ދުޝްމަނުން އީރާނުގެ "ސަޕްރައިޒްތަކަށް" ތައްޔާރަށް ތިބުމަށް އެގައުމުގެ އިިސް ކޮމާންޑަރަކު އިންޒާރުދީފި
17 އޯގަސްޓު 2026 | ހޯމަ 02:27އިރާނުގެ އަސްކަރީ ސިޔާސަތުތަކަށް އިންގިލާބީ ބަދަލުތަކެއް ގެނެސް، ދުޝްމަނުންނަށް "ސްޓްރެޓީޖިކް ސަޕްރައިޒް" ދިނުމަށް ތައްޔާރުވަމުންދާކަމުގެ އިންޒާރު އައި.އާރް.ޖީ.ސީ އިން ދީފި. އާ ކޮމާންޑަރުން އައްޔަންކުރުމާއެކު، ދިފާއީ އުސޫލުތަކުގެ ބަދަލުގައި އިސްވެ ހަމަލާދިނުމުގެ ގާބިލުކަން އިތުރުކޮށް، ގައުމުގެ ސަލާމަތަށް ނުރައްކާވާ ކޮންމެ ހާލަތެއްގައި ވަރުގަދަ ރައްދުތަކެއް ދޭނެކަމަށް އެ ގައުމުން ބުނޭ
އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ޕޮލިޓިކަލް ޑެޕިއުޓީ، ބްރިގޭޑިއަރ ޖެނެރަލް ޔާދުﷲ ޖަވާނީ | ޕްރެސްޓީވީ
އިރާނުގެ އަސްކަރީ ހަރަކާތްތައް މިހާތަނަށް ބިނާވެފައިވަނީ ހަމައެކަނި ދިފާއީ އުސޫލުތަކެއްގެ މައްޗަށް ކަމަށްވީ ނަމަވެސް، ބޭނުންވެއްޖެ ހާލަތެއްގައި އިސްވެ ހަމަލާދިނުމުގެ ފުރިހަމަ ގާބިލުކަން އެ ގައުމުގެ ސިފައިންނަށް ލިބިގެންވާ ކަމަށާއި، އިދިކޮޅު ފަރާތްތަކުން "ސްޓްރެޓީޖިކް ސަޕްރައިޒްތަކަށް" ތައްޔާރުވުމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އިސް ކޮމާންޑަރަކު އިންޒާރު ދެއްވައިފި އެވެ.
ހޯމަ ދުވަހުގެ ރޭ ޓީވީ މެދުވެރިކޮށް ދެއްވި އިންޓަވިއުއެއްގައި މިފަދައިން ވިދާޅުވީ އައި.އާރް.ޖީ.ސީގެ ޕޮލިޓިކަލް ޑެޕިއުޓީ، ބްރިގޭޑިއަރ ޖެނެރަލް ޔާދުﷲ ޖަވާނީ އެވެ.
ޖެނެރަލް ޖަވާނީ ފާހަގަކުރެއްވި ގޮތުގައި މި ހަމަނުޖެހުންތައް ފެށީ އިދިކޮޅު ދުޝްމަނުންނެވެ. އަދި މިހާތަނަށް އިރާނުން ދީފައިވާ ހުރިހާ ރައްދުތަކަކީ ހަމައެކަނި ދިފާއީ ރައްދުތަކެއް ކަމަށް އޭނާ ވިދާޅުވި އެވެ.
އެހެންނަމަވެސް، މިހާރު އޮތް ދިފާއީ ސިޔާސަތު ބަދަލުވުމުގެ މަގުމަތީގައިވާ ކަމަށާއި، މިއީ އަސްކަރިއްޔާގެ ސްޓްރެޓީޖިކް އުސޫލުތަކަށް އަންނާނެ ބޮޑު އަދި އިންގިލާބީ ބަދަލެއް ކަމަށް އޭނާ އިންޒާރު ދެއްވި އެވެ.
"އަހަރެމެން ސިއްސުވާލެވިދާނެ ކަމަށް ދުޝްމަނުން ހީކޮށްގެން ނުވާނެ،" ޖެނެރަލް ޖަވާނީ ވިދާޅުވި އެވެ. "އޭގެ ބަދަލުގައި، ސްޓްރެޓީޖިކް ސަޕްރައިޒްތަކަކަށް ނުވަތަ ހީނުކުރާ ފަދަ ވަރުގަދަ ހަމަލާތަކަކަށް އިންތިޒާރު ކުރަންޖެހޭނީ ދުޝްމަނުން."
އޭނާ ވަނީ ދާދިފަހުން އައި.އާރް.ޖީ.ސީގެ އިސް މަގާމުތަކަށް އައްޔަންކުރެއްވި ބޭފުޅުންނަށް، ހާއްސަކޮށް އާ ކޮމާންޑަރ-އިން-ޗީފް މޭޖަރ ޖެނެރަލް އަހުމަދު ވަހީދީއަށް ދީފައިވާ މެންޑޭޓަށް ސީދާ ގޮތެއްގައި އިޝާރާތް ކުރައްވާފަ އެވެ.
