އީރާނުން އެމެރިކާގެ އެމް.ކިއު-9 ރީޕަރ ޑްރޯނެއް ބަޑިޖަހާ ވައްޓާލައިފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނި ގޮތުގައި، އެމެރިކާގެ އެމް.ކިއު-9 ރީޕަރ މަރުކާގެ ޑްރޯނެއް އީރާނުގެ ދެކުނު ހުރްމުޒްގާން ޕްރޮވިންސްގެ މަތިން ބަޑިޖަހައި ވައްޓާލައިފި އެވެ.

އައި.އާރު.ޖީ.ސީ ގެ ޕަބްލިކް ރިލޭޝަންސް ޑިޕާޓްމަންޓުން ހުކުރު ދުވަހު ނެރުނު ކުރު ބަޔާނެއްގައި ބުނެފައިވަނީ، އެ ގައުމުގެ އިންޓަގްރޭޓެޑް އެއާ ޑިފެންސް ނެޓްވޯކްގެ ބެލުމުގެ ދަށުން، އައި.އާރު.ޖީ.ސީ ގެ އާ ކުރިއަރާފައިވާ ދިފާއީ ނިޒާމެއް ބޭނުންކޮށްގެން ހުރްމުޒްގާންގެ ވައިގެ ސަރަހައްދުން އެމް.ކިއު-9 ރީޕަރ ޑްރޯނެއް ހުއްޓުވައި ސުންނާފަތިކޮށްލާފައިވާ ކަމަށެވެ.

މި ހާދިސާ ހިނގާފައި މިވަނީ، އީރާނާ ދެކޮޅަށް އެމެރިކާއިން ފަށާފައިވާ އުދުވާނީ ހަނގުރާމައިގައި މިހާތަނަށް އެމެރިކާގެ 45 އެމް.ކިއު-9 ރީޕަރ ޑްރޯން ގެއްލިފައިވާ ކަމަށް ވޮޝިންގްޓަން ޕޯސްޓުން ރިޕޯޓްކުރިތާ އެއް ދުވަސް ފަހުންނެވެ. އެ ނޫހުން ރިޕޯޓްކޮށްފައިވާ ގޮތުގައި، އެމެރިކާގެ މި މަރުކާގެ ޑްރޯން ފްލީޓްގެ ގާތްގަނޑަކަށް ހަތަރުބައިކުޅަ އެއްބައި އީރާނުގެ ވައިގެ ދިފާއީ ނިޒާމުން ވަނީ ވައްޓާލާފަ އެވެ. މީގެ ސަބަބުން ވޮޝިންގްޓަންގެ ޖާސޫސީ އަދި ހަމަލާދޭ މައިގަނޑު ވަސީލަތެއްގެ ނާޒުކުކަން ވަނީ ހާމަވެފަ އެވެ.

އެ ރިޕޯޓުގައިވާ ގޮތުން، މި ގެއްލުންތަކުގެ ސަބަބުން އެމެރިކާގެ ޓެކްސް ދައްކާ ފަރާތްތަކަށް 1.3 ބިލިއަން ޑޮލަރަށްވުރެ ބޮޑު ތަކުލީފެއް އުފުލަން ޖެހިދާނެ އެވެ. އެއީ ކޮންމެ ރީޕަރ ޑްރޯނެއްގެ އަގު، އޭގައި ހުންނަ ވަސީލަތްތަކަށް ބަލައި 30 މިލިއަން ޑޮލަރާއި 50 މިލިއަން ޑޮލަރާ ދެމެދުގެ އަދަދަކަށް އަރާތީ އެވެ.

ފެބްރުއަރީ މަހުގެ 28 ވަނަ ދުވަހު ހަނގުރާމަ ފެށުނުއިރު، އެމެރިކާގެ އަތުގައި ގާތްގަނޑަކަށް 185 ރީޕަރ ޑްރޯން އޮތެވެ. މީގެ ތެރޭގައި އެއާ ފޯސްއިން ބޭނުންކުރާ 165 ޑްރޯނާއި މެރިން ކޯޕްސްއިން ބޭނުންކުރާ 20 ޑްރޯން ހިމެނެ އެވެ.

އީރާނުގެ ވައިގެ ސަރަހައްދުގައި އޮޕަރޭޓް ކުރަމުންދާ އަގުބޮޑު ޑްރޯންތައް ރައްކާތެރިކުރުމުގައި އެމެރިކާގެ އަސްކަރިއްޔާއަށް ކުރިމަތިވެފައިވާ ގޮންޖެހުންތައް ހާމަވެގެންދަނީ، ގެއްލުނު ޑްރޯންތަކުގެ ބޮޑު ބައެއް އީރާނުގެ ވައިގެ ދިފާއީ ނިޒާމުން ވައްޓާލާފައިވާތީ އެވެ.

އެމް.ކިއު-9 ރީޕަރ ޑްރޯނަކީ އެމެރިކާގެ އިންޓެލިޖެންސް، ސަވައިލަންސް އަދި ޖާސޫސީ މަސައްކަތްތަކުގެ އިތުރުން އަމާޒުތަކަށް ސީދާ ހަމަލާދިނުމުގައި ބޭނުންކުރާ މައިގަނޑު ވަސީލަތަކަށް ވާތީ، މި ގެއްލުންތަކަކީ ވަރަށް ބޮޑު ގެއްލުންތަކެކެވެ. ޕައިލެޓެއްގެ ފުރާނައަށް ނުރައްކާނުކޮށް އޮޕަރޭޓް ކުރެވޭތީ، ވަރުގަދަ ދިފާއީ ނިޒާމުތައް ހުންނަ ސަރަހައްދުތަކުގައި މި ޑްރޯން ބޭނުންކުރުމަށް އެމެރިކާއިން  އިސްކަންދެ އެވެ.

އެމެރިކާ އާއި އިސްރާއީލުން ގުޅިގެން އީރާނަށް ދޭންފެށި އެންމެ ފަހުގެ ހަމަލާތައް ފެށުނީ ފެބްރުއަރީ 28 ގަ އެވެ. މީގެ ރައްދުގައި ތެހެރާނުން ވަނީ އެ ސަރަހައްދުގައި ހުރި އެމެރިކާ އާއި އިސްރާއީލުގެ އަސްކަރީ އަމާޒުތަކަށް ކޮންމެ ދުވަހަކު މިސައިލާއި ޑްރޯން ހަމަލާތައް ދީފަ އެވެ. މި ހަމަލާތައް މެދުކެނޑުނީ ޖޫން 17 ވަނަ ދުވަހު ތެހެރާނާއި ވޮޝިންގްޓަނާ ދެމެދު އިސްލާމްއާބާދު މެމޮރެންޑަމް އޮފް އަންޑަސްޓޭންޑިންގ (އެމް.އޯ.ޔޫ) ގައި ސޮއިކުރުމާ ގުޅިގެންނެވެ.

ނަމަވެސް، ޖުލައި މަހުގެ ތެރޭގައި އެމެރިކާއިން ވަނީ އެމް.އޯ.ޔޫ ގެ ދަށުން ވެފައިވާ އެއްބަސްވުންތަކާ ޚިލާފުވެ، އީރާނާ ދެކޮޅަށް އަލުން އުދުވާނީ ހަމަލާތައް ދޭން ފަށާފަ އެވެ. މިއާއެކު އީރާނުން ވަނީ ވަރުގަދަ ރައްދު ހަމަލާތަކެއް ދޭން ފަށާފަ އެވެ.