ކެޕިޓަލް ބިލްޑިންގ އަށް ބޮމުގެ ހަމަލާއެއްދީ، ގާނޫނު ހަދާ މަޖިލީހުގެ މެންބަރުން މަރާލަން ރާވަމުންދިޔަ ކަމުގެ ތުހުމަތުގައި އެފްބީއައި އިން އަންހެނަކު ހައްޔަރުކޮށްފި

ނިއުޔޯކްގެ އަލްބަނީގައި ހުންނަ އެ ސްޓޭޓްގެ ކެޕިޓަލް ބިލްޑިންގަށް ބޮމުގެ ހަމަލާއެއްދީ، ގާނޫނު ހަދާ މަޖިލީހުގެ މެންބަރުން މަރާލަން ރާވަމުންދިޔަ ކަމުގެ ތުހުމަތުގައި އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) އިން އަންހެނަކު ހައްޔަރުކޮށްފި އެވެ.

ޕްރޮސެކިއުޓަރުން ތުހުމަތުކުރާ ގޮތުގައި އުމުރުން 35 އަހަރުގެ ޖެސިކާ ބޯވީ ވަނީ މީގެކުރިން އިސްލާމިކް ސްޓޭޓް (އައިއެސް) ޖަމާއަތަށް ބައިއަތު ހިފާފަ އެވެ. އޭނާގެ މައްޗަށް އުފުލާފައިވަނީ ބޭރުގެ ޓެރަރިސްޓް ޖަމާއަތަކަށް މާއްދީ އެހީތެރިކަމާއި ވަސީލަތްތައް ފޯރުކޮށްދިނުމުގެ ދައުވާ އެވެ.

ޕްރޮސެކިއުޓަރުން ވިދާޅުވި ގޮތުގައި، ބޯވީ ވަނީ ހަމަލާ ދިނުމުގެ ކުރިން އެ އިމާރާތް "ތަކުރާރުކޮށް ބަލައި ފާސްކޮށްފަ އެވެ." އަދި އޭނާ ހައްޔަރުކުރި އިރު، އެފްބީއައިގެ އަަންޑަރކަވަރު އެޖެންޓުން އޭނާއަށް ދީފައިވާ ފޭކު ބޮމަކާއި، ހަލާކުވެފައިވާ ބަޑިއެއް އޭނާގެ އަތުގައި އޮތް ކަމަށްވެސް ޕްރޮސެކިއުޓަރުން ބުނެ އެވެ.

ކޯޓަށް ހުށަހަޅާފައިވާ ލިޔުންތަކުގައިވާ ގޮތުން، ބޯވީ އެޖެންޓުން ގާތު ބުނެފައިވަނީ "އަހަރެން ބޭނުންވަނީ އެ އިމާރާތަށް ވީހާވެސް ބޮޑު ގެއްލުމެއްދީ، ސެނެޓަރުން މަރާލަން" ކަމަށެވެ. ނަމަވެސް އޭނާ މި ދައުވާތަކަށް އިންކާރުކުރާނެ ކަމެއް ނުވަތަ ނޫންކަމެއް އަދި ސާފެއް ނުވެއެވެ.

ނިއުޔޯކްގެ އަލްބަނީއަށް ނިސްބަތްވާ ބޯވީ، އޭނާގެ މި ރޭވުންތަކާ ބެހޭގޮތުން އެފްބީއައިގެ އިންފޯމަންޓުންނާ ވާހަކަދައްކާފައިވާ ކަމަށާއި، އައިއެސްގެ މެންބަރުންގެ ގޮތުގައި ހެދިގެން ތިބި އެޖެންޓުންނާއެކު އޭނާ ހަފުތާތަކެއް ހޭދަކޮށްފައިވާ ކަމަށް ތުހުމަތު ކުރެވެ އެވެ.

ޕްރޮސެކިއުޓަރުން ބުނާ ގޮތުގައި، ބޯވީ ނިއުޔޯކްގެ ސްޓޭޓްހައުސް ހަމަލާ ދިނުމަށް އިޚްތިޔާރު ކުރީ، އެއީ ވައިޓް ހައުސްއަށްވުރެ ފަސޭހައިން ހަމަލާދެވޭނެ ތަނެއް ކަމަށް އޭނާއަށް ގަބޫލުކުރެވޭތީ އެވެ.

އޭނާ އެޖެންޓުން ގާތު ބުނެފައިވަނީ "އަހަރެން ބޭނުންވަނީ އެމެރިކާގެ ނިޒާމަށް މީގެ އަސަރު ފޯރުވަން" ކަމަށެވެ. ޕްރޮސެކިއުޓަރުން ބުނާ ގޮތުގައި ހަމަލާ ދިނުމުގެ ކުރިން، ކަންކަން ދެނެގަތުމުގެ މިޝަންތަކުގައި މަދުވެގެން ފަސް ފަހަރު އޭނާ އެ އިމާރާތަށް ޒިޔާރަތްކުރި އެވެ.

