އީރާންއާ ދެކޮޅަށް "ވަރުގަދަ އިޤްތިސާދީ އޮޕަރޭޝަނެއް" ފައްޓަވާނެ ކަމަށް ޓްރަމްޕް އިއުލާނު ކުރައްވައިފި

އީރާންއާ ދެކޮޅަށް "ވަރުގަދަ އިޤްތިސާދީ އޮޕަރޭޝަނެއް" ފައްޓަވާނެ ކަމަށް އިއުލާނު ކުރައްވައި، އެ ޤައުމާ އެކު ވިޔަފާރީގެ މުއާމަލާތްތައް ކުރާ ޤައުމުތަކަށް ބޮޑެތި ގެއްލުންތަކެއް ކުރިމަތިވާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.

މިއީ އީރާން އާއި އެމެރިކާއާ ދެމެދު އުފެދިފައިވާ ހަމަނުޖެހުންތަކުގެ ތެރެއިން، އީރާންގެ އިޤްތިސާދީ އިނދަ ޖައްސާލުމަށް އެމެރިކާ އިން ގެންގުޅޭ ސިޔާސަތު އިތުރަށް ވަރުގަދަ ކުރުމުގެ ގޮތުން ނިންމެވި ނިންމެވުމެކެވެ.

ޓްރަމްޕް ވިދާޅުވި ގޮތުގައި އީރާންގެ އިޤްތިސާދީ ހަރަކާތްތައް ހުއްޓުވުމަށްޓަކައި އެޅޭ މި ފިޔަވަޅުތަކަކީ އެ ޤައުމަށް އިންތިހާ އަށް ނޭދެވޭ އަސަރުތަކެއް ކުރާނެ ކަންކަމެވެ. އަދި އީރާން އާއެކު ވިޔަފާރީގެ ގުޅުން ބާއްވާ ކޮންމެ ޤައުމަކަށް ވެސް އެމެރިކާ އިން ކުރިމަތިކުރާ އިޤްތިސާދީ ހުރަސްތަކާއި ބޮޑެތި ޖޫރިމަނާތަކާ ކުރިމަތިލާން ޖެހޭނެ ކަމަށް އޭނާ ވަނީ ވިދާޅުވެފައި އެވެ.

ޓްރުތު ސޯޝަލްގައި ޓްރަމްޕް ކުރައްވާފައިވާ ޕޯސްޓު | ސޯޝަލް މީޑިއާ

މި އައު ސިޔާސަތުގެ ދަށުން އީރާންގެ ތެލުގެ ވިޔަފާރި އާއި ބޭރުގެ މުއާމަލާތްތައް ކުރުމަށް ހުރި މަގުތައް ބަންދު ކުރުމަށް ވަނީ ރޭވިފައި އެވެ. މީގެ އިތުރުން، އީރާން އަށް މާލީ ގޮތުން އެހީތެރިކަން ފޯރުކޮށްދޭ ނުވަތަ، އެ ޤައުމުގެ އުފެއްދުންތައް ގަންނަ ޤައުމުތަކަށް އެމެރިކާގެ ބާޒާރު ތަކުގައި ހުރަސްތައް ކުރިމަތިކުރުވައި، ޓެރިފް ނުވަތަ ޑިއުޓީ ބޮޑު ކުރުމަށް ވެސް ވަނީ ނިންމާފައި އެވެ.

މި ނިންމެވުމާއެކު، މެދުއިރުމަތީގެ މަސްރަހު އިތުރަށް ގޯސްވެ، ބައިނަލްއަޤުވާމީ ބާޒާރުގައި ތެލުގެ އަގަށް ބަދަލުތަކެއް އަތުވެދާނެ ކަމަށް މާހިރުން ލަފާ ކުރެ އެވެ. ޓްރަމްޕްގެ މި އިންޒާރަކީ އީރާންގެ ނިއުކްލިއާ މަޝްރޫއު އާއި އެ ސަރަހައްދުގައި އީރާން އިން ހިންގާ ހަރަކާތްތައް ހުއްޓުވުމަށް އެމެރިކާ އިން ގެންގުޅޭ "މެކްސިމަމް ޕްރެޝަރ" ނުވަތަ އެންމެ މަތީ ދަރަޖައިގެ ފިއްތުންތައް ކުރިމަތި ކުރުވުމުގެ ސިޔާސަތުގެ ބައެކެވެ.

އީރާން އިން މިކަމާ ގުޅޭ ގޮތުން ރަސްމީކޮށް ވަކި އެއްޗެއް ބުނެފައި ނުވި ނަމަވެސް، އެމެރިކާގެ މިފަދަ ފިޔަވަޅުތަކަކީ ބައިނަލްއަޤުވާމީ ޤާނޫނުތަކާ ޚިލާފު ކަންކަން ކަމަށް އީރާން އިން މީގެ ކުރިން ބުނަމުން އައިސްފައިވެ އެވެ. ޓްރަމްޕްގެ ވެރިކަމުގެ ދެވަނަ ދައުރުގައި އީރާންއާ މެދު ގެންގުޅޭ ހަރުކަށި ސިޔާސަތުތަކުގެ ސަބަބުން، ކުރިއަށް އޮތް ދުވަސްތަކުގައި ދެ ޤައުމުގެ ގުޅުން އިތުރަށް ގޯސްވެގެންދާނެ ކަމަށް ބެލެވެ އެވެ.