އެމެރިކާ އިން އީރާނަށް އަޅާ ދަތިކުރުމުގެ ފިޔަވަޅުތަކަށް ޗައިނާ އިން ދެކޮޅު ހަދައިފި

އީރާނުގެ އިގްތިސާދު އެކަހެރިކުރުމަށް އެމެރިކާއިން ކުރަމުންދާ މަސައްކަތުގައި ބައިވެރިވުމަށް ޗައިނާ ހިމެނޭހެން ބައެއް ގައުމުތަކަށް ވޮޝިންޓަނުން ގޮވާލާފައިވަނިކޮށް، އެމެރިކާގެ "ދަތިކުރުމުގެ ފިޔަވަޅުތަކާއި ފިއްތުންތަކުން" މެދުއިރުމަތީގެ ހަމަނުޖެހުންތަކަށް ހައްލެއް ނުލިބޭނެ ކަމަށް ޗައިނާއިން ހުކުރު ދުވަހު ބުނެފި އެވެ.

އީރާނާއި އެމެރިކާއާ ދެމެދު ހިނގަމުންދާ ހަނގުރާމައަށް ހަ މަސްދުވަސް ފުރެން ގާތްވެފައިވާއިރު، އެމެރިކާއިން ވަނީ އީރާނުގެ ސަރުކާރު "އިނދަޖައްސާލާނެ" ކަމަށް ބުނެ އިންޒާރުދީފަ އެވެ. ނަމަވެސް ތެހެރާނުން ވަނީ އެމެރިކާގެ މި އަމަލުތަކަކީ "އިގްތިސާދީ ޓެރަރިޒަމް" ކަމަށް ސިފަކޮށް، އެ މަސައްކަތްތައް ނާކާމިޔާބުވާނެ ކަމަށް ބުނެފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ދެއްވަމުންދާ އިންޒާރުތަކާ ގުޅޭގޮތުން ނޫސްވެރިން ސުވާލުކުރުމުން، ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން ހުކުރު ދުވަހު ވިދާޅުވީ، "ދަތިކުރުމުގެ ފިޔަވަޅުތަކާއި ފިއްތުންތަކުގެ ސަބަބުން މައްސަލަ ހައްލުކުރުމަށް އެއްވެސް އެހީތެރިކަމެއް ނުލިބޭނެ" ކަމަށެވެ.

އޭނާ އިތުރަށް ވިދާޅުވީ، ކަމާގުޅުންހުރި ހުރިހާ ފަރާތްތަކުން ޒިންމާދާރު ފިޔަވަޅުތައް އަޅައި، ސިޔާސީ އަދި ޑިޕްލޮމެޓިކް އުސޫލުތަކުގެ ތެރެއިން މައްސަލަ ހައްލުކުރުމަށް ޗައިނާއިން ގޮވާލާ ކަމަށެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވަނީ އީރާނަށް އިގްތިސާދީ ގޮތުން ފިއްތުންތައް ކުރިމަތިކުރުމަށް ރައީސް ޓްރަމްޕް ކުރައްވާ މަސައްކަތްތަކަށް ތާއީދުކުރައްވައި ވާހަކަދައްކަވާފަ އެވެ.

އީރާނާ ދެކޮޅަށް ކުރިއަށްގެންދާ މި ހަރަކާތުގައި ބައިވެރިވުމަށް ޗައިނާއަށް އެމެރިކާއިން ފިއްތުންތައް ކުރިމަތިކުރާނެތޯ ސީއެންބީސީން ސުވާލުކުރުމުން ބެސެންޓް ވިދާޅުވީ، "ގިނަ މަޝްވަރާތަކަކީ ސިއްރުން ކުރިއަށް ގެންދިއުން އެންމެ ރަނގަޅު ކަންކަން" ކަމަށެވެ. އެއާއެކު އެމެރިކާގެ މި ސިޔާސަތުތަކާ އެއްގޮތަށް އަމަލުކުރުމަށް އޭނާ ވަނީ ބެއިޖިންއަށް ގޮވާލައްވާފަ އެވެ.

ބެސެންޓްގެ ވާހަކަތަކާ ގުޅޭގޮތުން ސުވާލުކުރުމުން، ތަރުޖަމާނު ލިން ވަނީ ހަނގުރާމަ ހުއްޓުވުމަށްޓަކައި ހުރިހާ ފަރާތްތަކުން "ޒިންމާދާރު ފިޔަވަޅުތައް" އެޅުމުގެ މުހިންމުކަން އަލުން ތަކުރާރު ކުރައްވާފަ އެވެ.

ލިން ވިދާޅުވީ، ބައިނަލްއަގުވާމީ ގާނޫނުތަކުގެ މައްޗަށް ބިނާވެފައިނުވާ އަދި އދ. ގެ ސަލާމަތީ މަޖިލީހުގެ ހުއްދައެއް ނެތި، ގައުމަކުން އަމިއްލައަށް އަޅާ ގާނޫނާ ހިލާފު ދަތިކުރުމުގެ ފިޔަވަޅުތަކާ ޗައިނާއިން ދެކޮޅު ހަދާ ކަމަށެވެ.