މީގެ ކުރިން ދުނިޔޭގެ އެއްވެސް ޤައުމަކާ ދެކޮޅަށް އަޅާފައިނުވާ ފަދަ ވަރުގަދަ ފިޔަވަޅުތަކެއް، އީރާންއާ ދެކޮޅަށް އަޅާނެ ކަމުގެ އިންޒާރު އެމެރިކާ އިން ދީފި

މީގެ ކުރިން ދުނިޔޭގެ އެއްވެސް ޤައުމަކާ ދެކޮޅަށް އަޅާފައި ނުވާ ފަދަ ހަރުކަށި ފިޔަވަޅުތަކެއް އީރާންއާ ދެކޮޅަށް އެޅުމަށް އެމެރިކާ އިން ތައްޔާރުވަމުން އަންނަ ކަމުގެ އިންޒާރު، އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ދެއްވައިފި އެވެ. 

ބެސެންޓް މިހެން ވިދާޅުވެފައި ވަނީ، ނިއުސް މެކްސް އަށް ދެއްވި ބަސްދީގަތުމެއްގައި އެވެ. 

ބެސެންޓް ވިދާޅުވީ، އިޤްތިސާދީ ގޮތުން ޤައުމެއް އެކަހެރިކުރުމުގެ ތާރީޚުގައި ވެސް ފެނިފައި ނުވާ ފަދަ ވަރުގަދަ ފިޔަވަޅުތަކެއް އެޅުމަށް އެމެރިކާ ސަރުކާރުން ނިންމާފައިވާ ކަމަށެވެ. އަދި މިކަމާ ގުޅޭ ރަސްމީ އިއުލާންތައް ކުރިއަށް އޮތް ހަފުތާގެ ތެރޭގައި ކުރެވޭނެ ކަމަށް ކަމަށް އޭނާ ފާހަގަ ކުރެއްވި އެވެ.

އީރާންއާ ދެކޮޅަށް އަޅާ މި ފިޔަވަޅުތަކަކީ އެ ޤައުމު އިޤްތިސާދީ ގޮތުން މުޅިން އެކަހެރިކޮށްލުމަށް އަޅާ ފިޔަވަޅުތަކެއް ކަމަށް ބެސެންޓް ވިދާޅުވި އެވެ. މީގެ އިތުރުން، ހުރްމުޒް ކަނޑުއޮޅި ބަންދުކޮށް، އީރާންގެ ބަނދަރުތަކަށް އެއްވެސް އެއްޗެއް އެތެރެވިޔަ ނުދީ އަދި ބޭރުވިޔަ ނުދީ ހިފެހެއްޓުމުގެ މަސައްކަތް މެދުނުކެނޑި ކުރިއަށް ދާނެ ކަމަށް ވެސް އޭނާ ވިދާޅުވި އެވެ.

މި ފިޔަވަޅުތަކުގެ ބޭނުމަކީ ދުނިޔޭގެ އިޤްތިސާދީ ނިޒާމުން އީރާން އެއްކޮށް ބޭރުކޮށްލުން ކަމަށް ބެސެންޓްގެ ވާހަކައިގައި ފާހަގަ ކުރެއްވި އެވެ. މިއީ މީގެ ކުރިން ދުނިޔޭގެ އެއްވެސް ޤައުމަކާ މެދު އަމަލުކޮށްފައިނުވާ ފަދަ، ހަރުކަށި އުސޫލުތަކެއް ކަމަށް ވެސް އެމެރިކާގެ ޓްރެޒަރީ ސެކްރެޓަރީ ބެސެންޓް ވިދާޅުވި އެވެ.

އެމެރިކާ ސަރުކާރުން އީރާާންއާ މެދު މިފަދަ ހަރުކަށި ސިޔާސަތެއް ގެންގުޅެން ނިންމާފައި މިވަނީ، މެދުއިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި އެވެ. ކުރިއަށް އޮތް ދުވަސްތަކުގައި މި ފިޔަވަޅުތަކުގެ ތަފްސީލު ހާމަ ކުރަމުންދާނެ ކަމަށް އެމެރިކާގެ އޮފިޝަލުން ވިދާޅުވެ އެވެ.