އެމެރިކާއިން އެކުލަވާލި ޣައްޒާގެ ސުލްހައިގެ ޕްލޭން އިސްރާއީލުން ގަބޫލު ނުކުރާނެ ކަމަށް ބުނެ ބޭރުކޮށްލައިފި
9 އޯގަސްޓު 2026 | އާދީއްތަ 11:46ޣައްޒާގައި ސުލްހަ ގާއިމުކުރުމަށް އެމެރިކާއިން ހުށަހެޅި 15 ނުކުތާގެ ޕްލޭނަށް އަމަލުކުރަން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އިންކާރު ކުރައްވައިފި. ހަމާސްގެ ހަތިޔާރުތައް އެއްކޮށް އަތުލައި ނިމެންދެން އަސްކަރިއްޔާ ފަހަތަށް ނުޖެހޭނެ ކަމަށާއި، އޭނާގެ ވެރިކަމެއްގައި ފަލަސްތީނުގެ މިނިވަން ދައުލަތެއް ގާއިމުކުރަން ފުރުސަތު ނުދެއްވާނެ ކަމަށްވެސް ނަތަންޔާހޫ ވިދާޅުވި
އެމެރިކާގެ ރައީސް ޑޮނަލްޑް ޓްރަމްޕް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ 2025 ޑިސެމްބަރު 29 ގައި މާ-އަ-ލާގޯ ކްލަބުގައި ބައްދަލުކުރައްވަނީ | ގެޓީ އިމޭޖަސް
ޣައްޒާގައި ސުލްހަ ގާއިމުކުރުމުގެ ދެވަނަ މަރުހަލާއަށް ދިއުމަށް އެމެރިކާއިން އެކުލަވާލި އެންމެ ފަހުގެ ޕްލޭން އިސްރާއީލުން ގަބޫލު ނުކުރާނެ ކަމަށް ބުނެ ބޭރުކޮށްލައިފި އެވެ. އިސްރާއީލުން ބުނަމުންދަނީ އެ ގައުމުގެ ސިފައިން ޣައްޒާއިން ފޭބުމުގެ ކުރިން ހަމާސްގެ ހަތިޔާރުތައް އެއްކޮށް އަތުލައި، އެ ޖަމާއަތް ނައްތާލަން ޖެހޭނެ ކަމަށެވެ.
އާދީއްތަ ދުވަހު ބޭއްވި ކެބިނެޓް ބައްދަލުވުމެއް ފައްޓަވަމުން ބޮޑުވަޒީރު ބެންޖަމިން ނަތަންޔާހޫ ވިދާޅުވީ، އެމެރިކާއިން ހުށަހަޅާފައިވާ 15 ނުކުތާގެ މައްޗަށް އެކުލެވޭ ލިޔުމަށް އިސްރާއީލުން އިންކާރު ކުރާ ކަމަށެވެ.
ނަތަންޔާހޫ ވިދާޅުވީ ހަމާސްގެ ހަތިޔާރުތައް ހަގީގީ މާނައިގައި އަތުލައި ނިމެންދެން އިސްރާއީލުގެ އަސްކަރިއްޔާއިން ޣައްޒާއިން އެއްވެސް މިންވަރަކަށް ފަހަތަށް ނުޖެހޭނެ ކަމަށެވެ. އަދި އިސްރާއީލުގެ ސިފައިންނާއި ރައްޔިތުންނަށް ކުރިމަތިވާ ނުރައްކާތައް ހުއްޓުވުމުގައި އެ ގައުމުގެ އަސްކަރިއްޔާ ދެމިއޮންނާނެ ކަމަށްވެސް އޭނާ ވިދާޅުވި އެވެ.
"ހަމާސްގެ ހަތިޔާރު އަތުލުމޭ ބުނާ ބަހުގެ މާނައަކީ ބޮޑެތި ހަތިޔާރާއި، ކުދި ހަތިޔާރާއި، ހުރިހާ ބާވަތެއްގެ ހަތިޔާރެއް އަތުލުން. އަދި އަޅުގަނޑުމެން މި ވާހަކަ ދައްކަނީ ހަމައެކަނި ދެއްކުންތެރިކަމެއްގެ ގޮތުން ހަތިޔާރު އަތުލުމުގެ ވާހަކައެއް ނޫން، އެއީ ހަގީގީ މާނައިގައި ހަތިޔާރު އަތުލުން،" ނަތަންޔާހޫ ވިދާޅުވި އެވެ.
މީގެ އިތުރުން ނަތަންޔާހޫ ވިދާޅުވީ މި މައްސަލައިގައި އެމެރިކާއާއެކު މިހާރު މަޝްވަރާ ކުރަމުންދާ ކަމަށެވެ. އަދި އެމެރިކާގެ ހުށަހެޅުންތަކުގެ ތެރޭގައި އިސްރާއީލަށް ގަބޫލުކުރެވޭ ކަންތައްތަކާއި ގަބޫލުނުކުރެވޭ ކަންތައްތައް ހުރި ނަމަވެސް، ގަބޫލުނުކުރެވޭ ކަންކަމާ ދެކޮޅަށް ތެދުވާން އިސްރާއީލަށް އެނގޭނެ ކަމަށް އޭނާ ވިދާޅުވި އެވެ.
"އަޅުގަނޑު ބޮޑުވަޒީރުކަމުގެ މަގާމުގައި ހުރިހާ ހިނދަކު، ފަލަސްތީނުގެ ދައުލަތެއް ގާއިމެއް ނުކުރެވޭނެ. އެއީ ޣައްޒާގައި ކަމަށްވިޔަސް ނުވަތަ ހުޅަނގު އައްސޭރީގައި ކަމަށްވިޔަސް،" ނަތަންޔާހޫ ވިދާޅުވި އެވެ.
ޖުލައި މަހުގެ ފަހުކޮޅު އެމެރިކާގެ ރައީސް ޑޮނަލްޑް ޓްރަމްޕް ވަނީ ހަމާސްއާއި ޣައްޒާގައި ހަރަކާތްތެރިވާ އެހެނިހެން ހަތިޔާރު އެޅި ޖަމާއަތްތަކުގެ ހަތިޔާރު އަތުލުމަށް ތާރީޚީ އެއްބަސްވުމެއް ގާއިމުކުރެވިފައިވާކަން އިއުލާން ކުރައްވާފަ އެވެ. މިއީ އެމެރިކާ މެދުވެރިއެއްގެ ދައުރު އަދާކޮށްގެން ހަމާސްއާއި އިސްރާއީލާ ދެމެދު ހަމަލާ ބަދަލުކުރުން ހުއްޓާލުމުގެ އެއްބަސްވުމެއް ރައީސް ޓްރަމްޕް ފުރަތަމަ އިއުލާން ކުރެއްވިތާ މަސްތަކެއް ފަހުން ވީ އިިއުލާނެކެވެ.
ހަމާސްއިން ބުނަމުންދަނީ އެ އެއްބަސްވުމަށް އަމަލުކުރާނީ އިސްރާއީލުން ޣައްޒާއަށް ދޭ ހަމަލާތައް ހުއްޓާލައި، އޮކްޓޯބަރު މަހުގެ ހަމަލާ ބަދަލުކުރުން ހުއްޓާލުމުގެ އެއްބަސްވުމުގައި ކަނޑައަޅާފައިވާ "ރީނދޫ ރޮނގާ" ހަމައަށް އިސްރާއީލުގެ ސިފައިން ފަހަތަށް ޖެހުމުން ކަމަށެވެ.
