ޣައްޒާ އާރާސްތުކުރުމުގެ އެއްވެސް ކަމެއް ކުރާނީ ހަމާސްގެ ހަތިޔާރު މުޅިން އަތުލުމުން ކަމަށް އިސްރާއީލުން ބުނެފި

އިސްރާއީލުން ފުނޑުފުނޑުކޮށްލާފައިވާ ޣައްޒާ އަލުން އާރާސްތުކުރުމުގެ އެއްވެސް މަސައްކަތެއް ފަށާނީ އެ ހަމާސް ޖަމާއަތުގެ އަތުން އެއްކޮށް ހަތިޔާރު އަތުލުމުން ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުރާސްފަތި ދުވަހު ސާފުކޮށްދީފި އެވެ.

އިސްރާއީލުގެ މީޑިއާތަކުން ރިޕޯޓްކޮށްފައިވާ ގޮތުގައި، ޣައްޒާގައި ބައިނަލްއަގުވާމީ ސުލްހަ ބަލަހައްޓާ ފައުޖުތަކެއް ގާއިމުކުރުމަށް އިސްރާއީލުން އެއްބަސްވެފައިވާ ކަމަށް ދެކެވޭ ވާހަކަތައް ވެސް ނަތަންޔާހޫގެ އޮފީހުން ވަނީ ދޮގުކޮށްފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ޖުލައި މަހުގެ ފަހުކޮޅު ވިދާޅުވި ގޮތުގައި ޣައްޒާގެ މައްސަލައިގައި ބޮޑު ކުރިއެރުމެއް ލިބިފައިވީ ނަމަވެސް، ޓްރަމްޕް ހުށަހެޅުއްވި "ރޯޑްމެޕް" ނުވަތަ މަގުޗާޓު ތަންފީޒުކުރުމުގެ މަސައްކަތްތައް ވަނީ ހުއްޓުމަކަށް އައިސްފަ އެވެ.

ހަމާސް ޖަމާއަތުން ބުނެފައިވަނީ އެ މަގުޗާޓު ގަބޫލުކުރާ ކަމަށެވެ. ނަމަވެސް އެކަން ތަންފީޒުކުރެވޭނީ އިސްރާއީލު ސިފައިން ޣައްޒާއިން ފޭބުމާއި، އިސްރާއީލުން ދެމުންދާ ހަމަލާތައް ހުއްޓާލުމުން ކަމަށް އެ ޖަމާއަތުން ޝަރުތުކުރެ އެވެ. އެހެންނަމަވެސް، އިސްރާއީލުން ބުނަމުންދަނީ ހަމާސްގެ ހަތިޔާރު އެއްކޮށް އަތުލައި ނިމުމުގެ ކުރިން ޣައްޒާ އާރާސްތުކުރުމުގެ މަސައްކަތް ފެށުމަށް ހުއްދަ ނުދޭނެ ކަމަށެވެ.

އިސްރާއީލުގެ ހަމަލާތަކުގެ ސަބަބުން ސުންނާފަތިވެފައިވާ ޣައްޒާ އަލުން އާރާސްތުކުރުމަށް އެމެރިކާއިން އެކުލަވާލާފައިވާ ޕްލޭނުގެ ދަށުން، އެ ސަރަހައްދުގައި ގާއިމުކުރާ ސުލްހަ ބަލަހައްޓާ ފައުޖަށް އެހީތެރިވުމުގެ ގޮތުން 206 މިލިއަން ޑޮލަރަށް ވުރެ ގިނަ ފައިސާ ހަމަޖެއްސުމަށް ގަސްދުކުރާކަން ޓްރަމްޕްގެ ސަރުކާރުން ވަނީ ކޮންގްރެސްއަށް އަންގާފަ އެވެ. މިއީ މި މަޝްރޫއަށް އެމެރިކާއިން ކަނޑައެޅި ފުރަތަމަ ބޮޑު ބަޖެޓެވެ.

ރޮއިޓާސްއިން ރިޕޯޓްކޮށްފައިވާ ގޮތުގައި، ޖުލައި 30 ވަނަ ދުވަހު އެމެރިކާގެ ސްޓޭޓް ޑިޕާޓްމަންޓުން ކޮންގްރެސްއަށް ފޮނުވި ދެ ނޯޓިފިކޭޝަނެއްގައި ބުނެފައިވަނީ، ޣައްޒާގައި ގާއިމުކުރާ ބައިނަލްއަގުވާމީ ފައުޖަށް ބޭނުންވާ ސާމާނާއި، އުމްރާނީ ވަސީލަތްތަކާއި، އުޅަނދުފަހަރުގެ އިތުރުން ހިންގުމުގެ ޚަރަދުތަކަށް 200 މިލިއަން ޑޮލަރު ހޭދަކުރާނެ ކަމަށެވެ.

މީގެ އިތުރުން، އެ ފައުޖުގެ ބޭނުމަށް އެމެރިކާގެ އާމަޑް ވެހިކަލްތައް މަރާމާތުކޮށް ބަދަލުތައް ގެނައުމަށް 6.3 މިލިއަން ޑޮލަރު ހޭދަކުރުމަށް ވަނީ ނިންމާފަ އެވެ.

ސްޓޭޓް ޑިޕާޓްމަންޓުން ބުނި ގޮތުގައި، މި ފައުޖުން ސަލާމަތީ ކަންކަން ބެލެހެއްޓުމާއި، ހަތިޔާރު އަތުލުމުގެ މަރުހަލާއަށް އެހީތެރިވުމުގެ އިތުރުން، ޣައްޒާއަށް ބޭނުންވާ އިންސާނީ އެހީއާއި އާރާސްތުކުރުމަށް ބޭނުންވާ ތަކެތި ރައްކާތެރިކަމާއެކު ފޯރުކޮށްދިނުމުގައި އެހީތެރިވާނެ އެވެ. ނަމަވެސް މި ފައުޖު އެކުލެވިގެންވާ ގޮތުގެ އެންމެ ފަހުގެ އޮނިގަނޑާ މެދު އަދިވެސް ދަނީ މަޝްވަރާ ކުރެވެމުންނެވެ.

ހަނގުރާމަ ހުއްޓާލައި ޣައްޒާ އަލުން އާރާސްތުކުރުމުގެ މަސައްކަތްތައް ބެލެހެއްޓުމަށްޓަކައި ރައީސް ޓްރަމްޕް ވަނީ މީގެ ކުރިން "ބޯޑް އޮފް ޕީސް" ގެ ނަމުގައި އިދާރާއެއް އުފައްދަވާފަ އެވެ. މި މަގުޗާޓުގައިވާ ގޮތުން، އިސްރާއީލު ސިފައިން ފައިބާ ސަރަހައްދުތަކުގެ ސަލާމަތީ ކަންކަން ބައިނަލްއަގުވާމީ ފައުޖަކުން ބަލަހައްޓާނެ އެވެ. އަދި ފަލަސްތީނުގެ އާ ފުލުހުން ތަމްރީނުކުރުމާއި އެހީ ފޯރުކޮށްދިނުމުގެ މަސައްކަތްތަކަށް ވެސް އެ ފައުޖުން އެހީތެރިކަން ފޯރުކޮށްދޭނެ އެވެ.

އެހެން ނަމަވެސް އިސްރާއީލުން ތަކުރާރުކޮށް ހުރަސްއެޅުމުގެ ސަބަބުން މި ޕްލޭން ކުރިއަށްދާނެ ކަމާމެދު މިހާރު ވަނީ ސުވާލު އުފެދިފަ އެވެ.