މަރާލާ ނުވަތަ އަތުލައިގަންނަ އެމެރިކާގެ ކޮންމެ ސިފައިންގެ މީހަކަށް 30،000 ޑޮލަރުގެ އިނާމު އީރާނުން ހުށަހަޅައިފި

މަރާލާ ނުވަތަ އަތުލައިގަންނަ އެމެރިކާގެ ކޮންމެ ސިފައިންގެ މީހަކަށް 30،000 ޑޮލަރުގެ އިނާމު އީރާނުގެ އަސްކަރިއްޔާއިން އާދީއްތަ ދުވަހު އިއުލާންކޮށްފި އެވެ. އަދި މި އަމަލު ހިންގަނީ އަންހެނަކު ނަމަ، އެ އިނާމު ދެގުނަ ކުރާނެ ކަމަށްވެސް އީރާނުން ވަނީ ބުނެފަ އެވެ.

އީރާނުގެ ރަސްމީ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، އެ ގައުމުގެ އަސްކަރީ ކޮމާންޑަރު އަމީރު ހާތަމީ ވިދާޅުވީ މި ހަރަކާތުގައި ބައިވެރިވުމަށް ގިނަ އަދަދެއްގެ ބަޔަކު އެދެމުންދާތީ މި މަޝްރޫއު މިހާރު އެކުލަވާލާފައިވާ ކަމަށެވެ.

މެދުއިރުމަތީގައި މިހާރު ހިނގަމުންދާ ހަނގުރާމައިގެ ތެރޭގައި، މިދިޔަ އޭޕްރީލް މަހު ވެއްޓުނު އެމެރިކާގެ މަތިންދާބޯޓެއްގެ ފަޅުވެރިއަކު ސަލާމަތްކުރުމަށް ހިންގި އޮޕަރޭޝަން ފިޔަވައި، އެމެރިކާގެ އެއްގަމު ސިފައިން އީރާނުގެ ސަރަހައްދަށް ވަދެފައިވާކަން އެނގިފައެއް ނުވެ އެވެ.

އެމެރިކާ ސިފައިން މަރާލުން ނުވަތަ ހައްޔަރުކުރުން ކުރިއަށްދާނީ ކޮން ތަނެއްގައި ނުވަތަ ކޮން ވަގުތެއްގައި ކަމުގެ އެއްވެސް ތަފްސީލެއް ހާތަމީ ހާމަކުރައްވާފައެއް ނުވެ އެވެ.

އީރާނުގެ ފައިސާގެ ނިސްބަތުން ބަލާއިރު 5 ބިލިއަން ތޯމަންއާ އެއްވަރުގެ މި އިނާމާ ގުޅޭގޮތުން ހާތަމީ ވިދާޅުވީ، އީރާނަށް އަރައިގަނެގެން އުޅޭ އެމެރިކާގެ އަސްކަރީ މީހަކު މަރާލާ ނުވަތަ ހައްޔަރުކޮށް އީރާނުގެ އަސްކަރިއްޔާއާ ހަވާލުކުރާ ކޮންމެ މީހަކަށް 30،000 ޑޮލަރުގެ އިނާމެއް ދޭނެ ކަމަށެވެ.

މީގެ އިތުރުން، ހާތަމީ ވިދާޅުވީ މިފަދަ ކަމެއް ކުރާ ހިތްވަރުގަދަ އީރާނުގެ އަންހެނުންނަށް އެ އިނާމު ދެގުނައަށް ދިނުމަށް ނިންމާފައިވާ ކަމަށެވެ.

އެމެރިކާ ސިފައިން މެދުއިރުމަތިން ފޭބުމަށް އީރާނުން ކުރާ އިލްތިމާސް ތަކުރާރު ކުރައްވަމުން ހާތަމީ ވިދާޅުވީ، އަރަބި ކަނޑުއޮޅިއަށާއި، އޮމާން ކަނޑުގެ ސަރަހައްދަށް ނުވަތަ ހުރްމުޒް ކަނޑުއޮޅިއަށް ވަނުމުގެ ހުއްދަ ދެން އެމެރިކާއަށް ނޯންނާނެ ކަމަށެވެ.

ތެހެރާނާއި ވޮޝިންޓަނާ ދެމެދު ހަނގުރާމަ ފެށުނީ މިއަހަރުގެ ފެބްރުއަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން ގުޅިގެން އީރާނަށް ހަމަލާދިނުމާ ގުޅިގެންނެވެ.

