އީރާން ހަނގުރާމަ އަށް ހުރަސް އަޅާނަމަ އޮމާންއަށް ބޮންއަޅާނެ ކަމަށް ޓްރަމްޕް ވިދާޅުވެއްޖެ

އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ހުއްޓުވުމަށް ކުރާ މަސައްކަތަށް އޮމާނުން ހުރަސްއަޅާނަމަ، އެ ގައުމަށް ބޮން އަޅާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް ދެއްވައިފި އެވެ.

ހޯމަ ދުވަހު ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އެމެރިކާގެ މަސައްކަތްތަކަށް އޮމާނުން ހުރަސްއަޅާނަމަ އެ ގައުމަށް ވަރުގަދަ ހަމަލާތަކެއްދީ ސުންނާފަތިކޮށްލާނެ ކަމަށެވެ. މިއީ ވޮޝިންގޓަނާއި ތެހެރާނާ ދެމެދު މުއާމަލާތްކުރުމުގައި މުހިންމު ދައުރެއް އަދާކުރާ، އަދި އެމެރިކާގެ ޒަމާންވީ އިސްތިރާޖީ ބައިވެރިއެއް ކަމަށްވާ އޮމާނަށް އަމާޒުކޮށް ޓްރަމްޕް މިފަދަ އިންޒާރެއް ދެއްވި ދެވަނަ ފަހަރެވެ.

އެމެރިކާގެ ރައީސް މި އިންޒާރު ދެއްވާފައިވަނީ، އީރާނާއެކު ފެށި ހަނގުރާމައަށް ހަ މަސް ދުވަސް ވެފައިވާއިރު، އެ ހަނގުރާމަ ނިމުމަކަށް ގެނައުމަށް އޭނާ ކުރައްވާ މަސައްކަތްތަކަށް ކުރިއެރުމެއް ނުލިބި، ޑިޕްލޮމެޓިކް މަގުން މައްސަލަ ހައްލުކުރުމަށް ކަނޑައެޅި މުއްދަތު ހަމަވިއިރުވެސް އެއްބަސްވުމަކަށް ނާދެވުމާ ގުޅިގެންނެވެ. ނަމަވެސް، ހޯމަ ދުވަހުގެ އިންޓަވިއުގައި ޓްރަމްޕް ވިދާޅުވީ އެއްބަސްވުމަކަށް އައުމަށް އޭނާ "އަވަސް އަރުވާނުލާ" ކަމަށެވެ.

މަޝްވަރާގެ މަގުން މައްސަލަ ހައްލުކުރުމަށް ދިން ދެ މަސް ދުވަހުގެ މުއްދަތު އެއްވެސް ކުރިއެރުމެއް ނުލިބި ހޯމަ ދުވަހު ވަނީ ހަމަވެފަ އެވެ. ހަނގުރާމަ "ވަރަށް އަވަހަށް" ނިމޭނެ ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، އަދި ދާއިމީ ސުލްހައިގެ އެއްބަސްވުމެއްގެ އުންމީދު އޮތް ކަމަށް ފާއިތުވި މަސްތަކުގައި ވިދާޅުވި ނަމަވެސް، އަމަލީ ގޮތުން އެފަދަ އެއްވެސް ނަތީޖާއެއް މިހާތަނަށް ފެނިފައެއް ނުވެ އެވެ.

ހަމަ އެ އިންޓަވިއުގައި ޓްރަމްޕް ވިދާޅުވީ އީރާނުން "ހުދު ދިދަ ނަގައި އަމާންދޭންޖެހޭ" ކަމަށެވެ. ނަމަވެސް، ތެހެރާނަށް އާ ސުންގަޑިއެއް ކަނޑައަޅަން އުޅޭ ކަމުގެ އިޝާރާތެއް އޭނާ ނުދެއްވަ އެވެ. "އަހަރެންގެ އެއްވެސް ތާވަލެއް ނެތް. އަހަރެން މިއުޅެނީކީ އަވަސް އަރުވާލައިގެންނެއް ނޫން،" ޓްރަމްޕް ވިދާޅުވި އެވެ.

