އީރާންއާ ދެކޮޅަށް ޓްރަމްޕް އެޅުއްވި ފިޔަވަޅުތަކަށް ބަޣާއީ މަލާމާތްކުރައްވައިފި
27 އޯގަސްޓު 2026 | ބުރާސްފަތި 07:03އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ އެކްސްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ މި ސިޔާސަތަކީ އެއްވެސް މާނައެއް ހުރި ކަމެއް ނޫން ކަމަށް. އަދި މިހާރު ވެސް އަމަލު ކުރަމުންދާ ދަތިކުރުމުގެ ފިޔަވަޅުތަކެއް އަލުން އިއުލާނު ކުރުމަކީ ބުއްދިވެރި ކަމެއް ނޫން ކަމަށް އޭނާ ފާހަގަ ކުރެއްވި. ބަޣާއީ ވިދާޅުވި ގޮތުގައި އެމެރިކާ އިން މަސައްކަތް ކުރަމުންދަނީ ބާޒާރުގައި ނެތް ބާރެއް ދެއްކުމަށް
އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ | ރޮއިޓާސް
އީރާން އެކަހެރިކުރުމަށް އެމެރިކާ އިން އެކުލަވާލާފައިވާ "އޮޕަރޭޝަން އިކޮނޮމިކް އައުޓްކާސްޓް" ސިޔާސަތަކީ މަޖާޒީ ކަމެއް ނުވަތަ "ޕިއޯ ޕެރޮޑީ" އެއްގެ ގޮތުގައި އިރާންގެ ފޮރިން މިނިސްޓްރީގެ ތަރުޖަމާނު ސިފަކުރައްވައިފި އެވެ.
އީރާންގެ އިޤްތިސާދު އިތުރަށް ބަލިކަށިކޮށް، ބައިނަލްއަޤުވާމީ މައިދާނުގައި އެ ޤައުމު އެކަހެރިކުރުމަށް އެމެރިކާ އިން ކުރަމުންދާ މަސައްކަތްތަކަށް އީރާން އިން ވަނީ ވަރަށް ބޮޑަށް ފާޑު ކިޔާފައި އެވެ.
އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ އެކްސްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ މި ސިޔާސަތަކީ އެއްވެސް މާނައެއް ހުރި ކަމެއް ނޫން ކަމަށެވެ. އަދި މިހާރު ވެސް އަމަލު ކުރަމުންދާ ދަތިކުރުމުގެ ފިޔަވަޅުތަކެއް އަލުން އިއުލާނު ކުރުމަކީ ބުއްދިވެރި ކަމެއް ނޫން ކަމަށް އޭނާ ފާހަގަ ކުރެއްވި އެވެ. ބަޣާއީ ވިދާޅުވި ގޮތުގައި އެމެރިކާ އިން މަސައްކަތް ކުރަމުންދަނީ ބާޒާރުގައި ނެތް ބާރެއް ދެއްކުމަށެވެ.
މީގެ އިތުރުން ބަޣާއީ ވިދާޅުވީ، އެމެރިކާ އިން އެކުލަވާލާފައިވާ "ކޯލިޝަން" މަސައްކަތްކުރާކަން ސާބިތުކޮށްދިނުމަށްޓަކައި ބަހްރައިންގެ އެހީތެރިކަމަށް އެދިފައިވާ ކަމަށެވެ. ނަމަވެސް ބަހްރެއިން އަކީ އީރާން އާއެކު މާނަހުރި އެއްވެސް އިޤްތިސާދީ މުއާމަލާތެއް ހިންގާ ޤައުމެއް ނޫންކަން އޭނާ ފާހަގަކުރެއްވި އެވެ. އެހެންކަމުން ބަހްރައިން މެދުވެރިކޮށް އީރާން އަށް ފިއްތުންތައް ކުރިމަތި ކުރުވަން އުޅުމަކީ ހަގީގަތެއް ނެތް ކަމެއްގެ ގޮތުގައި އޭނާ ސިފަކުރެއްވި އެވެ.
މި މައްސަލައާ ގުޅިގެން އެމެރިކާގެ ޓްރެޒަރީ ސްކެރެޓަރީ ސްކޮޓް ބެސެންޓް ވަނީ، ބަހްރައިންގެ ފިނޭންސް މިނިސްޓަރު ޝައިޚް ސަލްމާން ބިން ޚަލީފާ އަލް ޚަލީފާއާ ފޯނުން ގުޅުއްވައި މަޝްވަރާ ކުރައްވާފައި އެވެ. މި މަޝްވަރާގައި މައިގަނޑު ގޮތެއްގައި އަލިއަޅުވާލާފައި ވަނީ އީރާން އަށް ކުރިމަތި ކުރަމުން އަންނަ މާލީ ފިއްތުންތައް ދެމެހެއްޓުމާ ބެހޭ ގޮތުންނެވެ.
އެމެރިކާގެ ސަރުކާރުން އީރާންއާ މެދު ގެންގުޅޭ ހަރުކަށި ސިޔާސަތުގެ ދަށުން، އީރާންގެ ތެލުގެ ވިޔަފާރި އާއި މާލީ މުއައްސަސާތަކަށް އަމާޒުކޮށް އިތުރު ފިޔަވަޅުތައް އެޅުމަށް ދަނީ ތައްޔާރު ވަމުންނެވެ. ނަމަވެސް، އީރާން އިން ބުނަމުން ދަނީ މިފަދަ ފިޔަވަޅުތަކުގެ ސަބަބުން އެ ޤައުމުގެ ކުރިއެރުމަށް ހުރަސް ނޭޅޭނެ ކަމަށާއި، އެމެރިކާގެ ރޭވުންތައް ނާކާމިޔާބުވާނެ ކަމަށެވެ.
މަސްދަރު: އަލް ޖަޒީރާ