ހަނގުރާމައަށް މަހަކަށްވުރެ ގިނަ ދުވަސް ވީތަނާ، އެމެރިކާގެ އެފް-15 މަތިންދާބޯޓެއްގެ ވެޕަން ސިސްޓަމްސް އޮފިސަރު ސަލާމަތްކުރުމަށް އެމެރިކާއިން ބޮޑު އޮޕަރޭޝަނެއް ހިންގި އެވެ. އީރާނުގެ ސިފައިންނަށްވުރެ ކުރިން އެ އޮފިސަރު ހޯދުމަށް ހިންގި މި އޮޕަރޭޝަންގައި އެމެރިކާގެ 200 އެއްހާ ސިފައިންނާއި 170 އަށްވުރެ ގިނަ މަތިންދާބޯޓު ބައިވެރިވި އެވެ.

މި އޮޕަރޭޝަންގެ ތެރޭގައި އީރާނު ސިފައިން ވަނީ އެމެރިކާގެ އޭ-10 މަރުކާގެ މަތިންދާބޯޓަކަށް ގެއްލުންދީފަ އެވެ. އަދި އެ ބޯޓު ރައްކާތެރި ސަރަހައްދަކަށް ވައްޓާލަން ޖެހުނުއިރު، މި މިޝަންގައި ބޭނުންކުރި ސީ-130 މަރުކާގެ މަތިންދާބޯޓެއް ހިމެނޭހެން ބައެއް އުޅަނދުތައް ދޫކޮށްލައި، އެމެރިކާއިން އަމިއްލައަށް ނައްތާލާފައިވާ ކަމަށް ރިޕޯޓްތައް ބުނެ އެވެ.

މި ބޮޑު އޮޕަރޭޝަންގެ ދުވަސްކޮޅެއް ކުރިން، ހެލިކޮޕްޓަރު ކުރޫއަކުން ވަނީ އެފް-15 ބޯޓުގެ ޕައިލެޓް ކުޑަ އޮޕަރޭޝަނެއްގައި ސަލާމަތްކޮށްފަ އެވެ.

ގާތްގަނޑަކަށް 40 ދުވަހުގެ ހަނގުރާމައަށްފަހު، އޭޕްރީލް މަހު އިއުލާންކުރި ހަނގުރާމަ ހުއްޓާލުމުގެ އެއްބަސްވުމާއެކު ހަނގުރާމަ މެދުކަނޑާލި އެވެ. އަދި ޖޫން މަހު ސުލްހައިގެ ވާހަކަތަކަށް އޮނިގަނޑެއް އެކުލަވާލި ނަމަވެސް، ފަހުން އެ މަސައްކަތް ވަނީ ނާކާމިޔާބުވެފަ އެވެ.

އޭގެ ފަހުން އީރާނާއި އެމެރިކާއާ ދެމެދު ދޭތެރެ ދޭތެރެއިން ހަމަލާތައް ބަދަލުކުރަމުންދާއިރު، ހަމަލާތައް މައިގަނޑު ގޮތެއްގައި އަމާޒުވަނީ އީރާނުގެ ދެކުނު ސަރަހައްދުތަކަށާއި ހުރްމުޒް ކަނޑުއޮޅި ކައިރިއަށެވެ.

މެދުވެރިން މެދުވެރިކޮށް ދެ ގައުމުގެ ދެމެދުގައި ނުސީދާ މުއާމަލާތްތައް ކުރިއަށްދިޔަ ނަމަވެސް، ޑިޕްލޮމެޓިކް ހައްލެއް ލިބޭނެ ކަމުގެ ނިޝާނެއް އަދި ނުފެނެ އެވެ. އީރާނުން ވަނީ ހުރްމުޒް ކަނޑުއޮޅި އަލުން ހުޅުވާލުމަށްޓަކައި، ހަނގުރާމައިގެ ބަދަލު ހޯދުން ހިމެނޭހެން ޝަރުތުތަކެއް ކުރިމަތިކޮށްފަ އެވެ.

ހަނގުރާމަ ފެށުނު ފަހުން މިހާތަނަށް އެމެރިކާގެ 17 ސިފައިން މަރުވެފައިވާއިރު، އެންމެ ފަހުން މީހަކު މަރުވެފައިވަނީ ޖުލައި މަހުގަ އެވެ. މި ހުރިހާ ސިފައިންވެސް މަރުވެފައިވަނީ އީރާނުން ބޭރުގައި، އުރުދުން އަދި އިރާގު ފަދަ ގައުމުތަކުގަ އެވެ.