ޖެނެރަލް ޖަވާނީ ފާހަގަކުރެއްވި ގޮތުގައި އާ ކޮމާންޑަރުން އައްޔަންކުރުމަކީ ހަމައެކަނި އިދާރީ ބަދަލެއް ނޫނެވެ. އެއީ ޒަމާނީ ހަނގުރާމައިގެ ގޮންޖެހުންތަކާ ކުރިމަތިލުމަށް އިރާނުގެ އަސްކަރީ އުސޫލުތައް ތަރައްގީވަމުންދާކަން ދުޝްމަނުންނަށް އަންގައިދޭ ސާފު ސިގްނަލެކެވެ.
ޖެނެރަލް ޖަވާނީ ވިދާޅުވި ގޮތުގައި، ޖެނެރަލް ވަހީދީއަށް ދީފައިވާ އަމުރުގައި "އެންމެ މަތީ ދަރަޖައިގެ ދިފާއީ ބާރު" ދެއްކުމަށް ބާރުއަޅާފައިވެ އެވެ. އަދި މީގެ ފަހުން އަސްކަރިއްޔާއިން އަޅާ ކޮންމެ ދިފާއީ ފިޔަވަޅެއްގައި، ކުރިމަތިވެދާނެ ނުރައްކާތައް ނައްތާލުމަށްޓަކައި އިސްވެ ހަމަލާދިނުމުގެ ސިފަ އެކުލެވިގެންވާނެ ކަމަށް އޭނާ ވިދާޅުވި އެވެ.
އިސްލާމީ ޖުމްހޫރިއްޔާއަކީ ކުރީގެ ލީޑަރު އިމާމް ޚުމައިނީ އާއި، ޝަހީދުވެފައިވާ ލީޑަރު އާޔަތުﷲ ސައްޔިދު އަލީ ޚާމަނާއީގެ ޒައާމަތުގައި ވެސް އަދި މިހާރުގެ ލީޑަޝިޕްގައި ވެސް ދުވަހަކުވެސް އިސްވެ ހަމަލާދިން ބައެއް ނޫންކަން ތަކުރާރު ކުރައްވަމުން، ދުޝްމަނުން ހަދަމުންދާ "ގޯސް ހިސާބުތަކަށް" ޖެނެރަލް ފާޑުވިދާޅުވި އެވެ.
"މި ބިން ދިފާއުކުރުމަށާއި، ސަލާމަތްތެރިކަން ކަށަވަރުކުރުމަށާއި، ދުޝްމަނުންގެ ނުރައްކާތައް ނައްތާލުމަށް ކުރަންޖެހުނު ކޮންމެ ކަމެއް އެންމެ އެކަށީގެންވާ ވަގުތުގައި ކުރާނަން،" ޖެނެރަލް ޖަވާނީ ވިދާޅުވި އެވެ. އަދި ދާދިފަހުން ހިނގާދިޔަ ހާދިސާތަކުން ވެސް އަސްކަރިއްޔާގެ މި އަޒުމް ދައްކުވައިދީފައިވާނެ ކަމަށް އޭނާ ވިދާޅުވި އެވެ.
އައި.އާރް.ޖީ.ސީގެ ކޮމާންޑަރ-އިން-ޗީފްގެ މަގާމަށް މޭޖަރ ޖެނެރަލް އަހުމަދު ވަހީދީ އައްޔަންކުރުމަކީ އިރާނުގެ އަސްކަރީ އަދި ސްޓްރެޓީޖިކް ލީޑަޝިޕް ވަރުގަދަވެގެންދިޔަ މުހިންމު ނިންމުމެއް ކަމަށް އީރާނުގެ މީޑިއާ ރިޕޯޓުތައް ބުނެ އެވެ.
ޖެނެރަލް ވަހީދީއަކީ 1980 ގެ އަހަރުތަކުގައި އިރާގުން އިރާނަށް އެރި ހަނގުރާމައިގައި އަމަލީ ގޮތުން ބައިވެރިވެވަޑައިގެންފައިވާ، އަދި އިރާނުގެ ސަލާމަތީ އިދާރާތަކުގެ އިތުބާރު ބޮޑު، އެތައް އަހަރެއްގެ ތަޖުރިބާ ލިބިވަޑައިގެންފައިވާ ބޭފުޅެކެވެ.
މީގެ ކުރިން އޭނާ ވަނީ މިނިސްޓަރ އޮފް ޑިފެންސް އެންޑް އާމްޑް ފޯސަސް ލޮޖިސްޓިކްސްގެ މަގާމާއި ހޯމް މިނިސްޓަރުގެ މަގާމު ފުރުއްވާފައެވެ. މީގެ ސަބަބުން ނުރަސްމީ ހަނގުރާމައިގެ އުކުޅުތަކާއި ގައުމުގެ އެތެރޭގެ ސަލާމަތީ ކަންކަން އޭނާއަށް ވަރަށް ރަނގަޅަށް އެނގިވަޑައިގަންނަވަ އެވެ.
އައި.އާރް.ޖީ.ސީގެ އެންމެ މަތީ މަގާމަށް އޭނާ އައްޔަންކުރުމަކީ، އިރާނުގެ ދިފާއީ ސިޔާސަތު އިތުރަށް ގުޅުވާލައި، އިސްވެ ފިޔަވަޅު އަޅާ އަދި ހުރަސްތަކަށް ނުގުޑާ ފަދަ ވަރުގަދަ ނިޒާމަކަށް ބަދަލުކުރުމަށް ނިންމާފައިވާ ނިންމުމެއްކަން ހާމަވެގެންދާ ކަމެކެވެ.
