އެމެރިކާ އިން އީރާނުގެ ބަނދަރުތައް "މުއްދަތެއް ނެތް" ގޮތަށް ބަންދުކުރުމުގެ އިންޒާރު ދިނުން: މިއީ ކިހާ ދުވަހަކަށް ދެމިއޮންނާނެ ކަމެއްބާ؟

އީރާނާއި އެމެރިކާއާ ދެމެދު ކުރިއަށްދާ ހަނގުރާމަ ހުއްޓާލުމުގެ މަޝްވަރާތައް މަރުތަޅަކަށް އެރިފައިވާ ދަނޑިވަޅެއްގައި، އީރާނުގެ ބަނދަރުތައް "މުއްދަތެއް ނެތް" ގޮތަށް ބަންދުކޮށް (ނޭވަލް ބްލޮކޭޑް)، އެ ގައުމު އިގްތިސާދީ ގޮތުން އެކަހެރިކުރުމަށް އާ ފިޔަވަޅުތަކެއް އަޅާނެ ކަމުގެ އިންޒާރު އެމެރިކާއިން ވަނީ ދީފަ އެވެ.

ނަމަވެސް، އެމެރިކާގެ މައި މަނަވަރު "ޔޫއެސްއެސް އަބްރަހަމް ލިންކަން" ގައި ތިބި ފަޅުވެރިންގެ ހާލަތު ވަރަށް ބޮޑަށް ގޯސްވެ، ބައެއް ސިފައިން މަނަވަރުން މޫދަށް ފުންމާލަން މަސައްކަތް ކުރަމުންދާ ކަމުގެ ރިޕޯޓްތަކާ ގުޅިގެން، އެމެރިކާގެ ގާނޫނު ހަދާ މަޖިލީހުގެ މެންބަރުން މި ހަފުތާގައި ވަނީ ކަންބޮޑުވުން ފާޅުކުރައްވާފަ އެވެ.

މީގެ އިތުރުން، ހަނގުރާމަ ފެށުނުތާ ކުޑަދުވަސްކޮޅެއްގެ ތެރޭގައި، މާޗް މަހުގެ ކުރީކޮޅު އީރާނުން ބަންދުކުރި ހުރްމުޒް ކަނޑުއޮޅީގެ "ފުރިހަމަ ކޮންޓްރޯލް" އެމެރިކާއަށް އޮތް ކަމަށް ރައީސް ޑޮނަލްޑް ޓްރަމްޕް ވިދާޅުވި ނަމަވެސް، މި ހަފުތާގައި އެ ކަނޑުއޮޅިން ދަތުރުކުރެވުނީ ވަރަށް މަދު އުޅަނދަކަށެވެ.

"ހުރްމުޒް ކަނޑުއޮޅި މިހާރު ބަންދުކޮށްފައި ނެތް ކަމަށް ބުނެ އެމެރިކާގެ އޮފިޝަލުން ކުރަމުންދާ ދައުވާތަކާއި ސޯޝަލް މީޑިއާ ޕޯސްޓްތަކުން ހަގީގަތެއް ބަދަލެއް ނުވާނެ،" އީރާނުގެ ޕާޝިއަން ގަލްފް ސްޓްރެއިޓް އޮތޯރިޓީ (ޕީޖީއެސްއޭ) އިން ބުދަ ދުވަހު އެކްސްގައި ކުރި ޕޯސްޓެއްގައި ބުނެފައިވެ އެވެ.

އެ އިދާރާއިން އިތުރަށް ބުނީ، ހުރްމުޒް ކަނޑުއޮޅި އޮތީ ބަންދުކޮށްފައި ކަމަށާއި، އީރާނުން ހުށަހަޅާފައިވާ ޝަރުތުތައް ގަބޫލުކުރަންދެން އެ ތަން އަލުން ހުޅުވައިނުލާނެ ކަމަށެވެ.

