ބެއިރޫތުގެ ދާހިޔާއަށް އިސްރާއީލުން ދިން ހަމަލާއާ ގުޅިގެން މަޝްވަރާތައް މެދުކަނޑާލައި، ވަގުތުން އިސްރާއީލަށް ރައްދު ހަމަލާދޭނެ ކަމުގެ އިންޒާރު ދިނިން: ގާލީބާފް

އިސްރާއީލުން ލުބުނާނުގެ ބެއިރޫތުގެ ދާހިޔާއަށް އެންމެ ފަހުން ދިން ހަމަލާއާ ގުޅިގެން އޭރު ކުރިއަށްދިޔަ މަޝްވަރާތައް މެދުކަނޑާލައި، އިސްރާއީލަށް ވަގުތުން ހަމަލާދޭނެ ކަމަށް އަންގާފައިވާނެ ކަމަށް އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް ވިދާޅުވެއްޖެ އެވެ.

ސަގާފީ ދާއިރާގެ އިސް ބޭފުޅުންނާއެކު ހޮނިހިރު ދުވަހު ބޭއްވި ބައްދަލުވުމެއްގައި ވާހަކަދައްކަވަމުން ގާލީބާފް ވިދާޅުވީ، ދާހިޔާއަށް ދިން ހަމަލާއާ ގުޅިގެން މަޝްވަރާތައް ހުއްޓާލުމަށްފަހު، "މިރޭ އަހަރެމެން އިސްރާއީލަށް ހަމަލާދޭނަން، އަދި އިސްރާއީލުން ރައްދު ހަމަލާއެއް ދީފިނަމަ މުޅި ސަރަހައްދަށް ހަމަލާދޭނަން" ކަމަށް އިއުލާނު ކުރެއްވި ކަމަށެވެ.

އޭނާ ވިދާޅުވި ގޮތުގައި މި އިންޒާރުގެ ނަތީޖާއަކަށްވީ، ހަމަ އެ ރޭ އީރާނާ ދެކޮޅަށް އަޅާފައިވާ ބްލޮކޭޑް ނުވަތަ ދަތިކުރުމުގެ ފިޔަވަޅުތައް އުވާލުމެވެ.

އީރާނުގެ އިސް މަޝްވަރާވެރިޔާގެ ހައިސިއްޔަތުން ގާލީބާފް ވަނީ ހުރްމުޒް ކަނޑުއޮޅިއާ ގުޅޭގޮތުން ކުރެވުނު މަޝްވަރާތަކަށްވެސް އަލިއަޅުވާލައްވާފަ އެވެ. އޭނާ ވިދާޅުވި ގޮތުގައި ވެވުނު އެއްބަސްވުމެއްގެ ދަށުން 30 ދުވަހުގެ ތެރޭގައި އެ ކަނޑުއޮޅި އަލުން ހުޅުވާލުމަށް އޮތީ ތާވަލުކުރެވިފަ އެވެ.

ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި، ބްލޮކޭޑާއި ހުރްމުޒް ކަނޑުއޮޅި "މިރޭ" އެކުގައި ހުޅުވާލާނެ ކަމަށް ވިދާޅުވުމުން، "ހުރްމުޒް ކަނޑުއޮޅިއާ ގުޅޭގޮތުން ހެދި ދޮގު އިސްލާހު ނުކޮށްފިނަމަ، ހަމަލާއެއް ދޭނެ ކަމުގެ" އިންޒާރު ދެއްވި ކަމަށް ގާލީބާފް ވިދާޅުވި އެވެ.

ގާލީބާފް ވިދާޅުވި ގޮތުގައި އޭނާގެ އިންޒާރާއެކު ޓްރަމްޕަށް ވަނީ އޭނާ ކުރި ޕޯސްޓް އިސްލާހު ކުރަން މަޖުބޫރުވެފަ އެވެ. އޭނާ ސިފަކުރެއްވި ގޮތުގައި މިއީ "ހަނގުރާމައިގެ އުސޫލުން މަޝްވަރާކުރުމުގެ" މިސާލެކެވެ. މީގެ އިތުރުން، އީރާނާއި އެމެރިކާއާ ދެމެދު ވެވުނު ފަހުމުނާމާގެ ފުރަތަމަ މާއްދާގައި "ރެސިސްޓަންސް ފްރަންޓް" ގައި ލުބުނާނު ހިމަނާފައިވާނެ ކަމަށްވެސް އޭނާ ފާހަގަކުރެއްވި އެވެ.

ޕާކިސްތާނުން މެދުވެރިއެއްގެ ދައުރު އަދާކޮށްގެން ޖުލައި 17 ވަނަ ދުވަހު އީރާނާއި އެމެރިކާއާ ދެމެދު ސޮއިކުރި 14 ނުކުތާގެ ފަހުމުނާމާގައި، ލުބުނާނު ހިމެނޭހެން ހުރިހާ ފްރަންޓެއްގައި ކުރިއަށްދާ ހަނގުރާމަތައް ދާއިމީކޮށް ހުއްޓާލުމަށާއި، 30 ދުވަހުގެ ތެރޭގައި އީރާނާ ދެކޮޅަށް އޮތް ކަނޑުގެ ބްލޮކޭޑް އުވާލުމަށާއި، ހުރްމުޒް ކަނޑުއޮޅިން ވިޔަފާރި އުޅަނދުފަހަރު ދަތުރުކުރުން އަލުން އިއާދަކުރުމަށް ވަނީ ގޮވާލާފަ އެވެ.

އެއް އަހަރު ނުވަނީސް އެމެރިކާއާއި އިސްރާއީލުން އީރާނާ ދެކޮޅަށް ފެށި ދެވަނަ އުދުވާނީ ހަނގުރާމަ ފެށީ ފެބްރުއަރީ 28 ވަނަ ދުވަހު އެވެ. އެ ހަނގުރާމައިގައި އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އީރާނުގެ އިސް ކޮމާންޑަރުންނާއި އޮފިޝަލުން އަވަހާރަކޮށްލާފައިވަނީ، އީރާނުގެ ބަލިކޮށްލުމުގެ މަގްސަދުގަ އެވެ.

ނަމަވެސް، އީރާނުގެ ސިފައިން ދިން ވަރުގަދަ ރައްދު ހަމަލާތަކުގެ ސަބަބުން، ހަނގުރާމަ ފެށިތާ 40 ދުވަސް ފަހުން ހަމަލާދިން ފަރާތްތަކަށް ވަނީ ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އަންނަން މަޖުބޫރުވެފައި ކަމަށް އީރާނުގެ ވެރިން ވިދާޅުވެ އެވެ.