75 ގައުމަކަށް ވިސާ މަނާކުރި ޓްރަމްޕްގެ އަމުރު އެމެރިކާގެ ފަނޑިޔާރަކު ބާތިލްކޮށްފި
22 އޯގަސްޓު 2026 | ހޮނިހިރު 17:50ދުނިޔޭގެ 75 ގައުމެއްގެ ރައްޔިތުންނަށް އިމިގްރަންޓް ވިސާ ދޫކުރުން މަނާކުރުމަށް އެމެރިކާ ސަރުކާރުން ނެރުނު އަމުރު، އެ ގައުމުގެ ފެޑަރަލް ފަނޑިޔާރަކު ބާތިލްކޮށްފި. މި ނިންމުމަކީ ގާނޫނާ ޚިލާފު ނިންމުމެއް ކަމަށް ކަނޑައަޅައި ކުރި ހުކުމާއެކު، އެ ސިޔާސަތުގެ ދަށުން ވިސާ ނުދީ ހިފަހައްޓާފައިވާ ހުރިހާ ނިންމުންތަކެއް މިހާރު ވަނީ ބާތިލްވެފައި
ކެލިފޯނިއާގެ ސެން އިސިޑްރޯ ބޯޑަރުން އެމެރިކާއަށް އެތެރެވި އަންހެނެއްގެ ލިޔެކިޔުންތައް ޔޫއެސް ކަސްޓަމްސް އެންޑް ބޯޑަރ ޕްރޮޓެކްޝަންގެ އޮފިސަރަކު (ވައަތްފަރާތުގައި) ޗެކްކުރަނީ | ގެޓީ އިމޭޖަސް
75 ގައުމެއްގެ ރައްޔިތުންނަށް އިމިގްރަންޓް ވިސާ ދޫކުރުން މަނާކޮށް، އެމެރިކާގައި ދާއިމީކޮށް ވަޒަންވެރިވުން ހުއްޓުވުމަށް ރައީސް ޑޮނަލްޑް ޓްރަމްޕްގެ ސަރުކާރުން ނެރުނު އަމުރު، އެމެރިކާގެ ފެޑަރަލް ފަނޑިޔާރަކު ބާތިލްކޮށްފި އެވެ. މިއީ ހިޖުރަކުރާ މީހުންނާ ދެކޮޅަށް ޓްރަމްޕް ގެންގުޅުއްވާ ހަރުކަށި ސިޔާސަތުތަކަށް ލިބުނު ބޮޑު ނުތަނަވަސްކަމެކެވެ.
ނިއުޔޯކްގެ ސަަދަން ޑިސްޓްރިކްޓް ކޯޓުގެ ފަނޑިޔާރު ޖެނެޓް ވަރގަސް ހުކުރު ދުވަހު ނެރުއްވި ހުކުމުގައި ވިދާޅުވީ، ސަރުކާރުގެ މި ސިޔާސަތަކީ ގާނޫނާ ޚިލާފު ނިންމުމެއް ކަމަށެވެ. އަދި މި އަމުރު ނެރުއްވުމުގައި ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އޭނާއަށް ގާނޫނުން ލިބިދީފައިވާ ބާރުގެ ބޭރުން އަމަލުކުރައްވާފައި ކަމަށްވެސް ފަނޑިޔާރު ވިދާޅުވި އެވެ.
މިދިޔަ ޖެނުއަރީ މަހުން ފެށިގެން އަމަލުކުރަން ފެށި މި ސިޔާސަތުގެ ދަށުން، ދުނިޔޭގެ 75 ގައުމެއްގެ ރައްޔިތުންނަށް އިމިގްރަންޓް ވިސާ ދޫކުރުން އޮތީ މެދުކަނޑާލާފަ އެވެ. މީގެ ތެރޭގައި އަފްޣާނިސްތާން، ބްރެޒިލް، މިސްރު، އީރާން، އިރާގު، ނައިޖީރިއާ، ސޯމާލިއާ، ތައިލެންޑް އަދި ޔަމަން ފަދަ ގައުމުތައް ހިމެނެ އެވެ.
އެ ދުވަސްވަރު ސްޓޭޓް ޑިޕާޓްމަންޓުން ބުނެފައިވަނީ، މި ނިންމުމަކީ ނުރައްކާ ބޮޑު ގައުމުތަކުން އެމެރިކާއަށް ހިޖުރަކުރާ މީހުން، އެ ގައުމުގެ އިޖުތިމާއީ ރައްކާތެރިކަމުގެ ނިޒާމުގެ ނާޖާއިޒު ފައިދާ ނެގުން ހުއްޓުވުމަށާއި، އެމީހުންނަކީ ދައުލަތަށް ބުރައަކަށް ވާނެ ބަޔަކަށް ވިޔަނުދިނުމަށް ނިންމި ނިންމުމެއް ކަމަށެވެ.
ނަމަވެސް ފަނޑިޔާރު ވަރގަސް ކުރެއްވި ހުކުމުގައި ބަޔާންކުރައްވާފައިވަނީ، ވިސާއަށް އެދޭ މީހަކީ އެހެން ހުރިހާ ގޮތަކުން ޝަރުތު ހަމަވާ މީހެއް ކަމަށް ވީނަމަވެސް، ހަމައެކަނި އެމީހަކު ނިސްބަތްވާ ގައުމަށް ބަލައި ވިސާ ދިނުމަށް އިންކާރުކުރުމަށް ކޮންސިއުލާ އޮފިސަރުންނަށް އަމުރުކޮށްފައިވަނީ ގޯސްކޮށް ކަމަށެވެ.
ހުކުރު ދުވަހު ކުރި މި ހުކުމާއެކު، ސަރުކާރުގެ އެ ސިޔާސަތުގެ މައްޗަށް ބިނާކޮށް ވިސާ ނުދީ ހިފަހައްޓާފައިވާ ހުރިހާ ނިންމުންތަކެއް މިހާރު ވަނީ ބާތިލްވެފަ އެވެ.
ކޯޓުގެ މި ނިންމުން އިސްތިއުނާފު ކުރުމުގެ ފުރުސަތު ސަރުކާރަށް އެބައޮތެވެ.
ރިޔާސީ އިންތިޚާބުގެ ކެމްޕޭން ތެރޭގައި ޑޮނަލްޑް ޓްރަމްޕް ވަނީ، އެމެރިކާގައި ގަވާއިދާ ޚިލާފަށް އުޅޭ މިލިއަނުން ބޭރު މީހުން ގައުމުން ބޭރުކޮށްލައްވާނެ ކަމަށް ވައުދުވެވަޑައިގެންފަ އެވެ. އަދި ވައިޓް ހައުސްއާ އަލުން ހަވާލުވެވަޑައިގަތުމަށްފަހު، މީހުން ޑީޕޯޓްކުރުން އަވަސްކުރުމަށާއި ބޯޑަރު ހުރަސްކުރާ މީހުންގެ އަދަދު މަދުކުރުމަށް ޓްރަމްޕް ގެންދަވަނީ ގިނަ ފިޔަވަޅުތަކެއް އަޅުއްވަމުންނެވެ.