ވުމާއެކު، އެމެރިކާއަށް މިފަދަ ކަނޑުގެ ބްލޮކޭޑެއް ހަގީގަތުގައި ދެމެހެއްޓޭނީ ކިހާ ދުވަހަކަށް ހެއްޔެވެ؟ އަދި އީރާނަށް މި ހާލަތުގައި ކެތްކޮށްލައިގެން ތިބެވިދާނެ ހެއްޔެވެ؟

މިހާތަނަށް އެނގިފައިވާ މައުލޫމާތުތަކަކީ މިއީއެވެ:

އެމެރިކާއިން ބުނަނީ ކީކޭ؟

ބުރާސްފަތި ދުވަހު އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ނޫސްވެރިންނަށް ވިދާޅުވީ، އީރާނުގެ ބަނދަރުތައް ބަންދުކޮށްފައި ބޭއްވުމަށްޓަކައި އެ ސަރަހައްދުގައި އެމެރިކާގެ އަސްކަރީ މަނަވަރުތައް "މުއްދަތެއް ނެތް" ގޮތަށް ބޭތިއްބުމުގެ ގާބިލުކަން އެބަހުރި ކަމަށެވެ.

ޕެނަމާއަށް ކުރެއްވި ދަތުރުފުޅެއްގައި ނޫސްވެރިންނާ ވާހަކަދައްކަވަމުން ހެގްސެތު ވިދާޅުވީ، އެމެރިކާގެ މަނަވަރުތައް ދޭތެރެ ދޭތެރެއިން ބަދަލުކުރަމުންދާނެ ކަމަށާއި، އެހެންކަމުން މި ބްލޮކޭޑް މުއްދަތެއް ނެތް ގޮތަށް ކުރިއަށް ގެންދެވޭނެ ކަމަށެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވެސް ވަނީ އީރާނަށް ފިއްތުންތައް ކުރިމަތިކުރުވުމަށް އިގްތިސާދީ އާ ފިޔަވަޅުތަކެއް އަޅާނެ ކަމަށް ވިދާޅުވެފަ އެވެ. "އަންނަ ހަފުތާގައި އިއުލާންކުރާ ކަންތައްތަކަށް ބަލަން ތިބޭ. ގައުމެއް އިގްތިސާދީ ގޮތުން އެކަހެރިކުރުމުގެ ތާރީޚުގައި ދުވަހަކުވެސް ފެނިފައި ނުވާ ފަދަ ވަރުގަދަ ފިޔަވަޅުތަކެއް އަޅާނަން،" ބުރާސްފަތި ދުވަހު ނިއުސްމެކްސްއަށް ދެއްވި އިންޓަވިއުއެއްގައި ބެސެންޓް ވިދާޅުވި އެވެ.

އޭނާ އިތުރަށް ވިދާޅުވީ، ދުނިޔެ ދުވަހަކުވެސް ނުދެކޭ ފަދަ އިގްތިސާދީ އެކަހެރިކުރުމަކާއި، ހުރްމުޒް ކަނޑުއޮޅީގެ ބްލޮކޭޑް އެކުވެގެން ދިއުމުން، އީރާނުގެ ބަނދަރުތަކުން އެއްވެސް އެއްޗެއް ބޭރުކުރުމާއި އެތެރެކުރުން މުޅިން ހުއްޓޭނެ ކަމަށެވެ.

ޔޫއެސްއެސް އަބްރަހަމް ލިންކަންގެ ހާލަތާ މެދު ކަންބޮޑުވުން އުފެދެނީ ކީއްވެ؟

ހުރްމުޒް ކަނޑުއޮޅި ސަރަހައްދުގައި ސަލާމަތީ ކަންކަން ބެލެހެއްޓުމާއި ބްލޮކޭޑް ތަންފީޒުކުރުމުގައި ހަރަކާތްތެރިވާ އެމެރިކާގެ މައި އެއާކްރާފްޓް ކެރިއަރު "ޔޫއެސްއެސް އަބްރަހަމް ލިންކަން" ގެ އެތެރޭގެ ހާލަތާ މެދު ވަނީ ސުވާލު އުފެދިފަ އެވެ.

އަސްކަރީ ކަންކަމަށް ޚާއްސަ ދެ ނޫހެއް ކަމަށްވާ "ނޭވީ ޓައިމްސް" އާއި "ސްޓާސް އެންޑް ސްޓްރައިޕްސް" އިން ރިޕޯޓްކޮށްފައިވާ ގޮތުގައި، އެ މަނަވަރުގައި ތިބި ސިފައިންގެ ނަފްސާނީ ދުޅަހެޔޮކަން ވަރަށް ބޮޑަށް ދަށްވެ، އަމިއްލައަށް މަރުވުމުގެ ޚިޔާލުތައް ކުރާ މިންވަރު ވަނީ އިތުރުވެފަ އެވެ.