އޮފިޝަލުން ވިދާޅުވާ ގޮތުގައި، ބޯވީ ރާވާފައިވަނީ ބޮން ފޮރުވުމަށްޓަކައި ކާބޯތަކެތި ޑެލިވަރީ ކުރާ ކޮތަޅެއް (ފުޑް ޑެލިވަރީ ބޭގް) ބޭނުންކުރުމަށެވެ. ދައުވާގެ ލިޔުންތަކުގައި އޭނާ އެޖެންޓުންގެ ގާތަށް ގެންދިޔަ "ޑޯޑޭޝް" ކޮތަޅުގެ ފޮޓޯއެއްވެސް ހިމަނާފައިވެ އެވެ.

ބޮން ހެދުމަށް ބޭނުންވާ ސާމާނު ގަތުމަށް އެޖެންޓުން ބޯވީއަށް 200 ޑޮލަރު (147 ޕައުންޑް) ދިން ކަމަށް ތުހުމަތު ކުރެވެ އެވެ. އެމީހުން އޭނާ ގޮވައިގެންދިޔައީ "ހޯމް ޑިޕޯ" ފިހާރައަށެވެ. އެ ފިހާރައިން ނުކުމެގެން އައިސް، އޭނާ ގަތް މޮހޮރުތަކަކީ ބޮން ގޮއްވާލާއިރު ބޭނުންވާނެ ފަދަ ބާރުގަދަ އެއްޗަކަށް ވާނެ ކަމަށް އުންމީދުކުރާ ކަމަށް އޭނާ ބުނި ކަމަށްވެ އެވެ.

ބޯވީ ހައްޔަރުކުރީ މިދިޔަ ބުދަ ދުވަހު އެވެ. އޭނާ ހައްޔަރުކުރި އިރު އޭނާގެ އަތުން ވަޅިތަކަކާއި، އައިއެސްއަށް ބައިއަތު ހިފާފައިވާކަން ބަޔާންކޮށް ލިޔެފައިވާ ލިޔުމެއް ފެނިފައިވާ ކަމަށް ކޯޓު ރިޕޯޓުތަކުން ދައްކަ އެވެ. ބުރާސްފަތި ދުވަހު އެފްބީއައިއިން ހުށަހެޅި ލިޔުމެއްގައި ބުނެފައިވަނީ އޭނާއަކީ ސޯޝަލް މީޑިއާގައި އެމެރިކާއާ ދެކޮޅު މެސެޖުތައް ފަތުރާ މީހެއް ކަމަށެވެ.

އެ ލިޔުމުގައިވާ ގޮތުން، ސޯޝަލް މީޑިއާގެ އުސޫލުތަކާ ޚިލާފުވުމުގެ ސަބަބުން ބައެއް ޕްލެޓްފޯމްތަކުން އޭނާ ވަނީ ބޭންކޮށްފަ އެވެ. އަދި 11 ސެޕްޓެމްބަރު 2001 ގައި އަލްގައިދާއިން ދިން ޓެރަރިސްޓް ހަމަލާތަކަށް ތައުރީފުކޮށްވެސް އޭނާ ސޯޝަލް މީޑިއާގައި ވާހަކަދައްކާފައިވެ އެވެ.

ނިއުޔޯކްގެ ގަވަރުނަރު ކެތީ ހޯކުލް އެކްސްގައި ކުރެއްވި ޕޯސްޓެއްގައި ވިދާޅުވީ، މި ތަހުގީގު ކުރިއަށް ގެންދިޔަ ކަމަށްޓަކައި އެފްބީއައިއަށް އަދި މި ނުރައްކާތެރި މީހާ ހައްޔަރުކުރުމުގައި ނިއުޔޯކް ސްޓޭޓް ޕޮލިސްއިން ކުރި މަސައްކަތަށް ޝުކުރު އަދާކުރައްވާ ކަމަށެވެ.

އަދި ސިޔާސީ ހަމަނުޖެހުންތަކާއި ސަރުކާރުގެ އޮފިޝަލުންނަށް ދޭ އިންޒާރުތައް އިތުރުވަމުންދާތީ، މި އަހަރުގެ ކުރީކޮޅު ސްޓޭޓް ކެޕިޓަލް ބިލްޑިންގާއި މުޅި ސަރުކާރުގެ ސަލާމަތީ ކަންކަން ވަރުގަދަކުރުމަށް ފިޔަވަޅުތަކެއް އަޅާފައިވާނެ ކަމަށްވެސް ގަވަރުނަރު ވިދާޅުވި އެވެ.