ސަައުދީ އާއި ތުރުކީ އަދި ޕާކިސްތާނުން ސޮއިކުރި ދިފާއީ އެއްބަސްވުމަށް ޓްރަމްޕް ތައުރީފު ކުރައްވައިފި

ސައުދީ އަރަބިއްޔާ އާއި ތުރުކީ އަދި ޕާކިސްތާން ގުޅިގެން ސޮއިކުރި "މައްކާ ޖޮއިންޓް ޑިފެންސް އެގްރީމަންޓް" އަށް އެމެރިކާގެ ރައީސް ޑޮނަލްޑް ޓްރަމްޕް ވަރަށް ބޮޑަށް ތައުރީފު ކުރައްވައި މަރުހަބާ ވިދާޅުވެއްޖެ އެވެ.

ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ސައުދީ އަރަބިއްޔާ އާއި ތުރުކީ އަދި ޕާކިސްތާން އިން ދާދި ފަހުން މި އެއްބަސްވުމުގައި ސޮއި ކޮށްފައިވާތީ އެކަމާ ވަރަށް ބޮޑަށް އުފާ ކުރައްވާ ކަމަށެވެ. މިއީ މެދުއިރުމަތީގެ ޤައުމުތައް އެކަތިގަނޑަކަށް ވަމުންދާ ކަމުގެ ހެއްކެއް ކަމަށް ވެސް ޓްރަމްޕް ފާހަގަ ކުރެއްވި އެވެ.

މި އެއްބަސްވުމާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، މިއީ އެ ޤައުމުތަކަށް އަމިއްލަ އަށް ދިފާއުވުމުގެ ޤާބިލުކަން އިތުރު ކުރުމަށް އެޅުނު ވަރަށް މުހިންމު ފިޔަވަޅެއް ކަމަށެވެ. އަދި މިފަދަ އިސްނެގުމެއްގެ ސަބަބުން ޤައުމުތަކަށް މާނަހުރި ގޮތެއްގައި އަމިއްލަ ސަލާމަތާއި ރައްކާތެރިކަން ކަށަވަރު ކުރުމުގެ ފުރުސަތު ލިބިގެންދާނެ ކަމަށް ވެސް ޓްރަމްޕް ވިދާޅުވި އެވެ.

މީގެ އިތުރުން، މި ތިން ޤައުމުގެ ލީޑަރުން ދެއްކެވި ހިކުމަތްތެރިކަމަށް ޓްރަމްޕް ވަނީ މަރުހަބާ ވިދާޅުވެފައި އެވެ. ޓްރަމްޕް ސިފަކުރެއްވި ގޮތުގައި މިއީ ވަރަށް ބޮޑު، ހިތްވަރުގަދަ އަދި އެހާމެ މުހިންމު ފިޔަވަޅެވެ. މި އެއްބަސްވުމުގެ ސަބަބުން ސަރަހައްދީ ހަމަޖެހުމާއި ރައްކާތެރިކަމަށް އައު އުންމީދުތަކެއް ލިބިގެންދާނެ ކަމަށް ބެލެވޭ ކަމަށް ވެސް ޓްރަމްޕް ވިދާޅުވި އެވެ.

ސައުދީ، ތުރުކީ އަދި ޕާކިސްތާން ގުޅިގެން ދިފާއީ އެއްބަސްވުމެއްގައި ސޮއި ކޮށްފައި މިވަނީ، ދުނިޔޭގެ ސިޔާސީ މަސްރަހަށް ބޮޑެތި ބަދަލުތަކެއް އަންނަމުންދާ ދަނޑިވަޅެއްގައި އެވެ. ޚާއްސަކޮށް އިސްލާމީ ބޮޑެތި ބާރުތަކުން މިފަދަ އިއްތިހާދެއް އުފެއްދުމަކީ ބައިނަލްއަގުވާމީ ސިޔާސީ މަސްރަހުގައި ވަރަށް މުހިންމު ކަމެއްގެ ގޮތުގައި ތަޖުރިބާކާރުން ދެކެ އެވެ.