ނޭވީ ޓައިމްސްއާ ވާހަކަދެއްކި ފަޅުވެރިއެއްގެ އަނތްބެއް ކަމަށްވާ އެނަބެލް ލޯމާ ބުނި ގޮތުގައި، އޭނާގެ ފިރިމީހާ ވަނީ މަނަވަރުން މޫދަށް ފުންމާލަން މަސައްކަތް ކޮށްފަ އެވެ. އޭނާ ސިފަކުރި ގޮތުގައި މަނަވަރުގައި ތިބި ސިފައިން ތިބީ މަސައްކަތް ބުރަވެ، ނަފްސާނީ ގޮތުން މުޅިން ވަރުބަލިވެފަ އެވެ.

މި ރިޕޯޓްތަކާ ގުޅިގެން އެމެރިކާގެ ގާނޫނު ހަދާ މަޖިލީހުގެ މެންބަރުން ދަނީ ކަމާބެހޭ ފަރާތްތަކާ ސުވާލު ކުރަމުންނެވެ.

ޑިފެންސް ސެކްރެޓަރީ ޕީޓް ހެގްސެތަށް ފޮނުއްވި ސިޓީއެއްގައި ޑިމޮކްރެޓިކް ސެނެޓަރ ރިޗަޑް ބްލޫމެންތަލް ވިދާޅުވީ، މިދިޔަ އަހަރުގެ ނޮވެމްބަރު މަހު ކެލިފޯނިއާގެ ސެން ޑިއޭގޯއިން ފުރި މި މަނަވަރު، އެއްވެސް ބަނދަރަކަށް މަޑުނުކޮށް ކަނޑުމަތީގައި އޮންނަތާ މިހާރު ހަތް މަސް ވެފައިވާ ކަމަށެވެ. މިއީ އެމެރިކާގެ އެއާކްރާފްޓް ކެރިއަރެއް ބަނދަރަކަށް ނުޖައްސައި ކަނޑުމަތީގައި އޮތް އެންމެ ދިގު މުއްދަތެވެ.

މަނަވަރުގައި ތިބި 5,000 އަށްވުރެ ގިނަ ސިފައިންގެ ނަފްސާނީ ދުޅަހެޔޮކަން ގޯސްވުމުގެ އިތުރުން، އަސާސީ ތަކެތި ހުސްވުމާއި، ބޯފެން ތަޣައްޔަރުވުމާއި، ސަލާމަތީ ހާދިސާތައް އިތުރުވުމާއި، އަދި ސިފައިންނަށް އާއިލާތަކުން ފޮނުވާ ތަކެތި ލިބޭ މެއިލްގެ ޚިދުމަތަށް ބުރޫއަރާފައިވާ ކަމަށް ބްލޫމެންތަލް ފާހަގަކުރެއްވި އެވެ.

"މި ރިޕޯޓްތަކަށް ވަގުތުން ސަމާލުކަން ދޭންޖެހޭ. މީގެ އިތުރުން، އެމެރިކާގެ ނޭވީއަށް މިފަދަ ބުރަ މަސައްކަތްތަކެއް ދެމެހެއްޓޭނެތޯ ސުވާލު އުފެދޭ. ޚާއްސަކޮށް މި ސަރުކާރުން އަމިއްލައަށް އިޚްތިޔާރުކުރާ ހަނގުރާމަތަކަށް ސިފައިން ފޮނުވައި، އެކަން ދެމެހެއްޓުމަށް އެއާކްރާފްޓް ކެރިއަރުތަކަށް ބަރޯސާވާ މިންވަރު އިތުރުވަމުންދާތީ،" ބްލޫމެންތަލް ލިޔުއްވާފައިވެ އެވެ.

އެމެރިކާގެ ސެނެޓަރުން ދަނީ ހެގްސެތުގެ ކިބައިން ޖަވާބުދާރީވުމަށް އެދެމުންނެވެ. ސެނެޓްގެ މައިނޯރިޓީ ލީޑަރު ޗަކް ޝޫމަރ ވަނީ މި މަނަވަރުގެ ކަންކަން ބެލެހެއްޓުމުގައި ހެގްސެތު ނުކުޅެދިފައިވާ ކަމަށް ވިދާޅުވެ، އޭނާ މަގާމުން ވަކިކުރުމަށް ގޮވާލައްވާފަ އެވެ.

