100 މީޓަރު ދުވުމުން އުސެއިން ބޯލްޓް ޤާއިމުކޮށްފައިވާ ރެކޯޑު، ޗައިނާ އިން އުފެއްދި ރޮބޮޓެއް މުގުރާލައިފި
23 އޯގަސްޓު 2026 | އާދީއްތަ 06:00ލައިޓްނިންގް ނަމުގައި ނަން ދީފައިވާ މި ރޮބޮޓު 100 މީޓަރު ދުވީ 9.32 ސިކުންތުން. މިއީ ބެއިޖިންގެ ވެންދެއްޔާގައި ހޯމަ ދުވަހު ފެށުނު ދެވަނަ ދުނިޔޭގެ ހިއުމަނޮއިޑް ރޮބޮޓް ގޭމްސް އަށް ތައްޔާރުވުމަށް ބޭއްވި ޓެސްޓް އިވެންޓެއްގައި ހާސިލުކުރި ނަތީޖާ އެއް. މި ދުވުމުގައި ރޮބޮޓު ވަނީ ސިކުންތަކަށް 14.5 މީޓަރުގެ ބާރުމިނަށް ވެސް ދަތުރު ކޮށްފައި
ޗައިނާ އިން ތައްޔާރު ކުރި ރޮބޮޓް ދުވާ މަންޒަރު ފެންނަ ވީޑިއޯ | ސޯޝަލް މީޑިއާ
ޗައިނާގެ ސްމާޓްފޯން ހަދާ ކުންފުންޏެއް ކަމަށްވާ އޮނަރުން ތަރައްޤީ ކުރި ހިއުމަނޮއިޑް ރޮބޮޓެއް، 100 މީޓަރު ދުވުމުގައި ޖަމެއިކާގެ މަޝްހޫރު ދުވުންތެރިޔާ އުސެއިން ބޯލްޓްގެ ދުނިޔޭގެ ރެކޯޑު މުގުރާލާފައިވާ ކަމަށް ޗައިނާގެ ސަރުކާރުގެ ބްރޯޑްކާސްޓަރުން ރިޕޯޓު ކޮށްފި އެވެ.
ލައިޓްނިންގް ނަމުގައި ނަން ދީފައިވާ މި ރޮބޮޓު 100 މީޓަރު ދުވީ 9.32 ސިކުންތުންނެވެ. މިއީ ބެއިޖިންގެ ވެންދެއްޔާގައި ހޯމަ ދުވަހު ފެށުނު ދެވަނަ ދުނިޔޭގެ ހިއުމަނޮއިޑް ރޮބޮޓް ގޭމްސް އަށް ތައްޔާރުވުމަށް ބޭއްވި ޓެސްޓް އިވެންޓެއްގައި ހާސިލުކުރި ނަތީޖާ އެކެވެ. މި ދުވުމުގައި ރޮބޮޓު ވަނީ ސިކުންތަކަށް 14.5 މީޓަރުގެ ބާރުމިނަށް ވެސް ދަތުރު ކޮށްފައި އެވެ.
ޗައިނާ އިން ތައްޔާރު ކުރި ރޮބޮޓް ދުވާ މަންޒަރު ފެންނަ ވީޑިއޯ
މި ނަތީޖާ އަކީ 2009 ވަނަ އަހަރު ބާލިންގައި ބޭއްވުނު ވޯލްޑް އެތުލެޓިކްސް ޗެމްޕިއަންޝިޕްގައި ބޯލްޓް ހާސިލުކުރި 9.58 ސިކުންތުގެ ފިރިހެނުންގެ 100 މީޓަރު ދުވުމުގެ ދުނިޔޭގެ ރެކޯޑަށް ވުރެ ރަނގަޅު ނަތީޖާ އެކެވެ.
ޗައިނާ އިން ވަނީ ހިއުމަނޮއިޑް ރޮބޮޓްތައް ސްޓްރެޓީޖިކް އިމާޖިން އިންޑަސްޓްރީއެއްގެ ގޮތުގައި ކުރިއަށް ގެންދަން ފަށާފައި އެވެ. ސިޔާސަތު ކަނޑައަޅާ ފަރާތްތަކާއި ކުންފުނިތަކުން އުންމީދު ކުރަނީ އާޓިފިޝަލް އިންޓެލިޖެންސް އަދި ހާޑްވެއާގެ ދާއިރާގައި ލިބެމުންދާ ކުރިއެރުންތަކުން މެނުފެކްޗަރިން، ލޮޖިސްޓިކްސް އަދި ކޮންޒިއުމާ އެޕްލިކޭޝަންތަކުގައި މި ރޮބޮޓުތައް ބޭނުން ކުރުން އަވަސް ވެގެންދާނެ ކަމަށެވެ.
ލައިޓްނިންގް އިން ވަނީ މިދިޔަ އޭޕްރީލް މަހު ބެއިޖިންގެ 21 ކިލޯ މީޓަރުގެ ހާފް މެރެތަން ވެސް 50 މިނެޓާއި 26 ސިކުންތުގައި ކާމިޔާބު ކޮށްފައި އެވެ. މިއީ ފިރިހެނުންގެ އެލީޓު ހިއުމަން ދުނިޔޭގެ ރެކޯޑު ޕޭސްއަށް ވުރެ ވެސް ވަރުގަދަ ނަތީޖާ އެކެވެ.
ހާފް މެރެތަން ދުވި ވަގުތު މި ރޮބޮޓުގެ އުސްމިނުގައި ހުރީ 169 ސެންޓިމީޓަރު އަދި ފައިގެ ދިގު މިނަކީ 95 ސެންޓިމީޓަރެވެ. ދެވަނަ ދުނިޔޭގެ ހިއުމަނޮއިޑް ރޮބޮޓް ގޭމްސް ކުރިއަށް ނުގެންގޮސް، ރިސާޗަރުން ވަނީ ރޮބޮޓުގެ ފައިގެ ދިގުމިން 10 ސެންޓިމީޓަރު އިތުރުކޮށް 1.05 މީޓަރަށް ބަދަލު ކޮށްފައި ކަމަށް ސީސީޓީވީ އިން ރިޕޯޓު ކޮށްފައިވެ އެވެ.
މި ކާމިޔާބީ އަކީ ރޮބޮޓިކްސްގެ ދާއިރާގައި ޗައިނާ އިން ހާސިލު ކުރަމުންދާ ކުރިއެރުންތަކުގެ ހެއްކެއްގެ ގޮތުގައި ބަލަމުން އަންނަ ކަމެކެވެ. މި ދާއިރާގައި ޗައިނާ އިން ކުރަމުންދާ އިންވެސްޓުމަންޓުތަކާއި، ތަރައްޤީގެ މަސައްކަތްތައް ދުނިޔޭގެ ސަމާލުކަން ހޯދަމުން އަންނައިރު، މި ޓެކްނޮލޮޖީގެ ބޭނުން ކުރެވޭނެ ދާއިރާތައް ފުޅާވަމުން އަންނަކަން ވަނީ ފާހަގަވެފައި އެވެ.
