ހުރްމުޒް ކަނޑުއޮޅިން އުޅަނދުފަހަރު ދަތުރުކުރާ މިންވަރު ވަރަށް ބޮޑަށް ދަށް، ހޯމަ ދުވަހު ދަތުރު ކުރީ އެންމެ އުޅަނދެއް

ދުނިޔޭގެ ބާޒާރަށް މުދާ އުފުލާ މުހިންމު ކަނޑުގެ މަގެއް ކަމަށްވާ ހުރްމުޒް ކަނޑުއޮޅިން ދަތުރުކުރި އުޅަނދުފަހަރުގެ އަދަދު ހޯމަ ދުވަހު ވަރަށް ބޮޑަށް ދަށަށް ގޮސްފައިވާ ކަމަށް ބައިނަލްއަޤުވާމީ މީޑިއާ ރިޕޯޓުތަކުން ބުނެފި އެވެ.

ޝިޕިންގް ދާއިރާގެ ތަފާސްހިސާބުތަކާ ހަވާލާދީ ރޮއިޓާސް އިން ރިޕޯޓު ކޮށްފައިވާ ގޮތުގައި، ހޯމަ ދުވަހު އެ ކަނޑުއޮޅިން ދަތުރު ކޮށްފައި ވަނީ މުދާ އުފުލާ އެންމެ އުޅަނދެކެވެ.

މިއީ މިއަހަރުގެ މެއި މަހުގެ ހަތް ވަނަ ދުވަހަށް ފަހު، އެއް ދުވަހެއްގެ ތެރޭގައި އެ ސަރަހައްދުން އެންމެ މަދުން އުޅަނދު ފަހަރު ދަތުރުކުރި ދުވަސް ކަމަށް ތަފާސްހިސާބުތަކުން ދައްކަ އެވެ. އުޅަނދު ފަހަރު ދަތުރުކުރާ ގޮތް ބަލާ ކެޕްލާ ކުންފުނީގެ ވަގުތީ ހިސާބުތަކާ ހަވާލާދީ ރިޕޯޓު ކޮށްފައިވާ ގޮތުގައި، ހޯމަ ދުވަހު އޮމާން ކަނޑުން ވަދެ، އެ ކަނޑު އޮޅި ހުރަސް ކޮށްފައި ވަނީ ގޭސް އުފުލާ ބޮޑު އެންމެ އުޅަނދެކެވެ.

މިދިޔަ އާދީއްތަ ދުވަހުގެ ތަފާސްހިސާބުތަކަށް ބަލާއިރު، އެކި ބާވަތްތަކުގެ މުދާ އުފުލާ ޖުމްލަ ހަ އުޅަނދެއް އެ ކަނޑުއޮޅި ހުރަސްކޮށްފައިވެ އެވެ. އެހެންކަމުން ހޯމަ ދުވަހުގެ މި އަދަދު ވަނީ އާދީއްތަ ދުވަހާ އަޅާބަލާއިރު ފާހަގަ ކުރެވޭ މިންވަރަކަށް ދަށަށް ގޮސްފައި އެވެ.

ނަމަވެސް، މިއީ އަދި ވަގުތީ ހިސާބުތަކެއް ކަމަށާއި މި އަދަދުތަކަށް ބަދަލު އައުން އެކަށީގެންވާ ކަމަށް ރިޕޯޓުގައި ބުނެފައިވެ އެވެ. މީގެ ސަބަބެއްގެ ގޮތުގައި ފާހަގަ ކޮށްފައި ވަނީ، އެ ސަރަހައްދުން ދަތުރުކުރާ ބައެއް އުޅަނދު ފަހަރުގެ ސަލާމަތީ ކަންކަމަށްޓަކައި، އުޅަނދު ހުރި ތަން އަންގައިދޭ ޓްރާންސްޕޮންޑަރުތައް ނިއްވާލައިގެން ދަތުރު ކުރުމެވެ.

ހުރްމުޒް ކަނޑުއޮޅި އަކީ ދުނިޔޭގެ ހަކަތައިގެ ބާޒާރަށް ބޭނުންވާ ތެލާއި ގޭސް އުފުލުމުގައި އެންމެ މުހިންމު އެއް މަގު ކަމަށްވާއިރު، އެ ސަރަހައްދުގެ މަސްރަހަށް އަންނަ ބަދަލުތަކުގެ ސަބަބުން އުޅަނދު ފަހަރު ދަތުރުކުރާ މިންވަރަށް ބަދަލުތައް އަންނަނީ ކުރިމަތިވަމުންނެވެ.