ޝޫމަރ އެކްސްގައި ކުރެއްވި ޕޯސްޓެއްގައި ވިދާޅުވީ، ހެގްސެތަކީ ގާބިލު މީހެއް ނޫންކަން އެންމެންނަށް ވެސް އެނގޭ ކަމަށާއި، އޭނާގެ ސަބަބުން އެމެރިކާގެ ހިތްވަރުގަދަ ސިފައިން ބޮޑު ތަކުލީފެއް އުފުލަމުންދާ ކަމަށެވެ. އަދި ހެގްސެތު ވަގުތުން މަގާމުން ވަކިކުރަންޖެހޭ ކަމަށް އޭނާ ވިދާޅުވި އެވެ.

ކެލިފޯނިއާގެ މެންބަރު މައިކް ލެވިން އިސްކޮށް ހުންނަވައިގެން، ހެގްސެތާއި ނޭވީގެ އެކްޓިން ސެކްރެޓަރީ ހަންގް ކާއޯގެ ކިބައިން ވެސް ވަނީ މިކަމުގެ ޖަވާބު ހޯދުމަށް އެދިވަޑައިގެންފަ އެވެ.

ލެވިން ހިއްސާކުރެއްވި ސިޓީއެއްގައި ބުނެފައިވަނީ، ޔޫއެސްއެސް ލިންކަންގެ ބަދަލުގައި އެހެން މަނަވަރެއް ފޮނުވަން ކުރާ މަސައްކަތް އެކަނި ފުދޭވަރު ނުވާ ކަމަށެވެ. އަދި މިފަދަ ހާލަތެއް މެދުވެރިވާން ދިމާވި ސަބަބުތަކުގެ ތެދު މައުލޫމާތު ޑިފެންސް ޑިޕާޓްމަންޓުން ހާމަކުރަންޖެހޭ ކަމަށް އެ ސިޓީގައިވެ އެވެ.

އެ ސިޓީގައި އިތުރަށް ސުވާލުކޮށްފައިވަނީ، މަނަވަރުގެ ނުތާހިރު ހާލަތު ވަގުތުން ރަނގަޅު ނުކުރީ ކީއްވެގެންތޯއާއި، ސިފައިންނަށް އެކަށީގެންވާ ނަފްސާނީ އެހީތެރިކަން ނުދިނީ ކީއްވެގެންތޯ އެވެ.

ނަމަވެސް ހެގްސެތު ވަނީ މަނަވަރުގެ ހާލަތު ގޯސްކަމަށް ބުނާ ރިޕޯޓްތައް ދޮގުކުރައްވާފަ އެވެ. އޭނާ ވިދާޅުވީ އެއީ ހަގީގަތް އޮޅޭ ގޮތަށް ފަތުރާފައިވާ ވާހަކަތަކެއް ކަމަށެވެ.

މީގެ އިތުރުން، ޔޫއެސްއެސް އަބްރަހަމް ލިންކަންގައި ހިނގި ކުރިމަތިލުމެއްގައި އެމެރިކާގެ ހަތް ސިފައިން މަރުވެ، ގިނަ ބަޔަކު ޒަޚަމްވި ކަމަށް އީރާނުގެ މީޑިއާތަކުން ރިޕޯޓްކުރުމާ ގުޅިގެން އިތުރު ސުވާލުތަކެއް ވަނީ އުފެދިފަ އެވެ.

އެމެރިކާއިން މި ވާހަކަތައް ވަނީ ވަރަށް ބޮޑަށް ދޮގުކޮށްފަ އެވެ. އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހުކުރު ދުވަހު ބުނީ، ސިފައިން މަރުވި ކަމަށް ބުނާ ވާހަކައާއި އަމިއްލައަށް މަރުވާން އުޅޭ ކަމަށް ބުނާ ވާހަކަތަކަކީ ދޮގު ވާހަކަތަކެއް ކަމަށެވެ.

