ޣައްޒާ ސުލްހައިގެ ރޯޑްމެޕަށް އިސްރާއީލުން ފާޅުގައި ދެކޮޅުހަދާތީ އިސްލާމީ 8 ގައުމަކުން އެކަން ކުށްވެރިކޮށްފި
17 އޯގަސްޓު 2026 | ހޯމަ 01:11ޣައްޒާގެ ހަނގުރާމަ ހުއްޓާލުމަށް އެމެރިކާއިން ހުށަހެޅި ސުލްހައިގެ މަޝްރޫއަށް ހަމާސްއިން އެއްބަސްވި ނަމަވެސް، އިސްރާއީލުން އެ ރޭވުމަށް އިންކާރުކޮށް ފަލަސްތީނުގެ މިނިވަން ދައުލަތެއް ގާއިމުކުރުމާ ދެކޮޅުހަދާތީ އިސްލާމީ އަށް ގައުމަކުން އެކަން ކުށްވެރިކޮށްފި. މި ގައުމުތަކުން ނެރުނު ބަޔާނުގައި އިސްރާއީލުގެ އަމަލުތަކަކީ ދެމެހެއްޓެނިވި ސުލްހައެއް ގާއިމުކުރުމަށް އެޅޭ ހުރަހެއްގެ ގޮތުގައި ވަނީ ސިފަކޮށްފައި
2026 އޮގަސްޓް މަހުގެ 15 ވަނަ ދުވަހު، ޣައްޒާގެ ޝެއިޚް ރަޟްވާން އަވަށުގައި ހަލާކުވެފައިވާ އިމާރާތްތަކުގެ ކުނިތަކުން ފުރިފައިވާ މަގަކުން ފަލަސްތީނުގެ އަންހެނަކު ކުޑަކުދިންތަކަކާއެކު ހިނގާފައި ދަނީ. | ގެޓީ އިމޭޖަސް
އެމެރިކާގެ ރައީސް ޑޮނަލްޑް ޓްރަމްޕްގެ ޣައްޒާ ސުލްހައިގެ ޕްލޭން ފުރިހަމައަށް ތަންފީޒުކުރުމަށް އެކުލަވާލާފައިވާ "ރޯޑް މެޕް" އަށް އިސްރާއީލުން އިންކާރުކޮށްފައިވާތީ ސައުދީ އަރަބިއްޔާ އާއި އިސްލާމީ އިތުރު ހަތް ގައުމެއްގެ ފޮރިން މިނިސްޓަރުން އެކަން އާދިއްތަ ދުވަހު ކުށްވެރިކޮށްފި އެވެ.
ސައުދީ އަރަބިއްޔާ، މިސްރު، އުރުދުން، ޕާކިސްތާން، އިންޑޮނޭޝިއާ، ތުރުކީ، ގަތަރު އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގެ އިސް ޑިޕްލޮމޭޓުން ނެރުއްވި ގުޅިފައިވާ ބަޔާނެއްގައި ވިދާޅުވީ، އެމެރިކާގެ ރޯޑް މެޕަށާއި ފަލަސްތީނުގެ މިނިވަން ދައުލަތެއް ގާއިމުކުރުމަށް އިސްރާއީލުން ފާޅުގައި ދެކޮޅު ހަދަމުންދާ ދިއުން ހަރުކަށި އިބާރާތުން ކުށްވެރިކުރާ ކަމަށެވެ. އަދި އިސްރާއީލުގެ މި އަމަލަކީ ސުލްހައިގެ ރޭވުން ތަންފީޒުކުރުމަށް ހުރަސްއެޅުމުގެ އިތުރުން، އިންސާފުވެރި އަދި ދެމެހެއްޓެނިވި ސުލްހައެއް ގާއިމުކުރުމަށް ކުރަމުންދާ މަސައްކަތްތަކަށް ދޭ ނުބައި މެސެޖެއް ކަމަށްވެސް އެ ބަޔާނުގައި ތުހުމަތުކޮށްފައިވެ އެވެ.
ޣައްޒާގެ ހަނގުރާމަ ހުއްޓާލުމަށް އެކުލަވާލާފައިވާ ސުލްހައިގެ މަޝްރޫއަށް ބޮޑު ކުރިއެރުމެއް ލިބިފައިވާކަން ރައީސް ޓްރަމްޕް އިއުލާން ކުރެއްވީ މިދިޔަ މަހުގެ ތެރޭގަ އެވެ. ޓްރަމްޕްގެ މި ސުލްހައިގެ ރޭވުމުގައި ގޮވާލާފައިވަނީ ޣައްޒާގައި ހިންގަމުންދާ އަސްކަރީ އޮޕަރޭޝަންތައް ވަގުތުން ހުއްޓާލުމަށެވެ. މީގެ އިތުރުން، އިސްރާއީލުގެ ސިފައިން ޣައްޒާގެ ސަރަހައްދުތަކުން ފޭބުމުން ހަމާސް ޖަމާއަތުން ހަތިޔާރު ބެހެއްޓުމަށާއި، ފަލަސްތީނުގެ އާ މަދަނީ ސަރުކާރެއްގެ ދަށުން ޣައްޒާ އަލުން އާބާދުކުރުމަށްވެސް މި ރޭވުމުގައި ހިމަނާފައިވެ އެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ އެމެރިކާގެ މި ސުލްހައިގެ ރޭވުމާ ދެކޮޅުކަން ހާމަކުރައްވާފަ އެވެ. ނަތަންޔާހޫ މިކަން ހާމަކުރެއްވީ، ހަމާސް އިން ފުރިހަމައަށް ހަތިޔާރު ބަހައްޓަންދެން، ހަނގުރާމައިގެ ސަބަބުން ސުންނާފަތިވެފައިވާ ޣައްޒާގެ ސަރަހައްދުތަކުން އިސްރާއީލު ސިފައިން ބާލަން ނުޖެހޭނެ ކަމުގެ ޔަގީންކަން "ބޯޑް އޮފް ޕީސް" އިން ޣައްޒާއަށް ކަނޑައަޅާފައި ހުންނަ މަތީ ފަންތީގެ މަންދޫބު ނިކޮލާއި މިލަޑެނޯފް ދެއްވާފައި ވަނިކޮށެވެ.
ހަމާސް ޖަމާއަތުން ބުނެފައިވަނީ އަލުން ހަނގުރާމައެއް ފެށުނަ ނުދިނުމަށްޓަކައި އެމެރިކާގެ މި ރޭވުމަށް އެއްބަސްވެފައިވާ ކަމަށެވެ. ނަމަވެސް، މި އެއްބަސްވުން ތަންފީޒުކުރެވޭނީ އިސްރާއީލުން ވެފައިވާ ވައުދުތައް ފުރަތަމަ ފުރިހަމަކުރުމުން ކަމަށާއި، އޭގެ ތެރޭގައި އިސްރާއީލު ސިފައިން ޣައްޒާއިން ފޭބުމާއި ހަމަލާދިނުން ހުއްޓާލުން ހިމެނޭ ކަމަށްވެސް އެ ޖަމާއަތުން ބުނެފައިވެ އެވެ.
