅުން އަލުން އާލާކުރުމުގެ ގޮތުން ކިމް ޖޮންގް އުންއާ ބައްދަލުކުރައްވާނެ ކަމަށެވެ.

މީގެ އިތުރުން، ކިމްއާ އެކު ގުޅުން ބޭއްވުމަކީ މުހިންމު ކަމެއް ކަމަށް ޓްރަމްޕް ވިދާޅުވި އެވެ. އަދި އާދަޔާ ހިލާފު މައުލޫމާތެއް ހިއްސާކުރައްވަމުން ޓްރަމްޕް ވިދާޅުވީ، ޕިޔޮންގްޔަންގްގެ އަތުގައި މިހާރު ވަރަށް ބާރުގަދަ 57 ނިއުކްލިއާ ހަތިޔާރު އެބަހުރި ކަމަށެވެ.

ޓްރަމްޕް ކުއްލިއަކަށް ކިމްއަށް ސަމާލުކަން ދެއްވަން ފެއްޓެވުމާއި، އެމެރިކާއާއި ދެކުނު ކޮރެއާ ގުޅިގެން ބާއްވާ އަސްކަރީ ތަމްރީނުތައް މަދުކުރެއްވުމާ ގުޅިގެން އޭޝިއާގެ ބައިވެރިންގެ މެދުގައި ވަނީ ކަންބޮޑުވުން އުފެދިފަ އެވެ. އަދި މިއީ އީރާނާއެކު ކުރާ ހަނގުރާމަ މަޑުޖެހިފައިވާ ދަނޑިވަޅެއްގައި، ބޭރުގެ ސިޔާސަތުގެ ދާއިރާއިން ކާމިޔާބީއެއް ހޯއްދެވުމަށް ޓްރަމްޕް ކުރައްވާ ކަމެއް ކަމަށް ވެސް ބައެއް ފަރާތްތަކުން ތުހުމަތު ކުރެ އެވެ.

އުތުރު ކޮރެއާގެ ލީޑަރު ކިމް ޖޮންގް އުންގެ ނުފޫޒުގަދަ ކޮއްކޮ، ކިމް ޔޯ ޖޮންގް ބުދަ ދުވަހު ވިދާޅުވީ، އޭނާގެ ބޭބެއާއި ޓްރަމްޕާ ދެމެދު މުއާމަލާތްތަކެއް ހިނގާފައިވާ ކަމަށް ބުނާ ރިޕޯޓުތަކާ ބެހޭ އެއްވެސް މައުލޫމާތެއް އޭނާއަށް އެނގިފައި ނުވާ ކަމަށެވެ.

އެހެންނަމަވެސް، ކިމް ޔޯ ޖޮންގް ވިދާޅުވީ ޓްރަމްޕާ މެދު އޭނާގެ ބޭބެގެ ހިތުގައި އަދިވެސް ރަނގަޅު ހަނދާންތަކާއި ޝުއޫރުތަކެއް އެބަހުރި ކަމަށާއި، ދެ ލީޑަރުންގެ މެދުގައި އޮތް ގުޅުން އަދިވެސް އޮތީ ވަރަށް ރަނގަޅު ފެންވަރެއްގައި ކަމަށެވެ.

ބުދަ ދުވަހުގެ ކުރީކޮޅު ސޯލްގެ އަސްކަރިއްޔާއިން ބުނެފައިވަނީ، އެމެރިކާގެ ހުށަހެޅުމަކަށް، ކުރިން އޮގަސްޓް 27 ގައި ނިންމާލުމަށް ހަމަޖެހިފައި އޮތް އަސްކަރީ ތަމްރީނުތައް މި ހުކުރު ދުވަހު ނިންމާލާނެ ކަމަށެވެ.

ދެކުނު ކޮރެއާގެ ޑިފެންސް މިނިސްޓަރު ބުރާސްފަތި ދުވަހު ވިދާޅުވީ، އުތުރު ކޮރެއާގެ އަތުގައި 80 އާއި 120 އާ ދެމެދުގެ އަދަދަކަށް ނިއުކްލިއާ ހަތިޔާރު ހުންނާނެ ކަމަށް ލަފާކުރެވޭ ކަމަށެވެ.