ސެންޓްކޮމްއިން ބުނީ، ކަނޑުމަތީގައި 260 އަށްވުރެ ގިނަ ދުވަސް ހޭދަކުރުމަށްފަހު ވެސް ސިފައިން ތިބީ ވަރަށް ސާބިތުކަމާއެކު ކަމަށެވެ. އަދި އެއްވެސް މީހަކު މަރުނުވާ ކަމަށާއި، އޮގަސްޓް 3 ގައި މޫދަށް ވެއްޓުނު އެއް ސިފައިންގެ މީހާ ވަގުތުން ސަލާމަތްކޮށްފައިވާ ކަމަށް ވެސް ބުނެފައިވެ އެވެ.

އެމެރިކާގެ ނޭވީއަށް މިކަން ދިގު މުއްދަތަކަށް ދެމެހެއްޓިދާނެތަ؟

ޓްރަމްޕް ސަރުކާރުން ބުނަނީ މަނަވަރުތައް ބަދަލުކޮށްގެން ސިފައިންނަށް ކުރިމަތިވާ ފިއްތުންތައް ކުޑަކުރާނެ ކަމަށެވެ. އެގޮތުން މިހާރު ޕެސިފިކް ކަނޑުގައި އޮތް "ޔޫއެސްއެސް ޖޯޖް ވޮޝިންޓަން" މެދުއިރުމައްޗަށް ދަތުރުކުރަން ފަށާފައިވާ ކަމަށް ހުކުރު ދުވަހު ވަނީ ރިޕޯޓްކޮށްފަ އެވެ.

ނަމަވެސް ތަޖުރިބާކާރުން ބުނަނީ، މިހާރު ގަލްފް ސަރަހައްދުގައި ތިބި މަނަވަރުތައް ބްރޭކެއް ނުލިބި އޮންނަތާ މާ ގިނަ ދުވަސް ވެއްޖެ ކަމަށެވެ.

ނޭވީގެ ކުރީގެ އިސް އޮފިސަރެއް ކަމަށްވާ ހާލަން އުލްމަން ވިދާޅުވީ، ޔޫއެސްއެސް އަބްރަހަމް ލިންކަން ފަދަ އޮޅުންބޮޅުން ބޮޑު، ޒަމާނީ މަނަވަރެއް ބަނދަރަކަށް ވައްދައިގެން މަރާމާތުކުރަން ޖެހޭ ކަމަށެވެ.

އަލްޖަޒީރާއާ ވާހަކަދައްކަވަމުން އުލްމަން ވިދާޅުވީ، މަނަވަރުގައި ހުންނަ ޒަމާނީ ޓެކްނޮލޮޖީތައް މަސައްކަތްކުރާ ހާލަތުގައި ބެހެއްޓުމަށްޓަކައި އެއްގަމުން ދޭންޖެހޭ ޚިދުމަތްތައް ބޭނުންވާ ކަމަށެވެ. ކަނޑުމަތީގައި ތިބެގެން ކުރެވޭނީ ވަކިވަރެއްގެ މަރާމާތެއް ކަމަށާއި، ގިނަ ކަންކަން ކުރެވޭނީ ބަނދަރެއްގައި ކަމަށް އޭނާ ފާހަގަކުރެއްވި އެވެ.

އޭނާ އިތުރަށް ވިދާޅުވީ، ނުވަ މަސް ދުވަހަށްވުރެ ގިނަ ދުވަހު ކަނޑުމަތީގައި އޮތުމުން މަނަވަރުގެ ތައްޔާރީ ހާލަތާއި ގާބިލުކަން ދަށްވަމުންދާ ކަމަށެވެ. އަދި ޓްރަމްޕް ސަރުކާރުން ސިޔާސީ ކަންކަމަށްވުރެ ބޮޑަށް ނޭވީގެ ތައްޔާރީ ހާލަތަށް އިސްކަންދޭންޖެހޭ ކަމަށް ވެސް އޭނާ ވިދާޅުވި އެވެ.

އެމެރިކާގެ ބްލޮކޭޑަށް އީރާނަށް ކެތްކުރެވޭނެތަ؟

އެމެރިކާގެ އުންމީދަކީ ކަނޑުގެ ބްލޮކޭޑް ދަމަހައްޓައިގެން އީރާނުގެ އިގްތިސާދު އިނދަޖައްސާލުމެވެ.