ޖޫން މަހުގެ 17 ވަނަ ދުވަހު ޖީ7 ސަމިޓުގެ ހަވާސާގައި، ފަރަންސޭސިވިލާތުގެ ޕެލަސް އޮފް ވާސައިލްގައި ޓްރަމްޕް ވަނީ އީރާނާއެކު ފަހުމުނާމާއެއްގައި ސޮއިކުރައްވާފަ އެވެ. އެ އެއްބަސްވުމުގެ ދަށުން ހަމަލާބަދަލުކުރުން މެދުކަނޑާލައި، ދަތިކުރުމުގެ ފިޔަވަޅުތަކަށް ލުއިދިނުމާއި، އީރާނުގެ ނިއުކްލިއާ ޕްރޮގްރާމާއި އެހެނިހެން މައްސަލަތަކާ ގުޅޭގޮތުން ޖުމްލަ އެއްބަސްވުމަކަށް އައުމަށް 60 ދުވަހުގެ މުއްދަތެއް ދެފަރާތަށް ދެވުނެވެ. މި މުއްދަތު އިތުރުކުރެވެނީ ދެފަރާތުގެ ރުހުމާއެކުގަ އެވެ.

ހަ މަސް ދުވަހުގެ ހަނގުރާމައިގެ ސަބަބުން އެމެރިކާގެ ހަތިޔާރުގެ މިންވަރު މަދުވަމުންދާ ކަމަށް ދެކެވޭ ވާހަކަތަކަށް ރައްދު ދެއްވަމުން ޓްރަމްޕް ވިދާޅުވީ، މިހާތަނަށް އީރާނާ ދެކޮޅަށް ބޭނުންކުރި ހަތިޔާރަކީ ވަރަށް ކުޑަ މިންވަރެއް ކަމަށެވެ.

އޭނާ ތުހުމަތު ކުރެއްވި ގޮތުގައި، އެމެރިކާގެ އެންމެ ޒަމާނީ ހަތިޔާރުތަކާއި ވައިގެ ދިފާއީ ނިޒާމުތައް ވަނީ އޭނާގެ ކުރިން ރައީސްކަން ކުރެއްވި ޖޯ ބައިޑަންގެ ސަރުކާރުން ޔޫކްރެއިނަށް "ހިލޭ ދީފަ އެވެ". މިއީ ހަނގުރާމައިގެ ކުރީކޮޅު ދިފާއީ މާހިރުން ދެއްވަމުން ގެންދެވި އިންޒާރުތަކާ އެއްގޮތް ވާހަކައެކެވެ. އެ މާހިރުން ވިދާޅުވަމުން ގެންދެވީ އެމެރިކާއާއި ބައިވެރިންގެ ހަތިޔާރުގެ ރިޒާވް ހުސްވަމުންދާ މިންވަރު، އެ ތަކެތި އަލުން އުފައްދާ މިންވަރަށްވުރެ އަވަސް ކަމަށެވެ.

ޓްރަމްޕް މި މޭރުމުން ވާހަކަދެއްކެވީ އޭނާގެ "ޓްރުތް ސޯޝަލް" ޕްލެޓްފޯމް މެދުވެރިކޮށް މަޝްވަރާތަކުގައި އޭނާ ދޫނުދޭނެ ކަންކަން ހާމަކުރެއްވުމަށްފަހު އެވެ. އޭނާ ލިޔުއްވާފައިވަނީ "އެންމެ މުހިންމު އަމާޒަކީ، އަދި އަބަދުވެސް އޮންނާނެ އަމާޒަކީ، އެއްވެސް ހާލެއްގައި އީރާނަށް ނިއުކްލިއާ ހަތިޔާރެއް ނުލިބޭނެކަން ކަށަވަރުކުރުން" ކަމަށެވެ.

