އީރާން އަށް އިތުރު ހަމަލާއެއް ދިނުމުގެ ވިސްނުމެއް އެމެރިކާާގެ ނެތް: ރޫބިއޯ

އީރާން އަށް އައު ހަމަލާތަކެއް ދިނުމުގެ ވިސްނުމެއް އެމެރިކާގެ މިވަގުތު ނެތް ކަމަށް އެ ޤައުމުގެ ސެކްރެޓަރީ އޮފް ސްޓޭޓް މާކޯ ރޫބިއޯ، ބައެއް ޤައުމުތަކުގެ ޚާރިޖީ ވަޒީރުންނަށް އަންގަވާފައިވާ ކަމަށް އެކްސިއޯސް ނޫހުން ރިޕޯޓުކޮށްފި އެވެ. 

ރޫބިއޯ ވިދާޅުވެފައި ވަނީ ހަނގުރާމައިގެ ފިޔަވަޅުތައް އެޅުއްވުމުގެ ބަދަލުގައި އިރާންއާ ދެކޮޅަށް އެހެން ފިޔަވަޅުތަކަކަށް ސަމާލުކަން ދެއްވާނެ ކަމަށާއި، މި ހަފުތާގެ ކުރީކޮޅު އިއުލާންކުރި އިޤްތިސާދީ ފިޔަވަޅުތަކަށް އިސްކަން ދެއްވާނެ ކަމަށެވެ.

އެމެރިކާ އާއި އިސްރާއީލް އިން އީރާން އަށް ހަމަލާތައް ދޭން ފެށީ މިއަހަރުގެ ފެބްރުއަރީ 28 ވަނަ ދުވަހު އެވެ. މިކަމުގެ ސަބަބުން އީރާން ކައިރީގައިވާ ޤައުމުތަކަށާއި، ހުރްމުޒް ކަނޑުއޮޅީގެ ތެރެއިން ދަތުރުކުރާ އުޅަނދު ފަހަރަށް އީރާން އިން ހަމަލާތައް ދީފައިވެ އެވެ. އޭގެ ފަހުން އޭޕްރީލް މަހުގެ ތެރޭގައި ދެ ޤައުމުން ހަނގުރާމަ ހުއްޓާލުމުގެ ވަގުތީ އެއްބަސްވުމެއްގައި ސޮއި ކުރި ނަަމަވެސް، އެއްބަސްވުމާ ޚިލާފަށް ހަމަލާ ބަދަލުކޮށްފައިވެ އެވެ. 

އެމެރިކާ އިން ހޯމަ ދުވަހު އިއުލާންކުރީ އީރާން އާއެކު ވިޔަފާރިކުރާ ޤައުމުތަކާއި، އެކިއެކި ކުންފުނިތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ވަރުގަދަ ކުރުމަށެވެ. އެމެރިކާ އިން މި ފިޔަވަޅުތައް އެޅުމުގެ މައިގަނޑު މަޤުސަދަކީ، އީރާން ބަލިކަށިކޮށް، އެ ޤައުމު ކުޑަ ކަކޫ ޖެއްސުވުން ކަމަށް އެމެރިކާާ އިން ބުނެފައިވެ އެވެ.

އެމެރިކާގެ ސެކްރެޓަރީ އޮފް ސްޓޭޓް ރޫބިއޯގެ މި ބަޔާނަކީ އީރާންއާ ދެކޮޅަށް އެމެރިކާ އިން އަޅާނެ ފިޔަވަޅުތަކާ ބެހޭ ގޮތުން ބައިނަލްއަޤުވާމީ މުޖުތަމައަށް ލިބުނު މުހިންމު އެންގުމެއް ކަމަށް ސިފަކޮށްފައިވެ އެވެ. މި ސިޔާސަތުގެ ބަދަލުން އެމެރިކާ އިން އީރާންއާ ދެކޮޅަށް ހަނގުރާމައިގެ ފިޔަވަޅުތަކުގެ ބަދަލުގައި އިޤްތިސާދީ ފިޔަވަޅުތަކަށް އިސްކަންދޭން ނިންމާފައިވާކަން ސާފުވެ އެވެ.

ނަމަވެސް މި ސަރަހައްދުގައި ވަރުގަދަ ނޭވީ ހަރަކާތްތަކެއް އެމެރިކާ އިން ކުރިއަށް ގެންދާކަން ފާހަގަކޮށްލެވެ އެވެ. ހުރްމުޒް ކަނޑުއޮޅީގައި ތަންފީޒު ކުރަމުންދާ ބްލޮކޭޑަކީ އީރާންގެ އިޤްތިސާދަށް ބާރު ބޮޑު، ނޭދެވޭ އަސަރެއް ކުރާނެ ފިޔަވަޅެކެވެ.