އެމެރިކާގެ ދިފާއީ ހަތިޔާރު މަދުވަމުންދާ ކަމަށް ބުނާ ރިޕޯޓްތަކާ ގުޅިގެން (ޓްރަމްޕް މިކަން ދޮގުކުރައްވާ)، އަސްކަރީ ހަމަލާތަކަށްވުރެ ބޮޑަށް އީރާނުގެ އިގްތިސާދު ފިއްތާލުމަށް ޓްރަމްޕް އިސްކަންދެއްވާނެ ކަމުގެ އިޝާރާތެއް ވަނީ ދެއްވާފަ އެވެ.

އޮގަސްޓް 9 ގައި އެކްސިއޯސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އީރާނާ ދެކޮޅަށް ކުރާ ހަނގުރާމައިގައި އެމެރިކާއިން ގެންގުޅެނީ "ލޯ-ކީ" ނުވަތަ މާ ބޮޑަށް ފާޅުނުކޮށް ކުރިއަށް ގެންދާ ސިޔާސަތެއް ކަމަށެވެ.

ޖެހިގެން އައި ދުވަހު ޓްރަމްޕް ވިދާޅުވީ، އީރާނުގެ މާލީ ހާލަތު ވަރަށް ބޮޑަށް ގޯސްވެފައިވާ ކަމަށާއި، އިންފްލޭޝަން މަތިވެ، ސިފައިންނަށް މުސާރަ ދިނުމަށް ވެސް އީރާނަށް ދަތިވެފައިވާ ކަމަށެވެ. އަދި މިއީ އެމެރިކާގެ ބްލޮކޭޑްގެ ނަތީޖާ ކަމަށް އޭނާ ވިދާޅުވި އެވެ.

އެމެރިކާގެ ބްލޮކޭޑްގެ ސަބަބުން އީރާނުގެ އެންމެ މުހިންމު އާމްދަނީ ކަމަށްވާ ސާފުނުކުރާ ތެޔޮ ބޭރުކުރުމަށް ވަނީ ހުރަސް އެޅިފަ އެވެ. އޭޕްރީލް 13 ގައި ބްލޮކޭޑް ފެށުނު ފަހުން އީރާނަށް ތެލުގެ އާމްދަނީން މަދުވެގެން 6 ބިލިއަން ޑޮލަރުގެ ގެއްލުން ވެފައިވާ ކަމަށް ރިޕޯޓްތައް ބުނެ އެވެ. އީރާނުން މި ބްލޮކޭޑް ސިފަކުރަނީ "ކަނޑުފޭރުމުގެ އަމަލެއް" ގެ ގޮތުގަ އެވެ.

ނަމަވެސް، އެމެރިކާއިން ބުނާ ވަރަށްވުރެ އީރާނުގެ މަގާމު ވަރުގަދަ ކަމަށް ތަޖުރިބާކާރުން ބުނެ އެވެ.

އިންޓަނޭޝަނަލް ކްރައިސިސް ގްރޫޕްގެ އަލީ ވާޢިޒް ވިދާޅުވީ، އެމެރިކާގެ މަނަވަރުތަކަށް ހަމަލާދީގެން ނުވަތަ ޔަމަނުގެ ހޫޘީން މެދުވެރިކޮށް ސަރަހައްދީ ހަކަތަ ބޭރުކުރާ މަގުތައް ބަންދުކޮށްގެން އީރާނަށް ފިއްތުންތައް އިތުރުކުރެވިދާނެ ކަމަށެވެ. އީރާނުން ގަބޫލުކުރާ ގޮތުގައި އެމެރިކާއާ ދެކޮޅަށް ކުރާ ކޮންމެ ކުރިމަތިލުމެއްގައި ވެސް އެންމެ ފަހު ވަގުތު ފަހަތަށް ޖެހެނީ އެމެރިކާ އެވެ.

އީރާނާ ދެކޮޅަށް ހަނގުރާމަ ފެށުނު ފަހުން ވެސް، އަސްކަރީ ފިޔަވަޅު އަޅާނެ ކަމުގެ އިންޒާރު ދިނުމަށްފަހު އެންމެ ފަހު ވަގުތު ޓްރަމްޕް ފަހަތަށް ޖެހިވަޑައިގެންފައިވާ ކަން އޮބްޒާވަރުން ފާހަގަކުރެ އެވެ.