ދުނިޔޭގެ ވިޔަފާރީގެ މުހިންމު މަގަކަށްވާ ހުރްމުޒް ކަނޑުއޮޅިން ދުނިޔޭގެ ތެލުގެ ފަސްބައިކުޅަ އެއްބައި އާންމުކޮށް އުފުލާއިރު، ފެބްރުއަރީ މަހު އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށި ފަހުން އެ ސަރަހައްދު އޮތީ ބަންދުވެފަ އެވެ.

ހުރްމުޒް ކަނޑުއޮޅީގެ އުތުރުގައި އީރާން އޮތްއިރު، ދެކުނުގައި އޮތީ އޮމާނެވެ. އެ ކަނޑުއޮޅީގެ ކޮންޓްރޯލާ ގުޅޭގޮތުން މި ދެ ގައުމުން ދަނީ މަޝްވަރާ ކުރަމުންނެވެ.

މިދިޔަ މެއި މަހު ބޭއްވި ކެބިނެޓް ބައްދަލުވުމެއްގައިވެސް، އޮމާނުން "ރަނގަޅަށް އަމަލުނުކުރާނަމަ" އެ ގައުމު "ގޮއްވާލާނެ" ކަމުގެ އިންޒާރު ޓްރަމްޕް ވަނީ ދެއްވާފަ އެވެ.

މީގެ އިތުރުން، މިދިޔަ ހުކުރު ދުވަހު ދެއްވި ތަގުރީރެއްގައި ޓްރަމްޕް ވަނީ ހުރްމުޒް ކަނޑުއޮޅިއަކީ "އެމެރިކާގެ މިލްކެއް" ކަމަށް އިއުލާން ކުރައްވާނެ ކަމުގެ އިންޒާރުވެސް ދެއްވާފަ އެވެ.

އޮމާނަކީ އެމެރިކާއާއެކު އެތައް އަހަރެއްގެ އަސްކަރީ އަދި އިގްތިސާދީ ގުޅުންތަކެއް އޮންނަ، 5.3 މިލިއަން މީހުންގެ އާބާދީއެއް އޮތް ގައުމެކެވެ. މި ހަނގުރާމައިގައި މެދުވެރިއެއްގެ ދައުރު އަދާކުރަމުންދާ އޮމާނަށް އީރާނުގެ ހަމަލާތައްވެސް ވަނީ އަމާޒުވެފަ އެވެ.

ޓްރަމްޕްގެ މި އިންޒާރުތަކާ ގުޅިގެން އީރާނުގެ ފޮރިން މިނިސްޓްރީން ހޯމަ ދުވަހު ބުނީ، ޓްރަމްޕް ކިތަންމެ ވަރުގަދަ ބަހުގެ ހަމަލާތަކެއް ދެއްވި ނަމަވެސް، އޮމާނާއެކު ކުރިއަށްދާ މަޝްވަރާތައް ވަރަށް ސީރިއަސްކޮށް ކުރިއަށްދާ ކަމަށެވެ.

މީގެ އިތުރުން، ހަނގުރާމައިގައި އެމެރިކާއާއި އިސްރާއީލުން އަމާޒުކުރަމުންދާ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އާއެކު ސީދާ މުއާމަލާތް ކުރެވޭނެ މަގެއް ވޮޝިންގޓަނުން ހުޅުވާފައިވާކަން ޓްރަމްޕް ފުރަތަމަ ފަހަރަށް ވަނީ ކަށަވަރުކޮށްދެއްވާފަ އެވެ.

އައި.އާރު.ޖީ.ސީގެ ލީޑަޝިޕާ ބެހޭގޮތުން ވާހަކަދައްކަވަމުން ޓްރަމްޕް ވިދާޅުވީ، "އެމީހުންނަކީ މަކަރުވެރި ބައެއް ނަމަވެސް، އެމީހުން އެދަނީ ނެތިދަމުން" ކަމަށެވެ.