އީރާން ކުޑަ ކަކޫ ޖައްސުވާނަން، އެވަރަށް ކަރު ފިއްތާލައި ނޭވާ ހޮޅި އަށް އަޅުވާލާނަން: ބެސެންޓް
25 އޯގަސްޓު 2026 | އަންގާރަ 07:16އީރާން އަށް ވަރުގަދަ އިންޒާރު ދެއްވަމުން ބެސެންޓް ވިދާޅުވީ، އެމެރިކާގެ މި ފިޔަވަޅުތަކާ އެކު އީރާން އަށް ޖެހޭނީ އެ ޤައުމުގެ ކުރިމަތީގައި ކުޑަ ކަކޫ ޖަހަން ކަަމަށް. އަދި އީރާން އަށް ޖެހޭނީ އެމެރިކާ އަށް ބޯލަނބައި، އެމެރިކާ އިން ބޭނުންވާ ފަދަ އެއްބަސްވުމަކަށް ދާން ކަަމަށް ވެސް ބެސެންޓް ވިދާޅުވި. އެ ނޫން އެހެން އެއްވެސް ގޮތެއް އީރާން އަށް ނޯންނާނެ ކަމަށާއި އެ މިންވަރަށް އީރާންގެ ކަރު ފިއްތާލައި، ނޭވާ ހޮޅި އަށް އަޅުވާނެ ކަމަށް ބެސެންޓް ވިދާޅުވި
އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް | ގެޓީ އިމޭޖަސް
އެމެރިކާ އިން އީރާންއާ ދެކޮޅަށް އައު ފިޔަވަޅުތަކެއް އިއުލާނު ކުރުމާ އެކު، އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް އީރާން އަށް ވަރުގަދަ އިންޒާރެއް ދެއްވައިފި އެވެ.
އެ ފިޔަވަޅުތައް އެމެރިކާ އިން އިއުލާނު ކޮށްފައިވާއިރު، މި ފިޔަވަޅުތަކުގެ ދަށުން އީރާން އާއި އީރާން އަށް އެހީތެރިކަން ފޯރުކޮށްދޭ ޤައުމުތަކާ ދެކޮޅަށް ވެސް އެމެރިކާ އިން ފިޔަވަޅު އަޅާނެ އެވެ.
އީރާނާ ދެކޮޅަށް އެމެރިކާ އިން "އިކޮނޮމިކް އައުޓްކާސްޓް" ކެމްޕެއިން ފަށައިފި
ބެސެންޓް ވިދާޅުވީ ދެން އީރާން އަށް ކުރިމަތިވާނީ އިޤްތިސާދީ ގޮތުން ހިސާބު ބެލުމުގެ ޤިޔާމަތް ދުވަސް ކަމަށެވެ. އަދި އެމެރިކާާ އަކީ ކިހާ ބާރުގަދަ ޤައުމެއް ކަމަށާއި އެމެރިކާާގެ ބާރުވެރިކަން އީރާން އަށް އިހުސާސް ކުރެވޭނެ ކަމަށް ވެސް ބެސެންޓް ވިދާޅުވި އެވެ. އެމެރިކާ އިން މިފަހަރު އީރާންއާ ދެކޮޅަށް އެޅި ފިޔަވަޅުތަކަކީ އެފަދަ އިހުސާސެއް ކުރެވޭނެ ފިޔަވަޅުތަކެއް ކަމަށް ވެސް އޭނާ ވިދާޅުވި އެވެ.
އީރާން އަށް ވަރުގަދަ އިންޒާރެއް ދެއްވަމުން ބެސެންޓް ވިދާޅުވީ، އެމެރިކާގެ މި ފިޔަވަޅުތަކާ އެކު އީރާން އަށް ޖެހޭނީ އެ ޤައުމުގެ ކުރިމަތީގައި ކުޑަ ކަކޫ ޖަހަން ކަަމަށެވެ. އަދި އީރާން އަށް ޖެހޭނީ އެމެރިކާ އަށް ބޯލަނބައި، އެމެރިކާ އިން ބޭނުންވާ ފަދަ އެއްބަސްވުމަކަށް ދާން ކަަމަށް ވެސް ބެސެންޓް ވިދާޅުވި އެވެ. އެ ނޫން އެހެން އެއްވެސް ގޮތެއް އީރާން އަށް ނޯންނާނެ ކަމަށާއި، އެ މިންވަރަށް އީރާންގެ ކަރު ފިއްތާލައި، ނޭވާ ހޮޅި އަށް އަޅުވާނެ ކަމަށް ބެސެންޓް ވިދާޅުވި އެވެ.
އެއާ އެކު ބެސެންޓް ވިދާޅުވީ، އީރާންއާ ދެކޮޅަށް އެމެރިކާ އިން އަޅާފައިވާ ފިޔަވަޅުތަކަަށް ގޮންޖަހާ މީހުން ވެސް ޒިންމާދާރު ކުރުވާނެ ކަމަށެވެ. އަދި އެ ފަރާތްތައް ވެސް ހިސާބު ކުރާނެ ކަމަށާއި، އެ އެންމެނަށް ވެސް އަދަބު ދޭނެ ކަމުގެ އިންޒާރު ބެސެންޓް ދެއްވި އެވެ. އީރާން އަށް އެހީތެރިވާ ކޮންމެ ޤައުމަކުން ވެސް އެކަމާ މެދު ވަރަށް ފުންކޮށް ވިސްނުމަށް ބެސެންޓް ގޮވާލެއްވި އެވެ. އޭނާ ވިދާޅުވީ އީރާން އެކޭ އެއް ފަަދައިން އެއް ޤައުމަށް އެހީތެރިވާ ކޮންމެ ޤައުމެއް ވެސް އިނދަޖައްސާލާނެ ކަމަށެވެ.
އެމެރިކާ އާއި އިސްރާއީލް އިން އީރާންއާ ދެކޮޅަށް ފެށި ހަނގުރާމަ އަށް ހަ މަސް ދުވަސް ވާން ކައިރިވެފައިވާއިރު، އެމެރިކާ އިން ބޭނުން ވަނީ އީރާން އިން އަމާން ދިނުމަށެވެ. އެހެން ނަމަވެސް، އެމެރިކާ އާއި އިސްރާއީލްގެ ކުރިމަތީގައި އީރާން އިން އަންނަނީ ސާބިތުކަން ދައްކަމުންނެވެ.
މަސްދަރު: އަލް ޖަޒީރާ