މީގެ އިތުރުން، ހުރްމުޒް ކަނޑުއޮޅީގެ ކޮންޓްރޯލް އީރާނަށް އޮތުމަކީ އެ ގައުމަށް ލިބޭ ވަރަށް ބޮޑު ބާރެކެވެ. އީރާނުން ތަކުރާރުކޮށް ބުނަމުންދަނީ، އެމެރިކާގެ ބްލޮކޭޑް ނިމުމަކަށް ގެނެސް، ދަތިކުރުމުގެ ފިޔަވަޅުތައް އުވާލައި، އީރާނުގެ ފައިސާތައް ދޫކޮށްލަންދެން ކަނޑުއޮޅި ހުޅުވައިނުލާނެ ކަމަށެވެ.

އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) ނޭވީގެ ކޮމާންޑަރު ރިއަރ އެޑްމިރަލް އަލީ އަޒްމާއީ ވިދާޅުވީ، ކަނޑުއޮޅީގައި ހިނގާ ހުރިހާ ހަރަކާތެއްގެ ފުރިހަމަ ކޮންޓްރޯލް އެމީހުންނަށް އެބައޮތް ކަމަށެވެ.

ތެހެރާންގެ ޔުނިވަރސިޓީއެއްގެ ޕްރޮފެސަރެއް ކަމަށްވާ މުސްތަފާ ޚޯޝްޗެޝްމް ވިދާޅުވީ، އީރާނުން ދެކެނީ މިއީ އެމެރިކާއާ ދެކޮޅަށް ކުރާ އިގްތިސާދީ ހަނގުރާމައެއް ކަމަށެވެ. އަދި މި ހަނގުރާމައިގައި އެންމެ މުހިންމީ ހުރްމުޒް ކަނޑުއޮޅި ކަމަށް އޭނާ ވިދާޅުވިއެވެ.

އީރާނުގެ އުންމީދަކީ އެމެރިކާއިން ބަލި ގަބޫލުކޮށް މި ސަރަހައްދު ދޫކޮށް ދިއުން ކަމަށް ވެސް އޭނާ ފާހަގަކުރެއްވި އެވެ.

އަނެއްކޮޅުން، އަވަށްޓެރި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި ހަކަތަ އުފައްދާ ތަންތަނަށް ހަމަލާދީގެން، އެ ގައުމުތައް މެދުވެރިކޮށް އެމެރިކާއަށް ފިއްތުންތައް ކުރިމަތިކުރުވުމުގެ ސިޔާސަތެއް ވެސް އީރާނުން ގެންގުޅެ އެވެ.

ޖޯޖްޓައުން ޔުނިވަރސިޓީގެ ޕްރޮފެސަރ މެހްރާން ކަމްރާވާ ވިދާޅުވީ، ގަތަރާއި، ޔޫއޭއީއާއި، ސައުދީ އަރަބިއްޔާ އަދި ކުވެއިތު ފަދަ ގައުމުތަކަށް އިގްތިސާދީ ފިއްތުންތައް ކުރިމަތިކުރުވައިގެން، އެ ގައުމުތައް މެދުވެރިކޮށް އެމެރިކާއާއެކު މަޝްވަރާކުރުމަށް އީރާނުން މަސައްކަތް ކުރަމުންދާ ކަމަށެވެ.

ނަމަވެސް، އެމެރިކާގެ އިގްތިސާދީ ފިއްތުންތަކުން އީރާނަށް މާ ބޮޑު އަސަރެއް ކުރާނެ ކަމާމެދު ކަމްރާވާ ޝައްކު ފާޅުކުރެއްވި އެވެ. އޭނާ ވިދާޅުވީ އީރާނުގެ ސިޔާސީ ނިޒާމަކީ ވަރަށް ބޮޑަށް ބާރުގެ ބޭނުންކުރާ ނިޒާމެއް ކަމަށާއި، އާންމު ރައްޔިތުންނަށް ލިބޭ ދަތިތަކަށްވުރެ ބޮޑަށް ވެރިކަމުގައި ތިބި މީހުން އިސްކަންދެނީ ބާރުގައި ދެމިތިބުމަށް ކަމަށެވެ. އެހެންކަމުން އެމެރިކާގެ މި އުސޫލު ކާމިޔާބުވާނެ ކަމާމެދު އޭނާ ސުވާލު އުފެއްދެވި އެވެ.