އީރާނާ ދެކޮޅަށް އެމެރިކާ އިން "އިކޮނޮމިކް އައުޓްކާސްޓް" ކެމްޕެއިން ފަށައިފި

އީރާންގެ އިގްތިސާދީ ވަސީލަތްތައް ބަންދުކޮށް، އެ ޤައުމު އެކަހެރި ކޮށްލުމަށްޓަކައި "އޮޕަރޭޝަން އިކޮނޮމިކް އައުޓްކާސްޓް" ގެ ނަމުގައި އެމެރިކާ އިން ވަރުގަދަ ކެމްޕޭނެއް ފަށައިފި އެވެ.

އެމެރިކާގެ ޓްރެޒްރީ ސެކްރެޓަރީ ސްކޮޓް ބެސެންޓް ހޯމަ ދުވަހު އިއުލާން ކުރެއްވި މި ފިއްތުންތަކުގެ މަގުސަދަކީ، ދުނިޔޭގެ ކޮންމެ ތަނެއްގައި އޮތް ނަމަވެސް އީރާންގެ މާލީ މަސްލަހަތުތަކަށް ހުރަސް އެޅުމެވެ. ބެސެންޓް ވިދާޅުވީ، އީރާން އަށް އާމްދަނީ ލިބޭ ހުރިހާ މަގުތަކެއް، ޚާއްސަކޮށް ތެލުގެ ވިޔަފާރި ހުއްޓުވައި، އެހެން ޤައުމުތަކާއި ކުންފުނިތަކުން އީރާން އާއެކު މުއާމަލާތް ކުރުން ހުއްޓުވާނެ ކަމަށެވެ.

މި އައު ސިޔާސަތުގެ ދަށުން ދުނިޔޭގެ ޤައުމުތަކަށް އޮތީ އެމެރިކާ ނުވަތަ އީރާންއާ ދެމެދު ގޮތެއް ނިންމުން ކަމަށް ބެސެންޓް ފާހަގަ ކުރެއްވި އެވެ. އީރާން އާއެކު ވިޔަފާރި ކުރާ ފަރާތްތަކަށް "ސެކަންޑަރީ ޕެނަލްޓީ" ނުވަތަ ދެވަނަ ދަރަޖައިގެ އަދަބުތައް ކުރިމަތިވާނެ ކަމުގެ އިންޒާރު ދެއްވަމުން އޭނާ ވިދާޅުވީ، އެމެރިކާގެ ދަތި ކުރުމުގެ ފިޔަވަޅުތަކުން ސަލާމަތް ވެވޭނެ އެއްވެސް ފަރާތެއް ނުހުންނާނެ ކަމަށެވެ. 

މި ކެމްޕެއިން އަށް "އިކޮނޮމިކް ޑީ-ޑޭ" ގެ ނަން ދެއްވަމުން ބެސެންޓް ވަނީ، މިއީ ދެވަނަ ބޮޑު ހަނގުރާމައިގައި ނާޒީން ބަލި ކުރުމަށް އެލައިޑް ފޯސްތަކުން ފްރާންސް އަށް އެރި އެރުމާ އެއްފަދަ ކަމެއްގެ ގޮތުގައި ސިފަކުރައްވާފައި އެވެ.

އެމެރިކާގެ މި ފިޔަވަޅުތައް އަމާޒުކޮށްފައި ވަނީ އީރާންގެ އިގުތިސާދުގެ އެންމެ މުހިންމު ފަސް ދާއިރާ އަކަށެވެ. އެއީ ޑިޖިޓަލް އެސެޓްސް، ޓެކްނޮލޮޖީ، ރަން، އޭވިއޭޝަން އަދި ޝިޕިންގްގެ ދާއިރާ އެވެ. މީގެ އިތުރުން ޔޫއޭއީ، ހޮންކޮންގް، ޗައިނާ، ސިންގަޕޫރު އަދި ސްވިޒަލޭންޑް ހިމެނޭހެން ދުނިޔޭގެ އެކި ޤައުމުތަކަށް ނިސްބަތްވާ 60 ކުންފުންޏަކާއި އުޅަނދަކާއި އަދި ފަރުދުންނާ ދެކޮޅަށް ވެސް ވަނީ ދަތިކުރުމުގެ ފިޔަވަޅު އަޅާފައި އެވެ.

އެމެރިކާގެ ރައީސް ޑޮނަލްޑް ޓްރަމްޕް މިހާރު ވެސް ދުނިޔޭގެ ލީޑަރުންނަށް ގުޅުއްވައި، އީރާން އާއެކު ބާއްވާ ގުޅުންތައް ކަނޑާލުމަށް އެދިވަޑައިގަންނަވަމުންދާ ކަމަށް ޓްރެޒަރީ ސެކްރެޓަރީ ވިދާޅުވި އެވެ.

މި އިގުތިސާދީ ހަނގުރާމަ ފަށާފައި މިވަނީ އީރާން އާއެކު ހިނގަމުންދާ އަސްކަރީ ކުރިމަތިލުންތަކަށް ހަ މަސް ފުރެން ކައިރިވެފައި ވަނިކޮށެވެ. އެމެރިކާ އާއި އިސްރާއީލް އިން ދިން ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އޮފިޝަލުންތަކެއް އަވަހާރަވި ނަމަވެސް، އީރާންގެ ވެރިކަމުގެ ނިޒާމު ބަދަލުކުރުމުގައި ވަނީ ނާކާމިޔާބުވެފައި އެވެ.

އީރާން އިން ވަނީ މީގެ ރައްދުގައި ސަރަހައްދީ ޤައުމުތަކަށް ޑްރޯން އަދި މިސައިލް ހަމަލާދީ، ދުނިޔޭގެ ހަކަތައިގެ މުހިންމު މަގެއް ކަމަށްވާ ހުރްމުޒް ކަނޑުއޮޅީގެ ކޮންޓްރޯލް ނަގައި، ތެލާއި ގޭހުގެ އަގު އުފުލާލާފައި އެވެ.

އެމެރިކާގެ ޕެންޓަގަންގެ ވެރިޔާ ޕީޓް ހެގްސެތު ވިދާޅުވީ، މި އިގުތިސާދީ ފިއްތުންތަކާ އެކު އީރާން އަށް މަޖުބޫރުވާނީ ނިއުކްލިއާ ޕްރޮގްރާމްއާ ގުޅޭ ގޮތުން މަޝްވަރާގެ މޭޒަށް އެނބުރި އައުމަށް ކަމަަށެވެ. އަދި އިގުތިސާދީ ފިޔަވަޅުތަކުން ނަތީޖާ ނުނިކުމެ، އީރާން އިން އެމެރިކާގެ އަސްކަރިއްޔާ އަށް ގޮންޖަހާ ނަމަ، އަސްކަރީ ހަމަލާތައް ދޭން ފަސް ނުޖެހޭނެ ކަމަށް ވެސް އޭނާ ވިދާޅުވި އެވެ.